36
Bisãsiri vãni
Dikiri zↄ̀bleri Dauda lɛ̀ɛ.
1 Gbɛ̃ vãni durunna yã dↄ ma swɛ̃̀ɛa,
à wɛ́ dìgↄ̃ Luda wé'i vĩro.
2 Zaakũ àdigↄ̃ a zĩda e gbɛ̃ mana ũmɛ,
àdi a durunna dↄ̃ gbasa à zãnlo.
3 Ɛ́kɛ kũ manafikio kú a lɛ́n,
à ↄ̃ndↄ̃ kũ manakɛnaaoo tò.
4 Àdi yã vãni laasun lɛ́ a wútɛkia,
àdi gí yã pãsĩiro,
àdi a zĩda da zɛ́ fayasariden.
5 Dikiri, n yenyĩ zↄ̃kↄ̃ↄ kà ludambɛa,
ń náani vĩ manamana, à zↄ̃̀ susunɛnↄa.
6 N manakɛna zↄ̃kↄ̃ lán kpinↄ bà,
n yãzɛdekɛ lɛ́ vĩro lán ísira lòkotoo bà.
Dikiri, ndì bisãsirinↄ kũ nↄ̀bↄnↄ bo pínki.
7 Luda, n yenyĩ bɛ̀ɛrɛ vĩ fá,
bisãsirinↄ dì utɛ n orun.
8 Òdi n ↄn pↄ́ble níside ble ò kã,
ndì n swa'i pↄnnade kpáḿma ò mi.
9 Zaakũ mↄkↄ̃mmɛ wɛ̃̀ndiboki ũ,
ó kunna n gupuran mɛ́ à ó wɛ́ kɛ̃̀.
10 Ǹgↄ̃ yenyĩ mↄ gbɛ̃ kũ ò n dↄ̃nↄnɛ,
ǹgↄ̃ nɛ̀sɛpuradenↄ sura ba ǹgↄ̃ gɛ́.
11 Ǹsun tó zĩdabirinↄ gɛ̀sɛ pɛ́tɛpɛtɛmaro,
ǹsun tó yãvãnikɛrinↄ ↄ sↄ̃mairo.
12 Ǹ gwa, manafikide pìnↄ lɛ̀tɛ,
ò gↄ̃̀ wutɛna sↄ̀rↄrↄ, oni fↄ̃ ò futɛro.