48
Zaiↄ̃ bi Luda wɛ̃tɛmɛ
Kora burinↄ lɛ̀ɛ.
Dikiri zↄ̃kↄ̃, à kà ò a sáabu kpá manamana
ó Luda wɛ̃tɛ gũn a kpi kũ à kú adonaa musu.
Zaiↄ̃ gbɛ̀ katɛna mana,
à de andunia gbɛ̃ sĩnda pínkinɛ pↄnna ũ.
Kína zↄ̃kↄ̃ wɛ̃tɛ pì kú kpi gugbãnduru kpa.
Luda kú a gudãkpãkinↄ gũn,
à tò ò a dↄ̃ aafialeki ũ.
 
Kũ kínanↄ lɛ́dokↄ̃nↄ kɛ̀
de ò su ò lɛ́tɛa lɛɛlɛ,
kũ ò wɛ̃tɛ pìi è lɛ, akũ à bò ń sarɛ,
vĩna ń kũ, akũ ò bàa lɛ̀.
Ò gↄ̃̀ kũ lukanaao
lán nↄgbɛ̃ nↄ̀wãwãkɛrii bà.
N ń kɛ́ dúgudugu
lákũ ifãboki ĩa dì lagatarinↄ gó'itɛnↄ kakatɛ nà.
 
Yã kũ o màan ó wɛ́ è
Dikiri Zĩ̀karide ó Luda wɛ̃tɛ gũn.
Luda wɛ̃tɛ pìi kàtɛ àgↄ̃ kun gↄrↄ sĩnda pínki.
 
Luda, ó kú n kpɛ́ ↄnn,
ótɛn laasun lɛ́ n yenyĩkɛnaaa.
10 Luda, lákũ n tↄ́ dàgula ari andunia lɛ́n nà,
lɛn n sáabukpanaa dàgula lɛ dↄ.
Ndì yã gↄ̃gↄ̃ n gbɛ̃nↄnɛ a zɛ́a.
11 Zaiↄ̃ kpidenↄ tɛn pↄnna kɛ,
Yudanↄ bùsu wɛ̃tɛdenↄ pↄ kɛ̀ nna,
yãkpatɛ kũ n kɛ̀nↄ yãi.
 
12 À dↄdↄkↄ̃a à lika Zaiↄ̃i,
à a bĩni dãkpãki lei dasinↄ naro.
13 À a bĩninↄ tàasi ká kũ a zɛki gbãnanↄ
de à le à baba ziadenↄnɛ.
14 Zaakũ Luda dímɛ ó Luda ũ gↄrↄ sĩnda pínki,
àdi dowɛrɛ arɛ ari ò gɛ́ gao.