50
Donyĩkɛna yãpura
Asafa lɛ̀ɛ.
1 Dikiri Luda Gbãnasĩndapinkide tɛn yã o,
àtɛn lɛ́ zu andunia gbɛ̃nↄi
zaa ifãboki kpa ari a lɛ́tɛ kpa.
2 Luda gakuri tɛn bi Zaiↄ̃,
wɛ̃tɛ kũ a manakɛ papana.
3 Ó Luda tɛn su, anigↄ̃ yĩtɛnaro.
Tɛ́ kũ àdi ń ble kú a arɛ,
zàga'ĩa pãsĩ likai.
4 Àtɛn musudenↄ sísi kũ zĩtɛdenↄo
de à le à yãkpatɛ kɛ kũ a gbɛ̃nↄ.
5 À pì: À ma yãmarinↄ kakaramɛnɛ,
gbɛ̃ kũ ma bàka kú kũńwo sa'onaa gãinↄ.
6 Ludamɛ yãkpatɛkɛri ũ,
musudenↄ dì a yãkɛna a zɛ́a kpàkpa kɛ.
7 À ma, ma gbɛ̃nↄ, má yã vĩ mà oárɛ,
Isarailanↄ, mani á dà bobo,
makũmɛ Luda á Luda ũ.
8 Matɛn zuka káái á sa'ona yãiro,
ke sa'opↄ kũ adìgↄ̃ ká tɛ́n à tɛ́ kũ.
9 Má zùsa kũ à kú á kpàsan ni vĩro,
kesↄ̃ blè kũ à kú á karaa gũn,
10 zaakũ nↄ̀bↄsɛ̃ntɛnↄ bi ma pↄ́nↄmɛ
kũ pↄ́kãde kpàsa kũ ò kú sĩ̀sĩ dasinↄ musuo.
11 Má kpi musu bãnↄ dↄ̃ pínki,
sɛ̃̀ntɛ pↄ́ ketenↄ kun ma pↄ́ ũmɛ.
12 Tó nà tɛni ma dɛ, mani oárɛro,
zaakũ makũmɛ má andunia vĩ
kũ pↄ́ kũ ò kunnↄ pínki.
13 Madì zùsa nↄ̀bↄ són yá?
Madì blèkofĩnii aru min yá?
14 À sa oma kɛnnakũkↄ̃o pↄ́ ũ,
à lɛ́ kũ a gbɛ̃̀ makũ Luda Musudea fĩna bo.
15 À ma sísi warikɛgↄrↄa,
mani á bo, áni bɛ̀ɛrɛ límɛnɛ.
16 Akũ Luda pì yãvãnikɛrinↄnɛ:
À kɛ̀ dera átɛni ma yãditɛnanↄ dↄdↄↄ?
Bↄ́yãi ma bàka kunna kũńwo yã da á lɛ́nn?
17 Á ye ma yãdannɛnaairo,
a ma yãnↄ kpà kpɛ.
18 Tó a kpãni è, adì a kɛ á gbɛ̃nna ũmɛ,
á bàkaa dìgↄ̃ kú kũ zinakɛrinↄ.
19 Á lɛ́gbɛɛ vãni,
adì lɛ́nna kɛńnɛ.
20 Adìgↄ̃ á gbɛ̃ndo pi,
adì á da nɛ́ ɛ́kɛ bo.
21 A yã birenↄ kɛ̀, akũ má yĩtɛna.
Átɛn da má de lán á bàmɛ,
ama mani kpãkɛ̃ái mà á dà bobo.
22 Ákↄ̃nↄ kũ ma yã sã̀águnↄ, à yã pì ma.
Tó lɛn sↄ̃ro, mani á kɛ yákiyaki,
gbɛ̃ke ni fↄ̃ à á símaro.
23 Gbɛ̃ kũ à kɛnnakũkↄ̃o sa òma zↄ̃kↄ̃kɛ dↄ̃̀mɛnɛ,
àtɛni ma gba zɛ́ mà mↄárɛ
lákũ madì gbɛ̃nↄ sura ba nà.