52
Aruzɛkɛde ĩadãnaa
Lɛ̀ kũ Dauda dà gↄrↄ kũ à gɛ̀ɛ Aimɛlɛki bɛa, akũ Ɛdↄmu gbɛ̃ Doɛgi gɛ̀ɛ à ò Solunɛɛ
1 Gↄ̃sa gbãna, Luda gbɛ̃kɛ kun gↄrↄ sĩnda pínki,
à kɛ̀ dera ntɛn ĩa dã kũ yã vãnioo?
2 Ndìgↄ̃ lɛ́fↄtↄ kɛ kũ gbɛ̃nↄ gↄrↄ sĩnda pínki,
n lɛ́ nna lán gɛ̃ mìbobↄↄ bà,
ndì gbɛ̃nↄ gbákĩ zↄ̃o.
3 Ń ye yã vãnii de a manala,
ɛ́kɛtonaa dì kɛnnɛ nna de yãpurala.
4 Ń ye gbɛ̃kakatɛna yãi,
manafikiyã mɛ́ à da n lɛ́n.
5 Luda ni n gbãna kↄ̀ ɛ́ ari gↄrↄ sĩnda pínki,
ani n kũ à bo kũnwo n kpɛ́n,
ani n bo gbɛ̃ bɛ̃nɛnↄ tɛ́.
6 Tó gbɛ̃ mananↄ è, vĩna ni ń kũ,
oni n lalandi kɛ ò pi:
7 Gbɛ̃ kũ adi Luda kɛ a utɛki ũron dí!
À náani kpà a aruzɛkɛ zↄ̃kↄ̃ↄa,
à gↄ̃̀ gbãnade ũ gbɛ̃kakatɛnaa gũn.
8 Má de lán kù lásirade kũ à kú Luda ↄnn bà,
manigↄ̃ zɛ kũ Luda yenyĩo gↄrↄ sĩnda pínkimɛ.
9 Manigↄ̃ n sáabu kpá gↄrↄ sĩnda pínki
yã kũ n kɛ̀ yãi,
mani n tↄ́ sɛ́ lei n yãmarinↄ wára,
kũ ń mana yãi.