62
Ludamɛ utɛki ũ
Dauda lɛ̀ɛ.
1 Luda ado mɛ́ à tò ma laakari kpátɛna,
àkũ mɛ́ àdi ma sura ba.
2 Àkũmɛ ma gbɛ̀si ũ ma surabari ũ,
madì gbãna lea, mani yĩgã zikiro.
3 Gɛ̃̀n ũgban ánigↄ̃ futɛ gbɛ̃aa?
Áni a nɛ lán gbĩ̀ kũ à ɛ̀ à kpán
ke kara zĩ bàn yá?
4 A gona a tía lɛ́n átɛn kpákũsũ,
ɛ́kɛtona mɛ́ àdi kɛárɛ nna.
Adì sa mana o gbɛ̃nɛ kũ lɛ́omɛ,
akũ adì ń ká á swɛ̃̀ɛ gũn.
5 Luda ado mɛ́ à tò ma laakari kpátɛna,
zaakũ àkũmɛ ma wɛ́ dↄi.
6 Àkũmɛ ma gbɛ̀si ũ ma surabari ũ,
madì gbãna lea, mani yĩgã zikiro.
7 Ma aafia kũ ma bɛ̀ɛrɛɛo dì bo a kĩnaamɛ,
àkũmɛ ma gbɛ̀si gbãna ũ, ma utɛki ũ.
8 Gbɛ̃nↄ, àgↄ̃ a náani vĩ gↄrↄ sĩnda pínki,
à á swɛ̃̀ wɛ̃nɛ, àkũmɛ ó utɛki ũ.
9 Talakanↄn de lán lɛ́'ĩa bàmɛ,
gbãnadenↄn kú pↄ́ke lɛ́iro.
Tó ò ń yↄ̃ kilooa,
ń pínki nigↄ̃ de fáuunle.
10 Àsun gbɛ̃ble'ↄgↄ náani kɛro,
àsun ĩa dã kũ kpãni pↄ́oro.
Tó á aruzɛkɛ tɛn kↄ̃,
àsun tó à á swɛ̃̀ blero.
11 Yã mɛ̀n don Luda ò,
yã mɛ̀n pla dínↄn ma mà:
Luda, mↄkↄ̃n mɛ́ ń gbãna vĩ,
12 Dikiri, mↄkↄ̃n mɛ́ ń gbɛ̃kɛ vĩ,
akũ ndì fĩna bo baadinɛ a yãkɛnaaa.