65
Buri sĩnda pínki wɛ́ dↄ Ludai
Dauda lɛ̀ɛ.
Luda, à kũ̀ ò n táaki lɛ́ Zaiↄ̃
ò lɛ́ kũ ò gbɛ̃̀nnɛnↄ fĩna bo.
Mↄkↄ̃n kũ ndì aduakɛna ma,
n kĩnaan buri sĩnda pínki ni sun.
Ó yã vãninↄ ó fú,
akũ n ó taarinↄ kɛ̃̀wá.
Arubarikademɛ gbɛ̃ kũ n sɛ̀
n gɛ̃ kãao n ↄnn ũ.
N kpɛ́ pↄ́ mananↄ mↄ̀wá,
n kpɛ́ kũ à kú adona pìi.
 
Ndì wewá kũ yã mana naasidenↄ,
Luda ó Surabari.
Andunia lɛ́zɛkidenↄ kũ ísirabaradenↄ
wɛ́ dↄnyĩ ń pínki.
N gbãna dànla,
n kpinↄ kɛ̀ kũ n ikoo.
Ndì ísira kũ a sↄ̃nↄ kĩni kpátɛ,
ndì burinↄ zuka lákańnɛ.
N daboyãnↄ dì swɛ̃̀ kɛ̃
gbɛ̃ kũ ò kú zĩtɛlɛanↄn,
òdi ayuwii dↄmma zaa ifãboki kpa
kũ a lɛ́tɛ kpao.
 
Ndì laakari dↄ anduniaa, ndì a gba í,
ndì taaki ká zĩtɛnɛ, n swanↄn pana kũ ío,
ndì tó pↄ́wɛnↄ kɛ, zaakũ lɛn n dìtɛ lɛ.
10 Ndì í dagula ari búgbanↄ pa,
ndì gunↄ foko fↄ̃ kũ legũo,
ndì arubarika da pↄ́ kũ à bùtɛnↄgu.
11 Ndì arubarika da burazĩn wɛ̃̀ kũ wɛ̃̀ɛo,
pↄ́ble níside dì kↄ́tɛ n ágban.
12 Pↄ́dãdãkinↄ sɛ̃̀la bↄ̀tↄↄ kù sɛ̃̀ntɛ,
sĩ̀sĩnↄ pↄnna dà uta ũ.
13 Pↄ́kãdenↄ dàgula ń dãdãkinↄa,
pↄ́wɛ dàgula sĩ̀sĩgɛrɛɛi.
Òtɛn pↄnna wiki lɛ́, òtɛn lɛ̀ sí.