9
Luda sáabukpana kũ àdi yã kɛkɛ gbɛ̃nↄnɛ yãi
Dauda lɛ̀ɛ.
Dikiri, mani n sáabu kpá kũ nɛ̀sɛdoo,
mani n yãbonsarɛkɛnanↄ kpàkpa kɛńnɛ.
Mani pↄnna kɛ mà ĩa dã n yã musu,
Luda Musude, mani n tↄ́ kpá kũ lɛ̀sinaao.
 
Ma ibɛrɛnↄ dì kpɛ li,
òdi lɛ́tɛ ò gaga n arɛ.
Zaakũ n zɛ kũmao n yã nna kpàma,
vutɛna n tìntinnwa n yã gↄ̃̀gↄ̃ a zɛ́a.
N kpãkɛ̃ burinↄi,
n gbɛ̃ vãninↄ kàkatɛ n ń tↄ́ dɛ̀dɛ míↄmiↄ.
N kisira kũ àdi lákaro kpà ma zãngurinↄi,
n ń wɛ̃tɛnↄ gbòro, ń yã dↄ gbɛ̃kegu doro.
 
Dikiri dì kí ble gↄrↄ sĩnda pínki,
à a kpata dìtɛ yãkpatɛkɛna yãi.
Ani yãkpatɛ kɛ kũ andunia gbɛ̃nↄ súsu,
ani kí ble burinↄa a zɛ́a.
Dikirimɛ utɛki ũ gbɛ̃ kũ òtɛn gbãna mↄńnɛnↄnɛ,
à deńnɛ aafialeki ũ warikɛgↄrↄa.
10 Dikiri, gbɛ̃ kũ ò n tↄ́ dↄ̃ↄnↄn n náani vĩ,
ndì n ki wɛtɛrinↄ zukũnaro.
 
11 À lɛ̀ sí Dikirinɛ, àtɛn kí ble zaa Zaiↄ̃,
à a yãkɛnanↄ kpàkpa kɛ buri sĩnda pínkinɛ.
12 Zaakũ àdi mↄraa ká gbɛ̃dɛriia, yã dì sãnlo,
àdi takasidenↄ wikilɛna yã da.
 
13 Dikiri, ǹ gwa lákũ ma ibɛrɛnↄ tɛn wari dↄma nà,
ǹ ma wɛ̃nda gwa ǹ ma bo ga lɛ́i,
14 de mà n tↄ́ kpá Zaiↄ̃ bĩnilɛa,
mà pↄnna kɛ kũ n ma sura bà yãi.
15 Burinↄ sì wɛ̀ɛ kũ ò yↄ̃̀n,
ń gbá zù bà kũ ò kpàkpan.
16 Ò Dikiri dↄ̃ kũ yãkpatɛkɛna a zɛ́aao,
àdi tó gbɛ̃ vãni yãkɛna ɛra a musu.
 
17 Gbɛ̃ vãninↄ dì tá gyãwãn,
buri kũ òdi Luda yã daro pìnↄ.
18 Wɛ̃ndadenↄ yã ni sãagu zikiro,
takaside sↄ̃ à wɛ́dↄina lakana vĩro.
 
19 Ǹ futɛ Dikiri, ǹsun tó bisãsiri n gã̀ fĩro,
ǹ buri sĩnda pínki kakara ǹ yãkpatɛ kɛ kũńwo.
20 Dikiri, ǹ tó vĩna burinↄ kũ,
de ò le ò dↄ̃ kũ bisãsirinↄmɛ ń ũ.