91
Ludamɛ ó dãkpãri ũ
Gbɛ̃ kũ à utɛna Luda Musude ↄĩ
nigↄ̃ kú Gbãnasĩndapinkide uraai.
Ani pi Dikirimɛ a zɛki gbãna ũ,
a Ludamɛ a utɛki ũ, á a náani vĩ.
 
Àkũ mɛ́ ani n sí kariia,
ani n sura ba kũ gagagyão.
Ani n sↄtↄ a pↄtɛn, ĩnigↄ̃ utɛna a orun,
a náanikɛna mɛ́ ani n dãkpã lán sɛ̃gbako bà.
Gwãani karinↄ kũ fãnantɛ̃ kà vĩnlanↄ
ń ke vĩna ni n kũro,
ke gagagyã kũ àdigↄ̃ tɛ́ gusiran
ke gyãgɛ̃wɛ̃tɛ kũ àdi ń le fãnantɛ̃ gbãna.
Bee tó gbɛ̃nↄn wàa sↄↄro tɛn lɛ́tɛ n sarɛ,
ke gbɛ̃nↄn dúbu kuri tɛn ga n ↄplai,
pↄ́ke ni n lero.
Ĩni wɛ́ sɛ́ ǹ gwa,
ĩni e lákũ òdi wɛ́ tã yãvãnikɛrinↄa nà.
 
Tó n Luda Musude kɛ̀ n utɛki ũ,
tó n Dikiri kɛ̀ n kúki ũ,
10 yã vãni ke ni n lero,
kisira ni gɛ̃ n ↄnnlo.
11 Zaakũ ani n yã o a malaikanↄnɛ,
de ò n dãkpã gu kũ ntɛn gɛ́n pínki.
12 Oni n sɛ́ ń ↄĩ
de ǹsun gɛ̃̀ sí gbɛ̀ɛaro yãi.
13 Ĩni gɛ̀sɛ zɛ músuua kũ káreo,
ĩni gɛ̀sɛ pɛ́tɛpɛtɛ sàbooa kũ pitikoo.
 
14 Dikiri pì: Zaakũ à nàmai, mani a bo,
zaakũ à ma dↄ̃, mani ↄ kúa.
15 Ani ma sísi, mani wea,
tó yã nàkaraa, manigↄ̃ kú kãao,
mani a sura ba mà a kpe ta.
16 Mani a pↄ kɛ nna kũ wɛ̃̀ndi gbã̀nao,
mani tó à e lákũ madì gbɛ̃ sura ba nà.