Luda yã takada kũ Bisã yão ZABURA 99

99

Luda kũ à kú adonaa

1 Dikiri tɛn kí ble, burinↄ luka,

à vutɛna kɛrubunↄ dagura,

andunia yĩgã

2 Dikirin zↄ̃kↄ̃ Zaiↄ̃,

à de buri sĩnda pínkila.

3 Ò a tↄ́ zↄ̃kↄ̃ à naaside bo,

à kú adona.

4 Kína pì gbãna vĩ, à ye yãzɛdei,

àkũ mɛ́ à yãkpatɛkɛna a zɛ́aa dà,

à yã gↄ̃̀gↄ̃ Yakubu burinↄnɛ a zɛ́a.

5 À Dikiri ó Luda tↄ́ sɛ́ lei,

à kútɛ a tìntin arɛ,

à kú adona.

6 Musa kũ Harunao kú a gbàgbarinↄ tɛ́,

Samuɛlimɛ a sìsirinↄ doke ũ,

ò a sìsi, akũ à wèḿma.

7 Zaa tɛ́luku gũnn à yã òńnɛ,

ò a doka kũ a yãdannɛnanↄ kũna.

8 Dikiri ó Luda, n weḿma,

mↄkↄ̃mmɛ Luda kũ àdi ń taari kɛ̃ḿma ũ,

bee kũ abireo n ń yã vãninↄ wì ń musu.

9 À Dikiri ó Luda tↄ́ sɛ́ lei,

à donyĩ kɛnɛ a kpi kũ à kú adona musu,

zaakũ Dikiri ó Luda kú adona.