Kayëta iỹanar ir Ɓëkoreŋët in
Lilaya in
Akayëta aŋo ex añanar and ỹëgwën baɓi Pol Okëreceŋ od gër Amara and Koreŋët aŋ. Mëŋ ebax aỹanar ar nangëndëra baɓi Atëfëtan and Yesu Kërisët aŋ. Okëreceŋ oko axucarëra baɓi xucarërand gër Amara andeɓën xali fitarëra këni ɓëmëxwër ɓëmëxwër. Ɓërëmar ari bani rind orekar ol xali aɓat ỹëraya këŋo asoxari ar sëm an. Ɓëte aw̃acër bani w̃acërënd gër kiti iŋ gër ɓër ax gi ex na okëreceŋ. Pol ayaka yaka baɓi ɓëte ga w̃ëkara bano: end eñër ed okëreceŋ eŋ, gë end olaŝ eŋ, gë end ecemar ed Axwën eŋ, gë end ɓanjëla ɓand Angoc Amënëk eŋ, do gë end ekani ed gër ecës eŋ. Akayëta aŋo kë sëƴalind mondake ỹapëk eni dind ɓërëw̃ak end Yesu Kërisët ɓën gë ɓamërëw̃ëra ɓand fitarëk kë gë eyeƴan ed Kaxanu ɓaŋ. Er ex gër akayëta in:
Ecëmar el do gë cale ind ecëkwa iŋ: 1.1-9.
End egi ed araɓat në end Yesu Kërisët eŋ: 1.10–2.16.
End ekwëta ed osëƴali or oparëxanda eŋ: 3.1–4.21.
End ola or ỹapëk gër Amara eŋ: 5.1–7.40.
End ỹas er oyel or h̃aŝ kënëɓi gër olaŝ eŋ: 8.1–11.1.
End ang ỹapëk cale ind Amara eŋ: 11.2–14.40.
End er w̃acayak ekani ed gër ecës eŋ: 15.1-58.
Ɓeɓër fëna baxo Pol ɓën: 16.1-12.
Ɓapela ɓepelatar ɓaŋ: 16.13-24.
1
Ecëmar el
1 Wëno Pol, ar yata këŋo Kaxanu ga ỹandi këŋo me gi parëxanda ir Yesu Kërisët an do gë aɓaỹe Sosëten,
2 këŋun ỹëgwënëlind wën Amara and Kaxanu and gër Koreŋët aŋ. Yesu Kërisët yata këŋun do w̃ac këŋun en gi ɓulunda iw̃ënëk irexëm, wën ɓër kë xëland ow̃ac orexëm ɓën ang ɓiyi ak do gë ɗek ɓër këŋo ŝalend gër ed ex yo ar ex Axwën areɓën, do areɓi an.
3 Awa Faba Kaxanu do gë Yesu Kërisët, Axwën areɓi an, yëlëlenun oyekax ol do gë oɓetak ol!
End ɓenjekax ɓend gër Yesu Kërisët eŋ
4 Aŝëkwa këmo ŝëkwand Kaxanu nand ex yo end oyekax or yël këŋun paɓ gë eɓar ed ɓar këmi gë Yesu Kërisët el.
5 Gayikwa ga ɓar kën gë mëŋ ŝotaxën kën enjekax end ex yo, eyeƴan ed ex yo, do gë onangëran or ex yo,
6 gayikako osede or Kërisët ol aŝanaya ŝanayak gër ola orewën.
7 Awa gërëgako, gër ɓanjëla ɓand ko yëlënd Kaxanu në end oyekax orexëm na, gamatak an can ex na and këno ŝënind exo canayaw Yesu Kërisët, Axwën areɓi aŋ.
8 Mëŋ këŋun xemën ɓëte xali gër eŋata en gixën gë end kënun nëp këm yatir ko ɓakaw Yesu Kërisët, Axwën areɓi an.
9 Kaxanu ar mokwëta hi ko, mëŋ ex ar w̃ac këŋun gër eɓaỹër ed në end Asëñiw̃ Yesu Kërisët, Axwën areɓi el.
End ɓakucara ɓand gër Amara eŋ
10 Ɓëmaỹe, axara xara këmun gër ow̃ac or Yesu Kërisët, Axwën areɓi an, wëlërindën. Cotin anjëlan amat, onden omat, oñandi oɓat, do këreŋun kucarërand na gër amara andewën.
11 Ɓëmaỹe, yama ɓër ekun ed Këlowe ɓën ga felati këne nde mëne ɓatakëra exëna mërëxand irewën.
12 Awël wël këme mëne ala kala mondako ko yeƴanënd: «Wëno ar Pol hi këme!» Ajo exo de: «Wëno ar Apolos hi këme!» Ajo ɓëte: «Wëno ar Kefas hi këme!» Ajo ɓëte: «Wëno cëŋ ar enga end Kërisët hi këme!»
13 Kërisët nde ŝapërëk mondako? Pol nde fika bano në endewën? Gër ow̃ac or Pol nde ɓuyi kënun?
14 Aŝëkwa këmo ŝëkwand Kaxanu gayik ang hi kën ak, gaɓatak amo ɓuyi ex na, ang ax gi ex na Kërisëpos do gë Gayiyos.
15 Ata ala ax kor na exo de mëne gër ow̃ac oram ɓuyi kënun.
16 Iyo aɓuyi ɓuyi këmëni ɓëte ɓër ekun ed Sëtefanas ɓën, gër ga ex yo, ame nang ex na ba ala aŝëxe ɓuyi këmo na.
17 Kërisët law̃ënëgu ke me pemërand Atëfëtan aŋ gër ɓela. Xarak ax gi ex na me yeƴanënd gë orenik or ɓela, ax gi ex na mëni ɓuyind, këdi kë ƴep ecës ed ŝës ko Kërisët gër kërëwa el.
End panga do gë orenik or Kaxanu eŋ
18 Enimin, epemëra ed ecës ed Kërisët gër kërëwa el, ofënirëx ex gër ɓër nambërak. Ɓarikan, gër ɓiyi ɓër fex këne, panga ind Kaxanu ex.
19 Gayikwa Oñëgw Omënëk ok rek:
«Alaw̃ këme law̃ orenik or ɓërenik ol,
Awëlëbël këme wëlëbël onden ond ɓër nangërak oŋ.»
20 Feye exo arenik an? Feye exo aŝalen an? Feye exo ar kë ŝampërend ɓend gër ngwën ro an? Ax gi ex na nde Kaxanu wëlëbëlëk orenik or ɓër gër ngwën ro ol xali hik ofënirëx?
21 Enimin, gayikako ɓërenik ɓër gër ngwën ro ɓën gë orenik oreɓën ol ano nang ex na Kaxanu, ata gë ofënirëx or epemëra el ỹapan këŋo Kaxanu eɓi pexënënd ɓër w̃ak ɓën.
22 Gayikwa Ɓëŝëwif ɓën kë w̃ëkand ɓecarax do ɓër ɓenëng ɓecëxe ɓën këni ŝaland orenik ol.
23 Xarak ɓiyi, end Kërisët ir fika bano eŋ këmi femërand, ata endeƴ eŋo këni fokërënd Ɓëŝëwif ɓën, ɓëte eŋo ofënirëx ex gër ɓër ax gi ex na Ɓëŝëwif.
24 Ɓarikan gër ɓër w̃acëgu këɓi Kaxanu, hi këni Ɓëŝëwif, hi këni ɓër ɓenëng ɓecëxe, Kërisët ijo, panga do orenik or Kaxanu exo.
25 Gayikwa ofënirëx or Kaxanu ol renik nëmëc orenik or ɓela ol, do ositara or Kaxanu ol nëmëcak ojaw̃ od ɓela ok.
26 Ɓëmaỹe, yëlarayin noɓën hi kën, wën ɓër w̃ac këŋun Kaxanu ɓën: ɓërenik ax gi ex na gër owat or ɓela, ɓangwëlik ax gi ex na, ɓër gapak ɓën ani ñëmb ex na mërëxand irewën.
27 Ɓarikan Kaxanu wa sanak ɓeɓër fënirëxik gër ngwën ro ɓën eɓi bëlandëraxën ɓërenik ɓën. Ɓëte mëŋ yata këɓi ɓër sitarak gër ngwën ro ɓën eɓi cëfënanaxën ɓër gë ojaw̃ ɓën.
28 Kaxanu sanak ɓëte ɓeɓër ɓak gër ngwën ro ɓën, ɓeɓër yaf këni ɓela ɓën, ɓeɓër ỹoweỹ ax gi ex na ɓën, exo ƴepënaxën ɓeɓër fëɓ këni ɓën.
29 Mëŋ ex, ala ax kor na exo dafëna gër lëngw ir Kaxanu.
30 Xarak paɓ gë mëŋ ɓaraxën kën gë Yesu Kërisët. Yesu Kërisët w̃ëlanëgu këɓo orenik or Kaxanu ol do ɓëte gë or ŝenene ol, ow̃ënëk ol do gë apexa aŋ.
31 Awa ang rek Oñëgw Omënëk ak: «Ar kë rafënand an, dafënalexo gër ɓend ri ko Axwën.»