Kayëta ir Filemoŋ in
Lilaya in
Akayëta aŋo Pol ỹëgwën këreceŋ ir baŋo Filemoŋ. Ar Xaɗëp irexëm ir bano w̃acënd Onesim, naw̃a baŋo. Ga fed këni gë Pol wël ko end Yesu Kërisët eŋ, w̃a ko do hi ko mëŋ ɓëte këreceŋ. Ata Pol fel këŋo exo maỹi gër axwën arexëm Filemoŋ. Ỹëgw kayëta ijo ro eŋo karaxën Filemoŋ eŋo kaca gë eteɓan Onesim. Gayikwa angwën aŋo, xaɗëp ir naw̃ak in, asoron bano soronënd, ɓandëmar alaw̃ bano law̃ënd. Er sëƴali ko Pol gër kayëta aŋo ro in ex eɓalër ed ɓërëw̃ak end Kërisët el, aỹap ỹapëk ex canayand gër ɓanëkëra ɓandeɓën. Mëŋ ex Pol axara baŋo Filemoŋ eŋo kaca Onesim gë oɓal gayikako anëka hi baxo arëw̃ak end Kërisët ang mëŋ ak. Er ex gër akayëta in:
Ecëmar el do gë ecalen ed Filemoŋ el: 1-3.
End Onesim eŋ: 4-22.
Ofelar ol do gë cale ipelatar iŋ: 23-25.
1
Ecëmar el
1 Wëno Pol, ar fëra këno në end Yesu Kërisët an, wëno gë aɓaỹe Timote ki ỹëgwënëlind wëj Filemoŋ. Wëno mbaŋ ke ɓalënd endeƴ eŋ, wëj ar ɓar këne andiyen amat an.
2 Gër kayëta ijo ro, aɓar ɓar këmun wëj gë Apiya, imaỹe itoxari indeɓi iŋ, gë Arëŝip ar xel këmi hi enga endemat an, do gë ɓër gër Amara and hik gër iciw̃ indeƴ ɓën.
3 Faba ireɓi Kaxanu do gë Axwën Yesu Kërisët, yëlëlenun oyekax ol do gë oɓetak ol.
End aŋana aŋ do gë ekwëta ed Filemoŋ eŋ
4 Din këmi xwitand mi calen do këmo ŝëkwand Kaxanu ir xwën ke.
5 Awëlati wëlati këme mëne wëj mbaŋ xwëta këƴo Axwën Yesu, ɓëte mbaŋ ki ɓalënd end ɗek okëreceŋ ocandax eŋ.
6 Ga ɓar këne ako ekwëta edeɓat, anang nang këƴ ɗek er yek eƴëɓo din në end Kërisët in. Awa masinëlëɓo ngwa.
7 Wëno mbaŋ nëngandëra ke do mbaŋ xemën ke aŋana andeƴ aŋ. Aɓaỹe Filemoŋ, enimin okëreceŋ odanjëm ƴema këɓi ow̃ëkw oŋ në endeƴ.
End emëka ed Pol eŋ
8 Mëŋ ex, ga yël ke Kërisët or gapak ol, anëỹali anëỹali domi er ỹapëk eƴ di in, ɓari ame di na.
9 Er ỹapan ke mi kara mo kara ga nang këme ako gë aŋana hi këƴ. Wëno Pol, anëka xar këme ɓëte waca ke hi këme gër epëra në end Yesu Kërisët.
10 Axara këmi xarand end Onesim eŋ. Asëñiw̃ën iram hi ko elod yatir w̃a ko end Kërisët eŋ ro gër epëra.
11 Ɓakey ɓand xucak ɓaŋ, ofëcak abaxi rin na. Ɓarikan gërëgako, arin këɓo rin wëj gë wëno.
12 Anëka felëli këmo exo maỹili ado ga lëkër këmi mbaŋ.
13 Ɗek ỹandi baxe exo ɓayi gër ndam ro, exe dëcarand ang do ƴe rëcara wëj ak ang hi këme gër epëra në end Atëfëtan ak.
14 Ɓari gematak axe ñandi bana me di xarak axe wëlër exe na pere këdi këmi nëỹali eƴe din oyekax olo.
15 Ɓamat imëd fo ŝapër ban gë Onesim eŋun ketaxën din.
16 Ɓarikan gërëgako nëmëc xaɗëp hi ko. Imaỹe ind ki ɓal mbaŋ hi ko, axo bo ex na xaɗëp fo. Wëno gë pit ke ɓalënd endexëm eŋ xarak wëj doxi ɓalënd nëmëc gayik xaɗëp ireƴ exo. Ɓëte areƴ hi ko ga ɓar kën ako gër Axwën Yesu.
17 Awa angëmëne wëj gë wëno aɓar ɓar ke, kwëtayalo Onesim ang xwëtayadoƴe wëno ak.
18 Angëmëne aw̃enan w̃enan ki, wëno këƴe w̃ëkaɗ, do angëmëne ỹeỹ ỹomëxa ki na, wëno ki w̃aŝënëɗ.
19 Ata wëno Pol kë ỹëgwëlind gë ataxan andam aŋ dëŋ: wëno aw̃aŝën këmi w̃aŝën. Wëj aniyan andeƴ aŋ dëŋ ga ỹomëxa këƴe wa, ɓari ami pel na.
20 Eyo aɓaỹe, dëcale mondako në end Kërisët, ƴemënël emëkw edam el ga ɓar ke ako gër ndexëm.
21 Anang nang këme mëne aw̃a këƴ w̃a er këmi ỹëgwënëlind gër kayëta ijo ro in. Aye fëni ke mëne nëmëc er xara këmi in këƴ ri.
22 Gërëgako këñënanëxëye ɓëte aciw̃, yëla këme mëne aseɓët këne sëɓëtëli gayik Kaxanu ayakali këŋun yakali cale indewën iŋ.
Epelar el
23 Epafëras, imaỹe ind fëra kënëɓo në ereɓat në end Yesu Kërisët iŋ, aŝëma këŋun ŝëmand.
24 Aŝëma kënun ŝëmand ɓëte ɓër ɓar këmi andiyen ɓën: Marëk, gë Arisëtarëk, gë Demas do gë Luk.
25 Oyekax or Axwën Yesu Kërisët ol gil ex gër onden ondewën!