18
End eyëcar ed angol and Babilon eŋ
1 Ga xucak, wat këmo meleka iŝëxe ga fedaw ko elod gër orën. Panga indexëm iŋ itëm ebax do enjaran endexëm eŋ h̃oɓak ebar el.
2 Ata ko xeỹend: «Anëka yëcarëk, anëka yëcarëk Babilon in, angol atëm aŋ! Anëka hik eɗëg ed ɓëyël, gë emaỹi ed angoc añëŋënax and ex yo, do gë emaỹi ed acël añëŋënax and ex yo, gë emaỹi ed emacar eñëŋënax, do gë ecusëŝus end ex yo.
3 Mondako kë hi gayikako ɗek ɓenëng ɓend ɓela ɓeŋ aŝeɓ ŝeɓ këni eñac etëm endexëm eŋ ang ngoƴ fo. Ɓemun ɓend gër ebar ro ɓeŋ ari bani rind gë mëŋ eñac eŋ do ɓëfandëran ɓër gër ebar ɓën aŝotëraxën ŝotëraxën këno gë panga ind napul irexëm iŋ.»
4 Ata wël këme elod gër orën oniw̃ oŝëxe ga kë re: «Canin angol and Babilon aŋ, wën ɓër ex ɓulunda iram ɓën, këdi kën w̃endëra andamat gë Ɓëbabilon ɓën, do këdi këŋun fënga wën ɓëte kiti indeɓën iŋ.
5 Gayikwa ɓeñëŋënax ɓend Ɓëbabilon ɓeŋ asaỹar saỹarëk xali ƴaŋ gër orën, do Kaxanu axo kwëya ex na ɓetëmbak ɓeŋo.
6 Maŝayinëɓi ang banun rind ak. Cosinëɓi gë toro iŋ, ang banëɓi ŝosënd ɓën ɓëte ɓela ak. Maŝayinëɓi ɓakëlëbëd ɓaki ɓandixa ɓandeɓën ɓaŋ! Gë andëmba and banun rëmbënënd aŋ, dëmbëninëɓi ɓaki.
7 Ang baɓi nëngandërand në end enjaran endeɓën ak, do në end napul ireɓën ak, torolexëni mondako fo. Ang wëli bax napul ireɓën ak, wëli ex mondako fo toro indeɓën iŋ do gë edenitaran edeɓën el! Gayikako Ɓëbabilon ɓën are bani rend: “Ang emun etoxari fo ỹëpa këne, ane gi ex na asoxari aseɓëta seɓëta, ɓiyi din kata aɓo gi na.”
8 Mëŋ ex, akey amat fo këɓi fënga ɓetëm ɓeŋo: ecës el, gë odenitaran ok, gë enjo eŋ do enëɓi ɗap bëngënj gër angoɗux. Gayikwa Axwën Kaxanu ex ar gë panga itëm an, ar këɓi xiti an.»
9 Ɗek ɓemun ɓend gër ebar ɓend bax rind eñac gë angol and Babilon ɓeŋ, ɓemun ɓend baɓi nënganënd ñambëran ind gë mëŋ ɓeŋ, ases këni ỹana eni tesënd, arenita këni ỹana eni denitand në end endexëm and këni ỹana eni watënd okwëcën ond amëra andexëm aŋ.
10 Nacët ako këni ỹana eni kwëŝarand në end ga këni yëdand amëra andexëm aŋ, do eni dend:
«Oko etëm endako rako eŋo! Oko etëm endako rako eŋo, angol atëm aŋ!
Oko Babilon, wëj angol apangak aŋo!
Apëxëd amat fo rik h̃ataxënëguk kiti indeƴ iŋ!»
11 Ɓëfandëran ɓër gër ebar ɓën në etes exëni, në edenitara exëni në endexëm gayik ala ax bo ex na ga kë yëcënd opane odeɓën ok.
12 Opane oko er ebax: kaŋe, koɗi, oxaỹ oxëɓënaxik, oƴeri, ɓanjëm ɓand xaf-xaf, ɓanjëm ɓambarax, ɓanjëm ɓand gënd-gënd, ɓanjëm ɓand warëgeƴan, ɓëmok ɓënd otëx od gë otëñer onëngax do orëxër or fës këni gë oỹënga or ɓeñamb, do gë otëx okëɓënaxik. Opane oko er ebax ɓëte: ɓeɓër sap këni gë ƴawale, gë odun do ɓeɓër fës këni do gë oxaỹ oyekax or ỹër-ỹër.
13 Ɓëte opane oko er ebax: ogu onëngax ond këni w̃acënd kanel, angiri, ɓeɓëlamb, ɓëŝan ɓër këni w̃acënd mir, aŝururu ir xwëŝëna bani gë angiri, ngoƴ, ogu, pix, bële, ɓengaŝ, opeỹ, opanac, ocaret, okaɗëp do gë ɓandepëra.
14 «Ɓekëɓënaxik ɓend ỹandi baxi eƴ cot ɓeŋ
anëka ŝana ki do h̃awëta ki caw.
Ɗek ɓeɓër yek do xëɓënëk ɓën awew wew ki,
do din aƴ wat na.»
15 Ɓëfandëran ɓër ŝotëraxën këŋo ɓën,
nacët ako këni ỹana eni kwëŝarand,
ga yëda këni amëra and Babilon aŋ.
Ases këni ỹana eni tesënd,
arenita këni ỹana eni denitand
16 do eni dend:
«Oko etëm endako eŋo! Oko etëm endako eŋo!
Babilon, angol apangak aŋ, angol atëm aŋ
and bax ŝuɗand ɓanjëm ɓand xaf-xaf do gë ɓambarax aŋ
angol and bax ỹaŋënarand gë kaŋe,
gë oxaỹ oyekax do gë oƴeri aŋ!
17 Apëxëd amat fo xucak, napul ir go in nemik!»
Ɗek ɓëhëreli ɓër okuluŋ ɓën, ɗek ɓër këɓi w̃ëlarand okuluŋ ɓën, gë ɓër kë riyenind gë okuluŋ ɓën, do gë ɗek ɓër kë riyenind gër angwëngw ɓën xwëŝara këni nacët ako.
18 Axeỹ bani xeỹënd ga wat këni okwëcën ond amëra oŋ. Are bani rend: «Angol and fe wa hi bax ang angol atëm aŋo?»
19 Afanaya bani fanayand gë obar ok gër ogaf ga këni ses do ga këni renita mondako:
«Oko etëm endako eŋo! Oko etëm endako eŋo!
Angol atëm apangak and ŝotëraxën këno napul
xali ɓeta këni ɗek ɓër gë okuluŋ od gër angwëngw ɓën,
apëxëd amat fo xucak, ata hik ang ladawe fo!
20 Wën ɓër gër orën ɓën nëngandëraleŋun
gayik angol aŋo anëka yëcarëk!
Ɓëte wën ɓëw̃ënëk ɓën, nëngandëraleŋun
gë oparëxanda ok, do gë ɓëlaw̃ënel ɓën
gayik Kaxanu xitik angol aŋo
në end ga narëndëra këŋun!»
21 Ata meleka ifangak w̃eɗ ko angaỹ atiɓax and wëndër bax gë angaỹ and këni h̃oxixënënd eƴamb, do ga lap ko polo gër angwëngw, re ko:
«Wëj angol atëm and Babilon aŋo,
akëlëbëd amat fo këni lap mondako,
ɓëtëdin ala axi wat na.
22 Na gër ndeƴ, ɓët din ala aɓi wël na ɓësëmb ɓër ɓemangi, gë ɓëyul,
gë ɓëfarix ɓër ɓacëroti ba okereloŋ.
Na gër ndeƴ, ari ar ɓeỹ axo gi na,
ɓëte din na gër ndeƴ ekëɓër ed aŋoxixën and eƴamb ax wëli na.
23 Na gër ndeƴ, ɓëte din angoɓen and lambo ax wati na,
ofëna or ekana ax gi na.
Ɓëfandëran ɓëreƴ ɓën hi bax ɓër banëɓi ŝëkwënd gër ed ex yo gër ebar ro
do wëj baƴëɓi yifand ɗek ɓenëng ɓend ɓela ɓeŋ gë oɓanji oreƴ iŋ.
24 Ata ɗek ɓeŋo ki h̃atënëgu gayik oŝat or ɓëlaw̃ënel ɓër Kaxanu oŋ watik gër ndeƴ, oŝat or ɓëw̃ënëk oŋ, do gë oŝat or ɗek ɓër law̃ëra kënëɓi gër ebar ro oŋ.»