7
End ɓulunda ir Kaxanu eŋ
1 Ga xucak eŋo, wat këmëni omeleka onax ga xwëŝara këni gër oweɓët onax od ebar. Ɓën sëra bax oxoc onax or ebar oŋ këdi kë xoc, ax gi ex na gër ebar, ax gi ex na gër angwëngw, ax gi ex na në atëx.
2 Ata wat këmo gand apën-eñan meleka iŝëxe ga ko ŝëg end orën eŋ. Er lëkëya baxo nanganëme ir Kaxanu in, mëŋ ar ex aɓëngw an. Ga ko xeỹ këɓi rend omeleka onax od ŝëñëta baɓi eni nëxen ebar el do gër angwëngw ok:
3 «Këren dinan na eñëŋënax ebar el, gë angwëngw aŋ, gë ɓatëx ɓaŋ, xali mëni paỹ edin ed nanganëme el gër eƴiỹ ɓëriyenin ɓër Kaxanu, mëŋ ar xwën këɓo an.»
4 Ata wël këme yëgwe hi bani ɓër gë nanganëme ɓën: owëli këme gë ofëxw onax gë ɓënax ɗek gër ɓandëw̃ëra ɓand Ɓëyisërayel. Er hi bani ɓër gë nangënëme ɓën:
5 gër andëw̃ëra and Yuda, ɓela owëli epëxw gë ɓëxi
gër andëw̃ëra and Ruben, owëli epëxw gë ɓëxi
gër andëw̃ëra and Gad, owëli epëxw gë ɓëxi;
6 gër andëw̃ëra and Aser, owëli epëxw gë ɓëxi;
gër andëw̃ëra and Nefëtali, owëli epëxw gë ɓëxi;
gër andëw̃ëra and Manase, owëli epëxw gë ɓëxi.
7 Gër andëw̃ëra and Simewoŋ, owëli epëxw gë ɓëxi;
gër andëw̃ëra and Lewi, owëli epëxw gë ɓëxi;
gër andëw̃ëra and Isakar, owëli epëxw gë ɓëxi;
8 gër andëw̃ëra and Sabuloŋ, owëli epëxw gë ɓëxi;
gër andëw̃ëra and Yosef, owëli epëxw gë ɓëxi ɓër gë nanganëme;
gër andëw̃ëra and Beŋëŝame, owëli epëxw gë ɓëxi.
End amëxwër and gër lëngw ir Kaxanu eŋ
9 Ga xucak eŋo, wat këme amëxwër atëm and ɓela ɓër ekun ed ex yo, enëng end ex yo, ɓulunda ir ex yo do ɓela ɓër eyeƴan ed ex yo, ala axo kor dona eɓi pën. Axwëŝara xwëŝara bani gër lëngw ir ar ỹëpak gër añëpara and owun an, do gë lëngw ir anoɓo. Ɓocuɗ ɓopeŝax ŝuɗara bani do lëkayara bani ɓeniɗ.
10 Mondako bani xeỹënd: «Apexa aŋ gër Kaxanu ex, mëŋ ar xwën këɓo an, mëŋ ar ỹëpak gër añëpara and owun an, do gër anoɓo!»
11 Ata omeleka ok ɗek xwëŝara këni jeƴ añëpara and owun aŋ, gë ɓëxarëk ɓën do gë ɓeɓëɓëngw ɓeɓënax ɓën. Ata foxira këni eƴiỹ el ŋëŝ gër ebar gër lëngw ir Kaxanu.
12 Ga këno ŝale, këni rend: «Amen! Oɓetak ol, gë enjaran eŋ, gë orenik ol, ecëkwan el, gë or gapak ol, gë panga iŋ do gë ojaw̃ ok, Kaxanu, mëŋ ar xwën këɓo an, xwënëk din ir din! Amen!»
13 Na ex w̃ëka ke axarëk aɓat: «Noɓën ex wa ɓela ɓër gë ɓocuɗ ɓopeŝax ɓëjo? Feye wa xaniw këni?»
14 Yaka këmo: «Oko Ŝaca, wëj anang nang këƴ!» Ata re ko:
«Ɓën ex ɓër xaniwëk gër toro itëm ɓën.
Aneɓ neɓ këni ɓocuɗ ɓondeɓën ɓoŋ,
Awunëta wunëta këni gë oŝat or anoɓo oŋ.
15 Mëŋ xwëŝaxën këni
gër lëngw ir añëpara and owun and Kaxanu
do këno ŝalerand ciŝ wec gër Aciw̃ andexëm.
Ar ỹëpak gër añëpara and owun an këɓi xaxa gër ed lëg ko;
16 din aɓi kor na enjo, din aɓi tel na men;
oyat aɓi cor na, aƴëka aɓi di na.
17 Gayikwa anoɓo ex mërëxand ir gër ed ex añëpara and owun aŋ, këɓi ỹana eɓi kaɗacënd.
Aw̃ëla këɓi ỹana eɓi mëland gër ɓañësa, gër ed ex men ond aniyan.
Do Kaxanu eɓi pëxwëcënënd ɗek ongwën oŋ gër ɓangës ɓandeɓën.»