Tawureta Musa, Buk 1:
Dəkəcop da Doru
Moloku ma kəsɔkəs buk ba Musa bɔcɔkɔ-cɔkɔ: Dəkəcop
Buk bɔcɔkɔ-cɔkɔ ba Musa mbɛ aŋwe «Dəkəcop» mɔ buk ba kədɛm kəkur ka Kitabu ka Kanu bɔ. CəHebəre yati c’ancicəs bi «Dəkəcop». Buk mbɛ bementər nde mes fəp mɛyɛfɛ mɔ, ntɛ Kanu kɔ afum ŋanacop kəsumpər mes mɔ. Acicəs ŋayɔ mɔkɔ moloku mɛlarəm ma afum aŋɛ ŋanacicəs buk ba Dəkəcop mɔ, kɔ tɛm ntɛ anacicəs buk babɔkɔ mɔ. Alɔma ŋancɛm-cɛmnɛ a tɔlɔma yecicəs yokur yoloŋka nde Babilɔŋ yɔ, kəyɛfɛ ka meren masar camət-tin (600) haŋ kəbəp masar kəcamət (500) ta antakom Yesu-ɛ. Alɔma sɔ ŋawosɛ kəlaŋ kəkur, a Musa ecicəs səbuk saŋsɛ kəcamət: Dəkəcop da Doru, Kəwur Dacar, ALewy Aloŋnɛ, Kəlɔm ka aYisrayel kɔ Sariyɛ Səgbɔkərɛ kəyɛfɛ meren wul win masar maŋkəlɛ (1.400) kəbəp ka meren wul win masar maas (1.300) ta antakom Yesu-ɛ.
Buk ba Dəkəcop bɔntɔmpər moloku mɛtəksɛ mmɛ mɔyɔ dəkəcəmɛ dɔpɔŋ mɔ, mmɛ mɛŋmar kəloŋkanɛ ka alaŋ a Yesu Krist kəcərɛ ka mɛlpəs ma Kitabu ka Kanu: Kədɛm kəkur kɔ Kəfu mɔ. Buk bambɛ bəmentər ntɛ kəciya kəmbɛrɛ doru mɔ, kɔ kəfaŋ ka afum kəsɔtɔ ka wəyac. Tatɔkɔ tementər sɔ dɔpɔ da Kanu kəyac ka afum. Antam kənəŋk tatɔkɔ kədəŋk kəcɔkɔ-cɔkɔ teta Yesu (Dəkəcop 3.15) kɔ Kanu kəndɛrəm kəsɔŋ Abraham kəpocɛ ka afum a doru fəp pətɔt (Dəkəcop 12.3).
Teyer ta Moloku ma Buk Bambɛ
1-2, Aloku tɔkɔ Kanu kənalompəs doru, Adama kɔ Awa mɔ.
3-5, Aloku teta Adama kɔ Awa, kəciya kəŋan kɔ yuruya yaŋan.
6-9, Aloku teta Nuha kɔ kutup kəpɔŋ.
10-11, Asɔkəs tɔkɔ tɛnacepər tɛm ta Nuha kɔ Abraham dacɔ mɔ, kəlɛkɛnɛ teta kəlɔ kəŋeci ka Babɛl.
12-50, Aloku teta Abraham, kəlɔ kɔn disrɛ, kɔ tocop ta afum aka Yisrayel:
12-25, Aloku teyi ta Abraham kɔ wəran kɔn Sara.
21-28, Aloku teta Siyaka kɔ wəran kɔn Rebeka,
35, Aloku teta defi da Siyaka.
25-50, Aloku teta Yakuba, awut ɔn kɔ kəcepɛ kəŋan Kanaŋ nde Misira.
37-50, Aloku teta Isifu wan nwɛ Yakuba ɛnanaŋkanɛ kəbɔtər mɔ, kɔ tɔkɔ Isifu ɛnader pəyɔnɛ wəbɛ Misira mɔ.
Dəkəcop da Doru
1
Dəkəcop da Doru
1-11
Kɔ Kanu kəlompəs doru kɔ afum
1 Dəkəcop, kɔ Kanu kəwurɛ kɔm k'antɔf.
2 Tɛm tatɔkɔ antɔf ŋɛnayɔ fɛ teyi, kubump kənayi kəba kəroŋ. Mba Amera ŋa Kanu ŋɛnayi sɔ domun kəroŋ ŋocbum ŋi.
3 Kɔ Kanu kəloku: «Pəwaŋkəra peyi!» Kɔ pəwaŋkəra peyi.
4 Kɔ Kanu kənəŋk a pəwaŋkəra pentesɛ. Kɔ Kanu kəŋgbɛy pəwaŋkəra kɔ kubump.
5 Kɔ Kanu kəwe pəwaŋkəra «dɔsɔk», kɔ kəwe kubump «pibi.» Kɔ dɔfɔy deyi, kɔ bətbət beyi, kɔ tɔyɔnɛ dɔsɔk dɔcɔkɔ-cɔkɔ.
6 Kɔ Kanu kəloku sɔ: «Pəkuymɛ peyi, ntɛ tɔŋsɔŋɛ domun deyersɛnɛ mɔ!»
7 Kɔ Kanu kəyɔ kɔ pəkuymɛ peyi kɔ pɛŋgbɛy domun d'antɔf kɔ dakəroŋ, kɔ teyi tatɔkɔ.
8 Kɔ Kanu kəwe pəkuymɛ mpɛ «kɔm.» Kɔ dɔfɔy deyi kɔ bətbət beyi, kɔ tɔyɔnɛ dɔsɔk da mɛrəŋ.
9 Kɔ Kanu kəloku: «Domun ndɛ deyi kɔm tantɔf mɔ, doloŋkanɛ tofo tin, pəwosu peyi, powur, peyi takəroŋ!» Kɔ teyi tatɔkɔ.
10 Kɔ Kanu kəwe tofo towosu «antɔf,» kɔ kəwe mofo mmɛ mɛla domun mɔ «cəba.» Kɔ Kanu kənəŋk a tentesɛ tatɔkɔ.
11 Kɔ Kanu kəloku sɔ: «Antɔf ŋopoŋ pubuk, yika ŋa defet, kɔ tɔk yokom nyɛ yende yockom antɔf kəroŋ taciŋa mɔ! Yɔyɔ sɔ defet da yi!» Kɔ teyi tatɔkɔ.
12 K'antɔf ŋompoŋ pəbuk, kɔ yika yɔyɔ defet, kɔ tɔk yokom yɔyɔ defet da yi. Kɔ Kanu kənəŋk sɔ a tentesɛ.
13 Kɔ dɔfɔy deyi kɔ bətbət beyi, kɔ tɔyɔnɛ dɔsɔk da maas.
14 Kɔ Kanu kəloku sɔ: «Yomotər-motər yeyi dəpəkuymɛ, ntɛ tɔŋsɔŋɛ dɔsɔk dɛgbɛyɛnɛ kɔ pibi mɔ! Kɔ tɔyɔnɛ mɛgbɛkərɛ ma tɛm, dɔsɔk kɔ meren.
15 Yɔyɔnɛ yomotər-motər ya pəkuymɛ nyɛ yende yɔcsɔŋ antɔf pəwaŋkəra mɔ!» Kɔ teyi tatɔkɔ.
16 Kɔ Kanu kəwurɛ yomotər-motər mɛrəŋ kɔ kəndɛt yi. Pomot pɔpɔŋ pɛtasərnɛ dɔsɔk, kɔ pomot pɛfɛt pɛtasərnɛ pibi. Kɔ Kanu kəwurɛ cɔs kɔ kəndɛt.
17 Kɔ Kanu kəndɛt yomotər-motər nyɛ dəkɔm yɔcsɔŋ antɔf pəwaŋkəra.
18 Pomot pɔpɔŋ pɛtasərnɛ dɔsɔk, pomot pɛfɛt kɔ cɔs yɛtasərnɛ pibi, tɔsɔŋɛ pəwaŋkəra pɛgbɛyɛnɛ kɔ kubump. Kɔ Kanu kənəŋk a tentesɛ.
19 Kɔ dɔfɔy deyi, kɔ bətbət beyi, kɔ tɔyɔnɛ dɔsɔk da maŋkəlɛ.
20 Kɔ Kanu kəloku sɔ: «Yeŋesəm ya dəkəba yɛcsɛp dəromun. Bɛmp yɛcfɛlər-fɛlər kɔm tantɔf!»
21 Kɔ Kanu kəwurɛ sɛm yɔpɔŋ ya dəromun dokom dokom, kɔ yɛŋɛrəŋ-ŋɛrəŋ ya dəromun, kɔ domun doncop kəsɛp. Kɔ Kanu kəwurɛ sɔ bɛmp dokom dokom. Kɔ Kanu kənəŋk a tentesɛ.
22 Kɔ Kanu kəmpocɛ yi pətɔt, kɔ kəloku: «Nəyɔnɛ akombəra, nəla, nəlas domun da dəkəba, kɔ bɛmp, yɛla antɔf kəroŋ!»
23 Kɔ dɔfɔy deyi kɔ bətbət beyi, kɔ tɔyɔnɛ dɔsɔk da kəcamət.
24 Kɔ Kanu kəloku sɔ: «Antɔf ŋɔyɔ yeŋesəm dokom dokom, sɛm yɔcɔl, yeliŋɛ-liŋɛ, kɔ sɛm ya dəkulum, fəp fa yi kɔ dokom da yi!» Kɔ teyi tatɔkɔ.
25 Kɔ Kanu kəwurɛ sɛm ya dəkulum dokom dokom, yɔcɔl dokom dokom kɔ yeliŋɛ-liŋɛ fəp dokom dokom. Kɔ Kanu kənəŋk a tentesɛ.
26 Kɔ Kanu kəloku: «Awa, palompəs fum teyi tosu, wəwurɛnɛ kosu, nwɛ endetasərnɛ lop ya dəkəba, bɛmp ya darenc, yɔcɔl kɔ yeliŋɛ-liŋɛ ya dəntɔf fəp mɔ!»
27 Kɔ Kanu kəsɛl afum
ntɛ tɔŋsɔŋɛ ŋawurɛnɛ kɔ nkɔn mɔ,
kɔ kəsɛl ŋa ŋawurɛnɛ kɔ nkɔn Kanu yati.
Kɔ kəsɛl ŋa wərkun kɔ wəran.
28 Kɔ Kanu kəmpocɛ ŋa pətɔt, kɔ kəloku: «Nəyɔnɛ akombəra, nəla, nəlas antɔf, nəboc antɔf tɛfaŋ tonu! Nətasərnɛ lop ya dəkəba, bɛmp nyɛ yɛŋfɛlər darenc mɔ, sɛm kɔ yeliŋɛ-liŋɛ ya dəntɔf fəp.»
29 Kɔ Kanu kəloku: «Isɔŋ nu yika nyɛ yɔyɔ defet dakayi mɔ, kɔ yokom ya tɔk. Yɔyɔnɛ nu yeri.
30 Sɛm ya dəntɔf, bɛmp ya darenc, yɛfɛlər-fɛlər ya darenc, kɔ yeliŋɛ-liŋɛ ya dəntɔf, ca fəp nyɛ yeŋesəm mɔ, isɔŋ yi dəmnɛ yika yobuk yɔyɔnɛ yi yeri.» Kɔ teyi sɔ tatɔkɔ.
31 Kɔ Kanu kənəŋk a mes mɔkɔ ɛnayɔ mɔ fəp, mɔtɔt dəm mɛnayi. Kɔ dɔfɔy deyi kɔ bətbət beyi, kɔ tɔyɔnɛ dɔsɔk da camət-tin.