49
Kətolanɛ ka Yakuba awut ɔn wəco kɔ mɛrəŋ
1 Kɔ Yakuba ewe awut ɔn, k'oloku:
«Nəloŋkanɛ iloku nu tɔkɔ tendeder nu kiriŋ mɔ.
2 Nəloŋkanɛ, nəcəŋkəl im awut a Yakuba!
Nəcəŋkəl Yisrayel papa konu!
3 Ruben, məna coco cem,
məna nwɛ inakom
tɛm ntɛ inayɔ fənɔntər mɔ:
Məncepər awɛnc əm aŋa
tokom, kɔ fənɔntər.
4 Məyeŋk pəmɔ domun ndɛ dɛŋyɛksɛ dəkəŋgbɔkɔ mɔ,
mba məfɔdesɔyɔnɛ wəkiriŋ,
Bawo mənapɛsɛ dəkəfəntərɛ da papa kam,
Mənayik-yikəs kəfənc kem kəpɛsɛ ka ki, kɔ wəran kem wəkin.
5 Simeyɔŋ kɔ Lewy dɛwɛnca dɔ ŋayɔ:
Ŋa ŋantəŋnɛ, ŋasek kəkɔyɔ pəlɛc.
6 Ala, ifaŋ fɛ kənɔŋkəl tɛŋkəndəm taŋan!
Ta mɛcɛm-cɛmnɛ mem mɛtəŋnɛ nde ŋantəŋnɛ kəbəpɛnɛ mɔ!
Bawo mɛtɛlɛ maŋan disrɛ, ŋandif fum.
Kəwosɛ kəŋan disrɛ, kɔ ŋancopu-copu mura bənta.
7 Intolanɛ mɛtɛlɛ maŋan pəlɛc, bawo mɛmbɛk pɛləsər.
Intolanɛ pəlɛc deyeŋki bəkəc daŋan, bawo dɔfɔyɔnɛ nɔnɔfɔr.
Indeyerəs ŋa atɔf ŋa Yakuba,
Indesamsər ŋa atɔf ŋa Yisrayel.
8 Yuda, məna, awɛnc əm aŋa ŋandeyek-yekəs əm.
Məndesumpər aterɛnɛ am cərɔbɔ.
Kɔ awɛnc əm aŋa ŋandecəp am səbomp fɔr yam kiriŋ.
9 Yuda, kusunuŋku kəwut kɔ məyɔnɛ.
Dəkəwatəri-watəri wɛsɛm wam məyɛfɛ, wan kem!
Nkɔn oŋnut wɛcək, pəfəntərɛ pəmɔ kusunuŋku.
Pəmɔ kusunuŋku kəran: An'ɛntam ki kəyekti ta kəfaŋ-ɛ?
10 Kəgbo ka dɛbɛ kəfɔde kəcbɔlɛ Yuda,
kəgbo ka dɛbɛ kəndeyi yuruya yɔn dəwaca,
haŋ tɛm ntɛ wəka kəgbo kaŋkɔ yati endeder mɔ,
wəkɔ afum fəp ŋandeyi dəntɔf mɔ.
11 Nkɔn (Yuda) ende pəckot sɔfale sɔn dəŋgbɔŋkəlɔ ya wɛn,
pəkot wan ka si nde kətɔk ka wɛn,
Ende pəcyak yamos yɔn dəwɛn,
kɔ burumus bɔn, dəməncɔncɔ ma yokom ya wɛn.
12 Member mendesɔŋɛ kɔ fɔr kəyimbərɛ,
Mɛsɛ ma wana mendefertər əm sek.
13 Kɔ məna Sabulon, kəba kəsək məndendɛ,
nde cibil cəndeyɔ kətənta mɔ.
Cələncər ca atɔf ŋaŋɔkɔ cəndewɔkəl haŋ Sidoŋ.
14 Isakar, məna sɔfale səpɔŋ sɔ məyɔnɛ,
nsɛ səŋfəntərɛ gbɔrɛ mɛrəŋ dacɔ mɔ.
15 Pənəŋk a kəfo kaŋkɔ eyi kəŋesəm mɔ kəntesɛ,
k'atɔf ŋɔmbɔt.
Pətirmi kumunt padəndəsər kɔ pɛsarɛ,
Yɛbəc ya dacar y'endeyi.
16 Dan, endeyɔnɛ afum ɔn wəbɛ.
Pəmɔ kusuŋka kəlɔma cusuŋka cəlpəs ca Yisrayel cəkɔ.
17 Dan, endeyi pəmɔ abok nŋɛ ŋeyi dɔpɔ mɔ,
aŋkisin nŋɛ ŋeyi dɔpɔ kəsək mɔ.
Abok nŋɛ ŋɛŋaŋ bənta ya afəlɛs,
a tɔsɔŋɛ wəyɛksɛnɛ ka ŋi kətɛmpɛnɛ mɔ.
18 Iŋgbɛkər əm amera MARIKI, a məndeyac im!
19 Kadu, kənay kəndepaŋnɛ kɔ
pəyɛfɛ pəcəmɛ ŋa darəŋ kəbɛləs.
20 Ndena Asɛr, yeri yoboŋu yendela di.
Antɔf ŋam ŋende ŋɔcsɔŋ yeri nyɛ pəmar yɔyɔnɛ yeri y'abɛ mɔ.
21 Naftali, were w'ɔyɔnɛ nwɛ weyi kiyi ka wi, ta tes o tes toŋkotərnɛ wi mɔ.
Ende pəckoməs awut atɔt.
22 Isifu, popoŋ pa kətɔk kəkom pɔyɔnɛ,
Popoŋ pa kətɔk kəkom nkɛ kəcəmɛ kəŋgbɔkɔ kəsək mɔ,
wara wa ki wetilsərnɛ damba.
23 Ŋandəktər kɔ, kɔ ŋampɛn.
Apɛnɛ mbəncəran ŋanayɔnɛ ayɛfərɛnɛ am.
24 Mba ambəncəran ŋɔn ŋende ŋɛtəŋnɛnɛ kɔ nkɔn sərka.
Anacaŋəs waca wɔn
kətam ka Kanu kɔ fənɔntər fa Yakuba dəntɔf.
Ɔyɔnɛ wəkɛkəs kɔ togbu pa aka Yisrayel.
25 Tewe ta Kanu ka papa kam, nkɛ kəyɔnɛ wəmar kam mɔ,
tewe ta Kanu nkɛ kəntam mes fəp ma doru mɔ, nkɛ kəndepoc'am mɔ:
Kəpocɛ pətɔt nkɛ kəndeyɛfɛ darenc mɔ,
kəpocɛ pətɔt nkɛ kəŋyɛfɛ dəntɔf mɔ,
kəpocɛ pətɔt ka awut alarəm kɔ yɔcɔl yɛlarəm.
26 Kətolanɛ nkɛ papa kam ontolan'am mɔ,
kəncepər kətolanɛ pətɔt ka aŋɛ ŋaŋkom im mɔ,
haŋ dəkələpsər da mɔrɔ ma doru o doru.
Kətolanɛ pətɔt kaŋkɔ kəyi Isifu dəromp,
dəndo domp dacɔ da Isifu
nwɛ ɔyɔnɛ wəbɛ ka awɛnc aŋa mɔ!
27 Beŋyamin, kalma k'ɔyɔnɛ nkɛ kəŋwatəri-watəri mɔ.
Bətbət kəwatəri-watəri wɛsəm wa ki,
dɔfɔy, pəyerəs yɔsɔtɔ ya ki.»
28 Awut akaŋɛ ŋayɔnɛ cusuŋka wəco kɔ mɛrəŋ ca Yisrayel. Moloku mamɛ mɔ kas kəŋan ɛnaloku ŋa, ntɛ onctolanɛ ŋa mɔ. Yakuba ɛnatolanɛ ŋa nwɛ o nwɛ kɔ kətolanɛ kɔn taciŋa.
Defi da Yakuba
29 Ntɛ Yakuba elip kətolanɛ awut ɔn mɔ, k'osom ŋa: «Intas kəbəp atem em aŋɛ ŋafi mɔ. Nəwup im kɔ papa kem aŋa, nde kufu kəŋkɔ kəyi nde dalɛ da Hɛfəroŋ wəHewy mɔ,
30 nde kufu nkɛ kəyi dalɛ da Makpela, Mamre kəsək, nde atɔf ŋa Kanaŋ. Dalɛ dadɔkɔ dɔ Abraham ɛnaway nnɔ Hɛfəroŋ eyi mɔ, pəyɔnɛ di dəkəwupɛnɛ da afum ɔn.
31 Difɔ anawup Abraham kɔ wəran kɔn Sara, difɔ anawup Siyaka kɔ wəran kɔn Rebeka, difɔ inawup sɔ Leya wəran kem.
32 Dalɛ kɔ kufu nkɛ kəyi di mɔ, Abraham ɛnaway di aHewy dəwaca.»
33 Ntɛ Yakuba elip kəsom awut ɔn mɔ, k'ɛfəntərɛ dəkəfənc. K'eŋgbiŋ kifir k'ɔnɔŋkəlɛnɛ atem ɔn aŋɛ ŋanafi mɔ.