8
Yesuɛ mɔ́ adé syánē prisɛ
ambáámbáa a melɛ̌ mékɔ̄ɔ̄lē
1 Atɔ́n áde sékooʼɛ́ ahɔ́b ádíi nɛ́n; dewóó ene ndín e prisɛ ambáámbáa awě adyɛɛ́ é ekáá émbáá é atii dé nkamlɛn á Dyǒb á Ngum ámīn.
2 Abɛnleʼ Dyǒb wɛ́ɛ bwěm ábě éʼsáá éʼdíí á hǒm áde ákóó ebem é Dyǒb abɛ́. Sáŋ Dyǒbɛ mwěn mɔ́ɔ alóó échê ebem, saké baányoŋ.
3 Bépwɛde prisɛ ambáámbáa tɛ́ɛ́ âbɛ Dyǒb ndɛ ne mendɛ mé elém. Né-ɔɔ́, anɛ́n prisɛ ambáámbáa mɔ́mpē atə́ŋgɛ́né chǒm awóŋ éche ábɛɛ́ Dyǒb.
4 Bɔɔb-pɔɔ́, nzé émbɛ̄ nɛ́n bán ambɛ́ á nkǒŋsé, né éebáá prisɛ ne abɛ́ děn, áyə̄le nɛ́n beprisɛ bédé ábe bébage Dyǒb mendɛ ngáne mbéndé éhɛdɛɛ́.
5 Nsɔ́n ḿme ábê beprisɛ bébɛlɛɛ́ ńdíi nɛ́ɛ eʼchemléd ne ediídiŋgɛ éʼ mekan ḿme médé ádyōb. Debíí nɛ̂ áyə̄le nɛ́n, áde Mosɛɛ áhɔ́bé aá mɔ́lōoʼ ebem é Dyǒb, Dyǒb dénsīm mɔ́ etúu áte aá, “Nyín nɛ́n wɛ́ɛ mɔ́lōō chǒm ésyə̄ə̄l á yə̌l e échê ebem nyaa e nlóŋtéd eche ńlúmté wɛ á mbɔɔd mǐn.”
6 Boŋ bɔɔb, nsɔ́n ḿme prisɛ ḿme bébágé Yesuɛ ńtómé nsɔ́n ḿme ábê beprisɛ béʼ bɔɔ́d. Melemlem nɛ̂ dɔ́ɔ nchemtɛn ḿme Yesuɛ ápɛ́ɛ́né átîntê e Dyǒb ne ábē bad, ńtómé nchemtɛn méʼsō ḿme bêmpɛɛ́nné, áyə̄le nɛ́n, Dyǒb ábágé bad akag aá mɔ́ɔ̄bɛ̌ bɔ́ bwěm éʼ bwâm.
7 Nzé émbɛ̄ nɛ́n bán melɛ̌ méʼsō mênkwognéd âbɛl bad békobned áʼsō éʼ Dyǒb, melɛ̌ mémpēe méehɛdnad-taá.
8 Boŋ Dyǒb dénnyīn awusé ne ábē bad, anhɔ́b-pɛ aá,
“Mɛ Sáŋgwɛ́ɛ́ nhɔ́beʼ nɛ́n mɛɛ́ eʼpun éʼ bǐn éʼhúɛ
áde mɛ́mwɛ̄ɛ̄ melɛ̌ mékɔ̄ɔ̄lē
ne bad bé Israɛl
ne bad bé Juda.
9 Ḿmê melɛ̌ méebáá nɛ́ɛ melɛ̌
ḿme mémwɛ̄ɛ̄
ne ábāb betaa
áde ńchə́ŋgé bɔ́ á ekáá
boŋ mbídɛ́n bɔ́ á aloŋ á Egipto.
Bénkênhídté ḿmê melɛ̌.
Né-ɔɔ́, menhúd bɔ́ dǐd áyə̄l.
10 Dyǒb áhɔ́bé ámpē aá,
Mɛ Sáŋgwɛ́ɛ́ mɛ-ɛɛ́ nhɔ́beʼ.
Bɔɔb-pɔɔ́ melɛ̌ ḿme mɛ́mwɛ̄ɛ̄ ne bad bé Israɛl
á póndé echě ehúɛʼ áʼsō médíi nɛ́n:
Mǎbɛ̌l bébíí échêm mbéndé,
béwóŋ-ʼɛ nlém âhíd chɔ́.
Mɛ̌bɛ̄ ádab Dyǒb,
bɔ́-ʼɛ bɛ́bē ábêm bad.
11 Bɔ́ modmod éeyə́gédté waáb,
modmod éeláá-ʼaá mwǎnyaŋ nɛ́n aá ábíi Dyǒb,
áyə̄le bɔ́ moosyəə́l bɛ́bīī mɛ,
bootya bésad, kə́ə́ŋ ne bémbáá.
12 Mɛɛ́lagsɛ́n ḿmab mbéb,
méekamtɛ́n-naá ḿmāb mewusé.”
13 Ahɔ́b áde Dyǒb áhɔ́bɛɛ́ tə̂ŋgɛne melɛ̌ mékɔ̄ɔ̄lē, álûmteʼ nɛ́n bán abɛlé melɛ̌ mé nchun ńtómé póndé. Chǒm kéhéé éche étóme póndé, éche échune-ʼɛ, mwǎmpīn ḿ póndé éebáá ámpē ne abɛ́ děn.