2
ምን ካዋይ ዋ ሄዶይሳታኖኮክ ሴራ
1 ጎርታ ዱባንኮ ጣይ ኤብ፥ ኮ ካካለቱን ኤባታኖና ጋላታ እባዶ ዱባዉን፥ ዎኖላሉና ኦዶናት ካአቦን ዱባን ጎጎሌሮን ሻድሳራ፤
2 ህክና ካሩም አያናኮክ ግርና ቁሉማ ዱባይ፥ ኖጎዳና ጫልኢትይ ጎጎግርኖንያ።
3 ሂክ ካፋይሳሮ ዋካን ሆረ ካገጌላይስሮያ።
4 ኡሱ እባዶ ዱባ ጎጎፋይሮና ሩም ማላባኖ ቶስ ጎጎጌናዉን ዶታራ።
5 ዋ ኮ ካግራ፤ አደና ዋይና እባዶ ጠኤ ካዎጋርሳራ ኮ ግራ፤ ኡሱና እባዶ ካሌሮ የሱሳ ክርስቶሳያ።
6 እስኦቴሳ እባዶ ዱባን ዎዶ የላተ ስሳተ፤ ህክና ልክኪ ጎራታ ጎጌ ፋይና ካዋኮኒዕ ፈሎ ካቱሳሮ አቶናትያ።
7 አንና ሂካ አየሱን ካገጌላይስሮ ሰግረ ካፋራመሮ ኡሱማሌ አይዛብዉን ሩምና አማኖ ካአጋልስሳሮ ሌ ሹማመ፤ ሩም አዬስናራ ኳሬ፤ ጣራ ላኮአዬስናሮ።
8 ጎርታ ባባር ባንኤ ዱባ ኤንገና ዶጋማ ካሊ ኦቁሎየን ገነኖኦትሶ ኤለ ጦቂሳይረን ጎጎኤባናዉን ዶታራ።
9 ኡሱማሌ ሄለል እስኦትሶ ሁስሳይ ካዶትሳሮ ሳርስ ሀሳርሳተ ኳሬ መተ ሀራኣይደ ጎርቱን ዎርቂ ጎርቱን ዶክ አዉኣሎ ካሌሮ ሳርስጆሊ አሮኢሳዶ፤
10 አየሱን ጎአመን ኖ ዋ ሄዶይሳታና ካአማራ ሄለል ፈልን ኦዶትሳራን ፈሎ ኦኢዳኒዕ እስኦቴሳ ሀኢሳድሳተ።
11 ሄለልትቲ ጫልኢ አማኖይና እስ የራሳታኖ ሀአጋልሳቶ።
12 ሄለልትቲ ታእስላተ ጎጎሌቶን ኳሬ ጎጎአጋልስሶን ጎርቱን ባባርትት ጉት ኦዶናት ጎጎግሮን ፈኢ ላኮስስናሮ።
13 ኣላንቲና አዳመ ጣየ መጣመራ፤ ኤሰኮና ሄዋን መጣንተ።
14 አደና ካሶባመራ አዳመ ላኮዮ፤ ታሶባንተታና ጩባለቲ ታሌተታ ሄሌልትቲታ፤
15 ሀሌዎ ኳሬ ሄለልትቲ አማኖና ጌላንጀ፥ ቁሉማይና እስኦትሴ ሁስሳይደ ጎአታተ ይስ ኡሙላኖይ ፋይናታ።