34
Gbɛ̀ walaa dufunↄ
1 Dii bè Musanɛ: Ǹ gbɛ̀ walaa kɛ mɛ̀n plaa lán káakupↄnↄ bà, mɛ́ yã kɛ̀ kú à káakupↄ kɛ̀ ń wìnↄa kɛ̃ḿma.
2 Ǹgↄ̃ kú soru guu kↄngↄ. Ǹ didi Sinai kpiiia ǹ zɛ ma aɛ à mìsↄ̃ntɛ̃a.
3 Gbɛ̃ke tón mↄ́nyoro. Wàton gbɛ̃ke e gukea kpiii pìa sero. Baa sãa ke zù tón mↄ́ pↄ́ ble à gĩzĩro.
4 Musa gbɛ̀ walaa à mɛ̀n plaa lán káakupↄnↄ bà. À fɛ̀ɛ kↄngↄ idɛ'idɛ, ben à dìdi Sinai kpiiia à gbɛ̀ walaa mɛ̀n plaaa pìnↄ kũna a ↄzĩ lán Dii ònɛ nà.
5 Dii pìta tɛ́sukpɛ guu à zɛ̀ à saɛ, ben à a zĩnda tↄ́ sìsi.
6 Kɛ̀ Dii e gɛ̃ɛ à aɛ, à a tↄ́ sìsi à bè: Dii, Dii Luda wɛ̃ndadↄ̃nnɛri sùudeen ma ũ. Ma pↄↄ è fɛ̃ kpaaro, má gbɛ̃kɛ kↄ̃n náanɛo vĩ bíta.
7 Mɛɛ̀gↄ̃ gbɛ̃kɛɛ vĩ kↄ̃n gbɛ̃nↄo ai ń bori lɛ́mmɛ, mɛ́ ń yã zaaanↄ kɛ̃ńnɛ kↄ̃n ń taarinↄ kↄ̃n ń durunnↄo. Mↄde mɛɛ̀ tó taaridee bↄ pãro. Mɛɛ̀ denↄ yã zaaa wí ń nɛ́nↄ musu kↄ̃n ń dionↄ kↄ̃n ń swãkpɛɛnↄ kↄ̃n ń nasionↄo.
8 Musa dàɛ a puua à dↄnzi kɛ̀nɛ gↄ̃ↄ
9 à bè: Dii, zaakɛ ma n pↄnnaa è, ǹ gáwao. Baa kɛ̀ gbɛ̃ pìnↄ swã gbãa, ǹ sùu kɛwao kↄ̃n wa yã zaaanↄ kↄ̃n wa durunnↄo, ǹ wa sɛ́ n pↄ́nↄ ũ.
Luda bà kuuna kↄ̃n Isarailinↄ
(Bↄn 23:14-19)
10 Dii bè: Ma bà égↄ̃ kúaomɛ. Mɛ́ yãbↄnsaɛ kɛ a píngi wáa kɛ̀ gbɛ̃kee e a taka kɛ bori ke guu andunan zikiro. Borii kɛ̀ aↄ̃ↄ ligaaziinↄ é ma yãkɛna e, zaakɛ mɛ́ yã naasidee kɛao.
11 Àgↄ̃ yã kɛ̀ má òare gbã̀a kũna, mɛ́ pɛ́are Amↄrinↄa kↄ̃n Kanaanↄ kↄ̃n Itinↄ kↄ̃n Pɛrizinↄ kↄ̃n Ivinↄ kↄ̃n Yebusinↄo.
12 À làakari kɛ! Àton lɛdolɛ kɛ kↄ̃n bùsu kɛ̀ ée gaa gɛ̃n deenↄoro, lɛ àton takutɛɛ kpákpa a zĩndanɛro yãnzi.
13 À ń sa'okiinↄ gboro à ń tãa gbɛ̀nↄ wíwi à Asɛra línↄ zↄ̃zↄ̃.
14 Àton kúɛ tãanɛro, zaakɛ mamↄma Dii ma tↄ́n Nↄ̀sɛgↄ̃aanↄ, mɛɛ̀ nↄ̀sɛgↄ̃aanↄ kpá.
15 À làakari kɛ! Àton lɛ́dolɛ kɛ kↄ̃n bùsu pì deenↄoro, zaakɛ tó aↄ̃ↄe pãpãa kɛɛ ń tãanↄ yã musu, aↄ̃ↄe saa ooḿma, aↄ̃é a sísi à ń sa'onↄbↄ sóńyomɛ.
16 Àton nↄↄ sɛ́ a nɛ́nↄnɛ ń tɛ́ro, zaakɛ tó aↄ̃ nɛ́nↄgbɛ̃nↄↄ e pãpãa kɛɛ ń tãanↄ yã musu, aↄ̃é tó a nɛ́nↄ pãpãa kɛńyo se.
17 Àton mↄ̀ pi tãa ũro.
18 Àgae Burɛdi Sɛ́sɛ'ɛ̃zɛ̃sai zĩbaa kɛ. Àgae burɛdi sɛ́sɛ'ɛ̃zɛ̃sai só gurↄ swɛɛplaa mↄↄ kɛ̀ wè sísi Abibu guu lán má dìɛare nà, zaakɛ mↄↄ pì guun a bↄɛ Igipiti.
19 A daudunↄ nɛ́ ma pↄ́nↄmɛ ń píngi kↄ̃n a pↄ́kãde nɛ́kya káakunↄ ń píngi, zù ke pↄ́ ketenↄ.
20 Àgae zaaki nɛ́kya káaku bo kↄ̃n sãao. Tó ée boro, à à waa fĩ à dɛ. Àgae a daudunↄ bo. Gbɛ̃ke tón mↄ́ ma kiia ↄkoriro.
21 Àgae zĩi kɛ gurↄ swɛɛdo à kámma bo à gurↄ swɛɛplaadee zĩ, baa búwigurↄ ke pↄ́kɛ̃gurↄ.
22 Àgae Pↄ́kɛ̃na zĩbaa kɛ gurↄↄ kɛ̀ a na bura pↄ́ káaku kɛkɛnaa. Àgae Pↄ́dufublena zĩbaa kɛ wɛ̃̀ yãanaa.
23 Wɛ̃̀ kↄ̃n wɛ̃̀o gↄ̃gbɛ̃ píngi gae mↄ́ mamↄma Dii Isarailinↄ Luda aɛzĩ gɛ̃̀n aagↄ̃.
24 Mɛ́ pɛ́are boriinↄa mɛ́ a bùsu lɛ́ kaaraare. Gbɛ̃ke é a bùsu nii dɛ gurↄↄ kɛ̀ ée mↄↄ mamↄma Dii a Luda aɛzĩ wɛ̃̀ kↄ̃n wɛ̃̀o gɛ̃̀n aagↄ̃ro.
25 Àton pↄ́sɛsɛna kpáma lɛdo kↄ̃n sa'opↄ aruoro. Àton Banla sa'onↄbↄ diɛ guu dↄ̀aro.
26 Àgae gá mamↄma Dii a Luda ua kↄ̃n a bura pↄ́ káakunↄ. Àton blènɛ nↄ̀bↄ kuku kↄ̃n à da yↄ̃'ioro.
27 Ben Dii bè Musanɛ: Ǹ yã pìnↄ kɛ̃ takadan, zaakɛ ma bà kuunanyo kↄ̃n Isarailinↄ yãnↄmɛ.
28 Musa kú kↄ̃n Diio gwe ai gurↄ baplaa fãantɛ̃ kↄ̃n gwãavĩo pↄ́blena sai ímina sai. Ben Dii a bà kuunańyo yã mɛ̀n kurinↄ kɛ̃̀ gbɛ̀ walaa pìnↄa.
Musa uu tɛ́kɛna
29 Kɛ̀ Musa pìta Sinai kpiiia, à gbɛ̀ walaa mɛ̀n plaaa kɛ̀ doka kɛ̃a pìnↄ kũna a ↄzĩ. À dↄ̃ kɛ̀ a uu e tɛ́ kɛɛ aↄ̃ yã'ona kↄ̃n Diio yãnziro.
30 Kɛ̀ Aruna kↄ̃n Isarailinↄ à è ń píngi, à uu e tɛ́ kɛɛ, vĩa ń kũ wà sↄ̃zi.
31 Ben Musa ń sísi. Aruna kↄ̃n gbɛ̃nsinↄ ɛ̀ara wà mↄ̀ à kiia, ben à yã òńyo.
32 Beee gbɛra Isarailinↄ sↄ̃̀zi ń píngi, ben à yã kɛ̀ Dii dìɛnɛ Sinai kpiii musu òńnɛ píngi.
33 Kɛ̀ à yã òńnɛ à yã̀a, à sáta kù a uua.
34 Tó à gɛ̃̀ à yã o Diio, è sáta go lɛ à kpɛ́ à bↄ. Tó à bↄ̀, è yã kɛ̀ Dii dìɛnɛ o Isarailinↄnɛ,
35 ben aↄ̃è e kɛ̀ à uu e tɛ́ kɛɛ. Musa è ɛara à sáta kú a uua lɛ à kpɛ́ à gɛ̃ à yã o Diio.