2
Setãn Ayuba yↄ̃na gɛ̃̀n plaadee
1 Zĩkea malaikanↄ ɛ̀ara wà mↄ̀ wà zɛ̀ Dii aɛ, Setãn sↄ̃ↄ kú ń tɛ́. À zɛ̀ Dii aɛ,
2 ben Dii à là à bè: N bↄ mámɛ? À wèàla à bè: Mɛ́ɛ gaa mɛ́ɛ suu mɛ́ɛ likↄ̃aa zↄ̃ↄ anduna guumɛ.
3 Ben Dii bènɛ: N ma zↄ̀bleri Ayuba èↄ́? À sáa kú anduna guuro. Gbɛ̃ maaamɛ, à taari vĩro. À ma vĩa vĩ bensↄ̃ à gì yãzaakɛnazi. Baa kɛ̀ n ma swã vùmɛ, ma mↄ́nzi kpàzi pã, à kpɛ́ kuu taari sai ai tia.
4 Ben Setãn bènɛ: Ǹ kɛmɛ mà kɛnnɛ. Pↄ́ kɛ̀ gbɛ̃ vĩ píngi eé kpá a mìsina yãnzi.
5 Ǹ n ↄↄ bↄ ǹ pá à mɛ̀a ǹ gwa. Eé yã zaaa onnɛ.
6 Ben Dii bènɛ: Tↄ̀! Ma à nànnɛ n ↄzĩ, mↄde ǹ à wɛ̃̀ndi tó.
7 Setãn gù Dii aɛ, ben à bↄ̀gĩi zĩ̀ Ayubaa sɛna zaa à kɛ̀sɛa ai à gàa pɛ́ à mìdangura.
8 Ben Ayuba takaso sɛ̀ à gàa à vɛ̃̀ɛ tubura, èe a zĩnda waao.
9 À naↄ̃ bènɛ: Nɛ́gↄ̃ kpɛɛ kuu taari sai ai tian yↄ́? Ǹ yã zaaa o Ludanɛ ǹ ga.
10 Ben à bènɛ: Nɛ́ɛ yã oo lán nↄgbɛ̃ yↄ̃nkↄↄ bà. Wégↄ̃ à maaa ee Luda ↄzĩ wà gí à zaaa eziↄ́? Yã pìnↄ guu píngi Ayuba e durun kɛ a yã'ona guuro.
Ayuba gbɛ̃nnanↄ mↄna à kiia
11 Kɛ̀ Ayuba gbɛ̃nna gↄ̃ↄn aagↄ̃ↄnↄ kisia kɛ̀ à à lènↄ baaru mà, aↄ̃ baade bↄ̀ a bɛ aↄ̃ kↄ̃ kàkↄ̃a, ben aↄ̃ gàa wà sósobi kɛo aↄ̃ à làakari kpáɛnɛ. Aↄ̃ tↄ́nↄn yɛ̀: Temana gbɛ̃ Ɛlifaza, Sua gbɛ̃ Bilidada kↄ̃n Naamati gbɛ̃ Zofao.
12 Kɛ̀ aↄ̃ à wɛ̃ndɛ̃ kɛ̀ zã̀azã, aↄ̃ↄe à dↄ̃ro, ben aↄ̃ ↄ́ↄ dↄ̀, baade a uta gà à kɛ̃̀, ben aↄ̃ bùsu kↄ̀ wà fã̀ musu à kú ń mìa.
13 Ben aↄ̃ vɛ̃̀ɛo tↄↄtɛ gurↄ swɛɛplaa fãantɛ̃ kↄ̃n gwãavĩo. Aↄ̃ gbɛ̃kee e yãke ooro, zaakɛ aↄ̃ↄ è lán à nawɛ̃a kɛ̀ bíta nà.