38
Dii a kíkɛɛ ↄdↄana Ayubanɛ
1 Ben Dii yã sì Ayubala zàga'ĩa guu à bè:
2 Dé bé èe faasaiyã kaa ma ↄ̃ndↄ̃ↄlaa?
3 Ǹ fɛɛ ǹ zɛ lán nɛ́gↄ̃gbɛ̃ bà,
mɛ́ n la yãzi, nɛ́ wemala.
4 Kɛ̀ ma anduna kàɛ, ń kú mámɛ?
Tó ń dↄ̃na vĩ, ǹ omɛ.
5 Dé bé à à tↄↄtɛ lɛ́zɛkiinↄ lɛ̀?
Dé bé à bà yↄ̃̀a à gwà? À dɛ ń dↄ̃ↄ?
6 Bↄ́ bé à tↄↄtɛ kũna?
Dé bé à à ɛ̃ɛ dàɛ
7 gurↄↄ kɛ̀ gudↄna sↄsↄnɛnↄↄ e guda kɛɛ,
Luda malaikanↄ pↄnna wiii dↄ ń píngii?
8 Kɛ̀ ísiaa guu fↄ̃̀ à bↄ̀,
dé bé à zɛ́ tàtaàlɛɛ?
9 Ma ludambɛ luguu dànɛ pↄ́kãsãa ũ,
ma gusiaa yìnɛ bisa ũ.
10 Ma à lɛ́zɛkii dànɛ,
ma zɛ́nↄ tàtaàlɛ ma gbãnganↄ dàdan.
11 Ma bènɛ: Nɛ́gae ká kɛ̀ ǹton vĩàlaro,
n ísↄ̃kana gbãaanↄ é zɛ kɛ̀.
12 Zaa lán wà n i nà n yã dìɛ kↄngↄnɛↄ́?
N bↄkii ↄ̀dↄa gudↄnanɛ zikiↄ́?
13 Gudↄna è anduna kũ a lɛ́a
lɛ à gbãkɛ lán bisa bà à zaakɛrinↄ kwɛ́ɛ.
14 È anduna liɛ kodekode lán kwã kpɛɛ bà,
kpiiinↄ è bↄ gupuraaa lán uta yiyikↄ̃ana bà.
15 È gí zaakɛrinↄnɛ aↄ̃ ń gusia yã kɛ,
è ń ↄ sɛna musu ɛ́'ɛ.
16 N gaa ai zaa ísia íbↄkiinↄaↄ́?
N táa ò í lↄ̀ pì gãnulɛa zikiↄ́?
17 Wà gaa kpɛɛlɛ gbànↄ ↄ̀dↄannɛↄ́?
N gɛ̀wãa gãnulɛnↄ èↄ́?
18 N anduna yàasa lɛ́ tàasi kɛ̀ↄ́?
Tó ń yã beeenↄ dↄ̃ píngi, ǹ omɛ.
19 Gupuraa bɛ zɛ́n máa?
Ń gusiakukii dↄ̃ↄ́?
20 Nɛ́ fↄ̃ ǹ gáńyo ń bùsun-ↄ́?
Ń ń bɛ zɛ́ dↄ̃roo?
21 Ń dↄ̃ sɛra, à dɛ wà n i gurↄↄ beeea!
À dɛ n wɛ̃̀ lɛ́ vĩroo?
22 N gɛ̃ làasi kɛ̀ ma gu yĩi kàɛn-ↄ́?
N ma lougbɛ dↄ̃̀ èↄ́?
23 Mɛɛ̀ utɛ ai nawɛ̃akɛgurↄↄa,
mɛɛ̀ gbarɛ zĩ̀kagurↄↄ zĩ.
24 Gupuraa è bↄ mámɛ à dagulaa?
Ɔfãntɛ̃bↄɛ kpa ĩa è bↄ à da tↄↄtɛla diamɛ?
25 Dé bé è zɛ́ bↄ lou bítanɛ?
Dé bé è guu para lapatananɛ?
26 È mↄdↄ pisi tↄↄtɛ kɛ̀ gbɛ̃kee kúnlooa,
baa gbáa kɛ̀ gbɛ̃ntee kúnloo.
27 È bɛzia kↄ̃n taagaao yĩi kũ,
è tó sɛ̃̀ bↄɛ gwe.
28 Lou de vĩↄ́?
Dé bé à kpíi ì?
29 Dé nɛ́'isↄn lougbɛ è bↄn?
Dé bé è sukaa i gbasa à kpáa?
30 Dé bé è tó í li à kɛ gbɛ̀ ũ
è tó ísia musu kɛ kpàkpaakpa?
31 Nɛ́ fↄ̃ ǹ sↄsↄnɛ mɛ̀n swɛɛplaaanↄ yi ǹ kakↄ̃aↄ́?
Nɛ́ fↄ̃ ǹ sↄsↄnɛ flɛ̃ngonↄ fãakↄ̃aↄ́?
32 Nɛ́ fↄ̃ ǹ mↄgaakiblee bↄ a gurↄↄaↄ́?
Nɛ́ fↄ̃ ǹ guu ↄdↄa sↄsↄnɛ ko nɛ́dande kↄ̃n a nɛ́nↄnɛↄ́?
33 Ń musu pↄ́nↄ doka dↄ̃ↄ́?
Nɛ́ fↄ̃ ǹ ń kpá kpatan tↄↄtɛlaↄ́?
34 Nɛ́ fↄ̃ ǹ lɛ́ zu louzi lɛ à sisi
à í bↄ à n yakuↄ́?
35 Nɛ́ fↄ̃ ǹ loupinanↄ gbarɛ aↄ̃ da zɛ́n yↄ́?
Aↄ̃è mↄ́ wà bennɛ wáɛ kɛ̀ↄ́?
36 Dé bé à ↄ̃ndↄ̃ↄ dà ludambɛ luguunↄnɛ à lou maa?
Dé bé à dↄ̃na kpà sukaaa à kpáa?
37 Dé ↄ̃ndↄ̃ↄ bé à kà à ludambɛ luguunↄ naroo?
Dé bé eé fↄ̃ à musu orozãnↄ kpákaziaa?
38 Tó à í bↄ̀ɛ, bùsu kori è gↄ̃ bↄtↄnga ũ,
làkpakↄ̃ↄnↄ è nanakↄ̃a.
39-40 Ḿbe nɛɛ̀ tofe ká músudaanɛ,
tó èe nↄ̀bↄ dãdãa dàko guuↄ́?
Ḿbe nɛɛ̀ pↄ́blee kpá à nɛ́nↄa aↄ̃ kã
gurↄↄ kɛ̀ aↄ̃ↄ kú ń tòn-ↄ́?
41 Tó gbáa kãnkãna nɛ́nↄↄ e ligaligaa guuzi,
aↄ̃ↄe lɛ́ zuu Ludazi kɛ̀ pↄ́blee kɛ̃̀sãḿma yãnzi,
dé bé è pↄ́blee kpáḿmaa?