17
Gbáa kãnkãnanↄ annabi Ilia gwana
1 Tisibɛ gbɛ̃ Ilia bↄ̀ a bɛ Giliada bùsun à gàa à Ahabu lè à bè: Kↄ̃n Dii Isarailinↄ Luda kɛ̀ mɛ́ɛ dↄↄzi kuunao, zaa wɛ̃̀ kɛ̀a kpíi é kpáro, lou é maro, séde gurↄↄ kɛ̀ má ò baasiro.
2 Ben Dii yã sù Iliaa à bè:
3 Ǹ fɛɛ ǹ gá ↄfãntɛ̃bↄɛ kpa, ǹ utɛ Kɛriti swawɛɛn Yoda baa kãa kpa.
4 Nɛ́gↄ̃ swaa pì í mii. Má dìɛ gbáa kãnkãnanↄnɛ aↄ̃gↄ̃ n gwaa gwe.
5 Ben à gàa à kɛ̀ lán Dii ònɛ nà, à vɛ̃̀ɛ Kɛ riti swawɛɛn Yoda baa kãa kpa.
6 Gbáa kãnkãnanↄ ègↄ̃ mↄↄnɛ kↄ̃n burɛdio kↄ̃n nↄ̀bↄo kↄngↄ kↄ̃n uusiɛo, ben ègↄ̃ swaa pì í mii.
Zarɛfa gyaanↄↄ Ilia gwana
7 Gurↄ plaaa gbɛra swaa pì í bàba kɛ̀ lou e ma bùsu pìnlo yãnzi.
8 Ben Dii yã sùa à bè:
9 Ǹ fɛɛ ǹ gá Zarɛfa Sidↄ̃ bùsun, ǹgↄ̃ kú gwe. Ma gyaanↄ ke dìɛ àgↄ̃ n gwaa gwe.
10 Ben à fɛ̀ɛ èe gaa Zarɛfa. Kɛ̀ à kà wɛ́tɛ pì saɛ, à gyaanↄ ke lè, èe yàka wɛɛ gwe. Ben Ilia lɛ́ zù gyaanↄↄ pìzi à bè: Ǹ gá mↄ́mɛ kↄ̃n ío, baa féte, mà mi.
11 Kɛ̀ èe gaa tↄ́, Ilia ɛ̀ara à lɛ́ zùzi à bè: Ǹ mↄ́mɛ kↄ̃n burɛdi kusuo dↄ.
12 Ben nↄgbɛ̃ pì bènɛ: Kↄ̃n Dii n Luda kuunao, baa burɛdi má vĩro, séde wísiti ↄkũ doo kɛ̀ gↄ̃̀ gbaka guu kↄ̃n nↄ́sio féte tùu guu baasiro. À yàkan mɛ́ɛ wɛɛ kɛ̀, lɛ mà tá bɛ mà pↄ́blee kɛo, wà ble kↄ̃n ma nɛ́o wàgↄ̃ ga dãa.
13 Ben Ilia bènɛ: Ǹton tó vĩa n kũro. Ǹ gá kɛ lán ń ò nà, mↄde ǹ burɛdi kɛo féte ǹ mↄ́omɛ gĩa, nɛ́ gbasa ǹ n pↄ́ kɛ kↄ̃n n nɛ́o.
14 Zaakɛ Dii Isarailinↄ Luda bè, wísiti gbaka pì égↄ̃ da koriro, bensↄ̃ nↄ́si é yãa tùu pìnlo ai gurↄↄ kɛ̀ eé tó lou ma bùsu pìn.
15 Gyaanↄↄ pì gàa à kɛ̀ lán Ilia ònɛ nà, ben pↄ́blee mↄ̀ḿma ai gurↄ ũgbangba, àpi kↄ̃n a bɛdeenↄ kↄ̃n Iliao.
16 Wísiti e yãa gbaka pìnlo, bensↄ̃ nↄ́si e yãa tùu pìnlo, lán Dii ò Ilia gãzĩ nà.
17 Beee gbɛra nↄgbɛ̃ bɛdee pì nɛ́ e gyãa kɛɛ. Kɛ̀ gyãa gbãaa kpà maamaa, ben à wɛ̃̀ndi bↄ̀.
18 Ben nↄgbɛ̃ pì bè Ilianɛ: Luda gbɛ̃, bↄ́ bé à wa ka kɛ̀ n mↄmazii? N mↄ ma durun dↄ Ludan lɛ à ma nɛ́ dɛ yãnzin yↄ́?
19 Ben Ilia bènɛ: Ǹ n nɛ́ pì kpáma. Ben à nɛ́ pì sì nↄgbɛ̃ pì ↄzĩ à dìdio kpɛ́ musu guu kɛ̀ à pìtan. À à dàɛ a gádoa gwe,
20 ben à wii pɛ̀ Diizi à bè: Dii ma Luda, ḿbe ń tò gyaanↄↄ kɛ̀ ma pita à bɛ nɛ́ gà n pↄsiaa kpàziↄ́?
21 Ben à dàɛ à a zĩnda pòro nɛ́gↄ̃gbɛ̃ pìla gɛ̃̀n aagↄ̃ à wii pɛ̀ Diizi à bè: Dii ma Luda, ǹ tó à wɛ̃̀ndi ɛara à su à mɛ̀ guu.
22 Dii Ilia wiipɛna mà, ben wɛ̃̀ndi ɛ̀ara à sù nɛ́ pìa à fɛ̀ɛ.
23 Kɛ̀ Ilia nɛ́gↄ̃gbɛ̃ pì sɛ̀ à pìtao, à gɛ̃̀o kpɛ́n, ben à à kpà à daa à bè: Ǹ gwa, n nɛ́ pì wɛ̃̀ndi sù!
24 Ben nↄgbɛ̃ pì bè Ilianɛ: Má dↄ̃ sa kɛ̀ Luda gbɛ̃n n ũ. Dii yã kɛ̀ bↄ̀ n lɛ́n nɛ́ yãpuraamɛ.