Luda yã takada kↄ̃n Bokobaru yão 1 KINANƆ 21

Nabↄti geepi líkpɛ

1 Beee gbɛra Yɛzɛrili gbɛ̃kee kuu, à tↄ́n Nabↄti. À geepi líkpɛ vĩ gwe Samaria kí Ahabu bɛɛ saɛ. 2 Ben Ahabu bènɛ: Ǹ n geepi líkpɛ kpáma mà kɛ dò kara ũ, zaakɛ à kú ma bɛɛ saɛ. Mɛ́ geepi líkpɛ kɛ̀ à maa dɛ beeela kpámma à gɛ̃ɛ ũ. Tó ń yezi, mɛ́ fĩa bonnɛ kↄ̃n kondogio lán à kũ̀ nà. 3 Ben Nabↄti bè Ahabunɛ: Kai, eé sí kɛro! Mɛ́ fↄ̃ mà túbi kɛ̀ ma dezinↄ tòmɛɛ kpámmaro. 4 Ben Ahabu nↄ̀sɛ yàka, à tà bɛ kↄ̃n pↄsiaao kɛ̀ Yɛzɛrili gbɛ̃ Nabↄti bènɛ é túbi kɛ̀ a dezinↄ tòare kpáaro yãnzi. Ben à dàɛ a gádoa à aɛ dↄ̀ gũ̀a à gì pↄ́ blezi. 5 À naↄ̃ Yɛzɛbɛli mↄ̀ à à là à bè: Bↄ́ bé à n le n uu sìsi, nɛ́ɛ pↄ́ bleroo? 6 Ben à wèàla à bè: Ma bè Yɛzɛrili gbɛ̃ Nabↄtinɛ à a geepi líkpɛ kpáma, mɛ́ fĩa bonɛ kↄ̃n kondogio. Tó geepi líkpɛ pãnden à yezi sↄ̃, mɛ́ kpáa à gɛ̃ɛ ũ. Ben à bè é kpámaro. 7 Ben à naↄ̃ Yɛzɛbɛli bènɛ: N Isarailinↄ kí ina yãkɛnan yɛ̀ↄ́? Ǹ fɛɛ ǹ pↄ́ ble kↄ̃n pↄnnaao, mɛ́ Yɛzɛrili gbɛ̃ Nabↄti geepi líkpɛ sínnɛ.

8 Ben à takadanↄ kɛ̃̀kɛ̃ kↄ̃n Ahabu tↄ́o à à tambari lɛ̀a, à kpã̀sãkpãsã gbɛ̃nsinↄ kↄ̃n kínɛ kɛ̀ aↄ̃ↄ kú Nabↄti wɛ́tɛ guunↄnɛ. 9 Takada pìnↄ guu à bè: À lɛ́yigurↄↄ diɛ à à kpàakpa kɛ. À vɛ̃ɛkii maaa kpá Nabↄtia gbɛ̃nↄ tɛ́ 10 à gbɛ̃ ginanↄ wɛtɛ gↄ̃ↄn plaa à ń káɛ à aɛ, lɛ aↄ̃ yã dia wà be à Luda kↄ̃n kínao tↄ́ zaaa sì. À à kũ à bↄo wɛ́tɛ kpɛɛ, é à pápa gbɛ̀o à dɛ. 11 Ben Nabↄti wɛ́tɛ gbɛ̃nsinↄ kↄ̃n kínɛnↄↄ kɛ̀ lán Yɛzɛbɛli ò takada kɛ̀ à kpã̀sãńnɛnↄ guu nà. 12 Aↄ̃ lɛ́yigurↄↄ dìɛ, ben aↄ̃ vɛ̃ɛkii maaa kpà Nabↄtia gbɛ̃nↄ tɛ́. 13 Ben gbɛ̃ gina gↄ̃ↄn plaaa pìnↄ mↄ̀ wà vɛ̃̀ɛ à aɛ, aↄ̃ yã dìa gbɛ̃nↄ wáa wà bè à Luda kↄ̃n kínao tↄ́ zaaa sì. Ben wà à kũ̀ wà bↄ̀o wɛ́tɛ kpɛɛ wà à pàpa gbɛ̀o wà dɛ̀. 14 Ben wà lɛ́kpãsã kɛ̀ Yɛzɛbɛlinɛ wà bè, wà Nabↄti pàpa gbɛ̀o wà dɛ̀.

15 Kɛ̀ Yɛzɛbɛli mà wà Nabↄti pàpa gbɛ̀o wà dɛ̀, ben à gàa à bè Ahabunɛ: Ǹ fɛɛ ǹ gá Nabↄti geepi líkpɛ kɛ̀ à gìonnɛɛ pì sí n pↄ́ ũ, zaakɛ à kuu dↄro à gà. 16 Kɛ̀ Ahabu mà Nabↄti gà, ben à fɛ̀ɛ èe gaa lɛ à à geepi líkpɛ sí a pↄ́ ũ.

17 Ben Dii yã sù Tisibɛ gbɛ̃ Iliaa à bè: 18 Ǹ fɛɛ ǹ gá Samaria kí Ahabu le. À gàa Nabↄti geepi líkpɛ sí, à kú gwe. 19 Ǹ onɛ kɛ̀ mamↄma Dii ma bè, à gbɛ̃ dɛ̀ à mↄ̀ à túbi sín gweroo? Nɛ́ onɛ dↄ kɛ̀ guu kɛ̀ gbɛ̃ɛnↄ Nabↄti aru sã̀sãn, gwen aↄ̃é àpi pↄ́ sãsãn se.

20 Kɛ̀ Ahabu Ilia è à bè: Ma ibɛɛ, ai tia nɛ́ɛ ma tóroo? Ben Ilia bènɛ: Ee, mɛ́ɛ n tóro, zaakɛ n n zĩnda dà yã kɛ̀ zaa Diinɛ kɛnan. 21 Ben Dii bè é mↄ́nzi kpáńzi é n boriinↄ kaatɛ, n gↄ̃gbɛ̃ ke é gↄ̃ Isarailinↄ bùsunlo, baa wɛ̃ɛnɛ kesↄ̃ zↄ̀. 22 É kɛ n uanɛ lán à kɛ̀ Nɛbati nɛ́ Yeroboamu uanɛ nà, lán à kɛ̀ Ahia nɛ́ Baasa uanɛ nà, zaakɛ n Isarailinↄ dà durunkɛnan n à pↄↄ fɛ̃̀nɛ. 23 Yɛzɛbɛli sↄ̃, Dii bè gbɛ̃ɛnↄ é à só Yɛzɛrili bĩi saɛ. 24 Gbɛ̃ɛnↄ é n gbɛ̃ kɛ̀ aↄ̃é gaga wɛ́tɛ guunↄ só, bãanↄ é n gbɛ̃ kɛ̀ aↄ̃é gaga sɛ̃̀nnↄ ble.

25 Gbɛ̃kee kuu ziki kɛ̀ à a zĩnda dà yã kɛ̀ Dii yeziroo kɛnan lán Ahabu bàro, bensↄ̃ à naↄ̃ Yɛzɛbɛli è tɛ́ kán. 26 À yã kɛ̀ wà tɛ̃̀nↄ kɛ̀ maamaa, à tɛ̀ tãanↄzi lán Amↄrinↄↄ kɛ̀ nà, kɛ̀ Dii pɛ̀ḿma Isarailinↄnɛ.

27 Kɛ̀ Ahabu mà lɛ, ben à a uta gà à kɛ̃̀ à pↄsia utanↄ dà ai à ìo, ben à lɛ́ yì à gↄ̃̀ tɛ́ kↄ̃n pↄsiaao. 28 Ben Dii yã sù Iliaa: 29 Ń è dian Ahabu a zĩnda nàɛmɛ nàↄ́? Zaakɛ à a zĩnda nàɛmɛ, mɛ́ yã zaaa pì kɛ à bɛɛnɛ à gurↄↄaro. À nɛ́gↄ̃gbɛ̃n mɛ́ yã zaaa pì kɛ à bɛɛnɛ.