8
Tana kↄ̃n Dii àkpatio a kpɛ́n
1 Ben kí Sulemanu Isaraili gbɛ̃nsinↄ sìsi Yerusalɛmu, aↄ̃ borii dↄn'aɛdeenↄ kↄ̃n ń uabɛdeenↄ ń píngi, lɛ aↄ̃ mↄ́ wà Dii bà kuunańyo àkpati sɛ́ Dauda wɛ́tɛ kɛ̀ wè be Zayↄn wà suo.
2 Ben Isarailinↄ kàkↄ̃a à aɛ ń píngi mↄ swɛɛplaade Ɛtanimu zĩbaagurↄↄ zĩ.
3 Kɛ̀ Isaraili gbɛ̃nsinↄ pɛ̀kↄ̃rɛ ń píngi, ben sa'orinↄ Dii àkpati pì sɛ̀
4 kↄ̃n dakↄ̃rɛki kutaao kↄ̃n Dii pↄ́ kɛ̀ kú à guunↄ. Sa'orinↄ kↄ̃n Levi boriinↄ bé wà pↄ́ pìnↄ sɛ̀ wà sùo,
5 ben kí Sulemanu kↄ̃n Isaraili kɛ̀ aↄ̃ kàkↄ̃a à aɛnↄ saa ò kↄ̃n sãanↄ kↄ̃n zùnↄ àkpati pì aɛ. Pↄ́ kɛ̀ aↄ̃ saa òo pìnↄↄ parii kɛ̀ bíta, èe sí naroro.
6 Ben sa'orinↄ gɛ̃̀ kↄ̃n Dii bà kuunańyo àkpatio à kpɛ́n ai kpɛ́nɛ kɛ̀ wè be Ludakukiin. Aↄ̃ↄ dìɛ à diɛkiia gwe kɛrubunↄ gĩzĩ.
7 Kɛrubu pìnↄ dɛ̀bɛnↄↄ poroporona àkpati pì kↄ̃n à sɛ́linↄla.
8 À sɛ́li pìnↄↄ gbã̀a ai wè ń lɛ́ e Dii kpɛ́ gãnu guu, mↄde wè e ua kparo. Lí pìnↄↄ kú gwe ai kↄ̃n a gbã̀ao.
9 Pↄ́kee kú àkpati pì guuro, tó èe kɛ gbɛ̀ walaa mɛ̀n plaaa kɛ̀ Musa dàn zaa Orɛbu, guu kɛ̀ Dii bè a bà égↄ̃ kú kↄ̃n Isarailinↄ aↄ̃ bↄna Igipiti gbɛraa baasiro.
10 Kɛ̀ sa'orinↄ bↄ̀ɛ Dii kpɛ́n, tɛ́sukpɛ kpɛ́ pì pà,
11 aↄ̃ↄe fↄ̃ wà gɛ̃̀ wà ń zĩi kɛ gwero tɛ́sukpɛ pì yãnzi, zaakɛ Dii gakui a kpɛ́ pà.
12 Ben Sulemanu bè: Dii bè égↄ̃ kú tɛ́sukpɛ siaa guumɛ.
13 Ben à bè Diinɛ: Ma kpɛ́ naasidee kɛ̀kii bònnɛ, ǹgↄ̃ kú à guu gurↄ píngi.
14 Ben à lìɛ à aɛ dↄ̀ pariia à sa maaa òńnɛ.
15 Ben à bè: Wà Dii Isarailinↄ Luda sáabu kpá! À lɛ́ gbɛ̃̀ ma de Daudanɛ, ben à pàpa. Zaakɛ à bè,
16 zaa gurↄↄ kɛ̀ a a gbɛ̃ Isarailinↄ bↄ̀ɛ Igipiti, ée Isaraili wɛ́tɛ ke diɛ wà kpɛ́ bon arero. Daudan a sɛ̀ a gbɛ̃ Isarailinↄ dↄn'aɛdee ũ.
17 Kɛ̀ ma de Dauda yezi à kpɛ́ bo Dii Isarailinↄ Ludanɛ,
18 ben Dii bènɛ kpɛ́bonaare lɛ a tↄ́ gↄ̃ kúa laasuu kɛ̀ à kɛ̀ pì maa,
19 mↄde èe kɛ àpi bé eé boarero, à zĩnda nɛ́ ke bé eé boare.
20 Ben Dii kɛ̀ lán à à lɛ́ gbɛ̃̀nɛ nà. Ma gↄ̃ ma de Dauda gɛ̃ɛ ũ, ma vɛ̃ɛ Isaraili kpatan lán Dii Isarailinↄ Luda à lɛ́ gbɛ̃̀ nà, ben ma kpɛ́ kɛ̀ bònɛ lɛ à tↄ́ gↄ̃ kúa yãnzi.
21 Gwen ma Dii àkpati diɛkii kɛ̀kɛn. Dii bà kuuna kↄ̃n wa dezinↄ aↄ̃ bↄna Igipiti gbɛra yã kú à guu.
Sulemanu aduakɛna a gbɛ̃nↄnɛ
22 Sulemanu aɛ dↄ̀ Dii gbãgbãkiia Isaraili kɛ̀ aↄ̃ kakↄ̃ana gweenↄ wáa ń píngi, ben à a ↄↄnↄ sɛ̀ musu
23 à bè: Dii Isarailinↄ Luda, gbɛ̃ke è sí lɛ́kↄ̃zinyo musu ke tↄↄtɛro. N gbɛ̃kɛɛ guu n bà kú kↄ̃n n zↄ̀bleri kɛ̀ aↄ̃ↄ tɛ́ n zɛ́n kↄ̃n nↄ̀sɛ dooonↄ.
24 N yã kɛ̀ n à lɛ́ gbɛ̃̀ n zↄ̀bleri ma de Daudanɛ pàpa. Ń ò kↄ̃n lɛ́omɛ yã, gbã̀a san ń pàpa.
25 Tia sa Dii Isarailinↄ Luda, n lɛ́ gbɛ̃̀ n zↄ̀bleri ma de Daudanɛ n bè, tó à boriinↄ ń zĩnda kũna dↄ̃ bensↄ̃ aↄ̃ↄ tɛ́ n zɛ́n lán à tɛ́zi nà, aↄ̃égↄ̃ kú Isaraili kpatan gurↄ píngi.
26 Isarailinↄ Luda, ǹ tó yã kɛ̀ ń ò n zↄ̀bleri ma de Daudanɛ kɛ yãpuraa ũ sa.
27 Mↄde Luda, nɛ́gↄ̃ kú tↄↄtɛ kɛ̀ yãpuran yↄ́? Musu kↄ̃n a lezĩkɛɛo é fↄ̃ à n síro, benle kpɛ́ kɛ̀ má bònnɛɛ kɛ̀kii saↄ́?
28 Dii ma Luda, ǹ làakari dↄ mapi n zↄ̀bleria, ǹ ma aduakɛna kↄ̃n ma agbaakpanannɛɛo sí. Ǹ swã kpá wiii kɛ̀ mapi n zↄ̀bleri mɛ́ɛ pɛɛnziizi kↄ̃n adua kɛ̀ mɛ́ɛ kɛɛmmaao gbã̀a.
29 Ǹ tó n wɛ́ɛ gↄ̃ pɛna kpɛ́ kɛ̀kiia gwãavĩ kↄ̃n fãantɛ̃o, guu kɛ̀ n bè n tↄ́ égↄ̃ kúa kɛ̀kii pì. Ǹ adua kɛ̀ mapi n zↄ̀bleri mɛɛ̀ kɛɛ aɛdↄna guu kɛ̀kiia ma.
30 Tó mapi n zↄ̀bleri ke n gbɛ̃ Isarailinↄ aɛ dↄ̀ guu kɛ̀kiia, tó wa wɛ́ɛ kɛ̀mma, ǹgae wa wɛ́ɛkɛna sí zaa n kúkiia musu ǹ sùu kɛwao.
31 Tó gbɛ̃ taari kɛ̀ a gbɛ̃daaanɛ, ben wà bènɛ à la da, tó à mↄ̀ à la dà n gbãgbãkii kɛ̀ aɛ,
32 ǹgae zɛńyo zaa n kúkiia musu ǹ ↄdↄańnɛ. Ǹgae yã gↄ̃gↄ̃ n zↄ̀blerinↄnɛ ǹ yã da taarideela, lɛ à yãkɛna wí à musu ǹ yã nnaa kpá taarisaideea, lɛ wà e wà dↄ̃ kɛ̀ à yãke vĩro.
33 Tó n gbɛ̃ Isarailinↄ ibɛɛnↄ zĩ̀ blèḿma durun kɛ̀ aↄ̃ↄ kɛ̀nnɛ yãnzi, aↄ̃ tàńyo, tó aↄ̃ ɛ̀ara wà aɛ dↄ̀mma wà n sisi, tó aↄ̃ wɛ́ɛ kɛ̀mma wà agbaa kpànnɛ kpɛ́ kɛ̀kiia,
34 zaa n kúkiia musu ǹgae zɛńyo ǹ sùu kɛńyo kↄ̃n ń durunnↄ, ǹ ɛarańyo bùsu kɛ̀ ń kpà ń dezinↄa kɛ̀kii pì guu.
35 Tó ludambɛɛ gↄ̃̀ da wáawaa, lou gì mazi kɛ̀ aↄ̃ durun kɛ̀nnɛ yãnzi, tó aↄ̃ aɛ dↄ̀ guu kɛ̀kiia aↄ̃ wɛ́ɛ kɛ̀mma aↄ̃ n sisi, bensↄ̃ aↄ̃ kpɛɛ lì ń durunnɛ kɛ̀ n wɛ́ɛ tã̀ḿma yãnzi,
36 zaa n kúkiia musu ǹgae zɛńyo ǹ sùu kɛńyo kↄ̃n ń durunnↄ. Ǹgae ń da zɛ́ maaan, nɛ́ tó lou ma n bùsu kɛ̀ ń kpà n gbɛ̃nↄa aↄ̃ pↄ́ ũu kɛ̀ guu.
37 Tó dekaa ke gagyãa kà bùsu kɛ̀n, ke pↄ́wɛɛpↄ̃si ke pↄ́pukpana ke sutɛ̃nↄ ke kwaanↄ ke tó ibɛɛnↄ lìga ń wɛ́tɛ kezi ke tó mↄ́nzi ke gyãa gɛ̃̀ ń tɛ́,
38 tó aↄ̃ gbɛ̃ke yã kɛ̀ à a lee dↄ̃̀, tó à a ↄↄ dↄ̀ kpɛ́ kɛ̀kii kpa, tó à wɛ́ɛ kɛ̀mma à agbaa kpànnɛ,
39 zaa n kúkiia musu ǹgae zɛo ǹ sùu kɛo, nɛ́ dↄàlɛ. Ǹgae fĩa bonɛ a yãkɛnaa, zaakɛ ń à nↄ̀sɛ dↄ̃. Ḿbe ń baade píngi nↄ̀sɛ dↄ̃.
40 Lɛn aↄ̃égↄ̃ vĩa kɛɛnnɛ lɛ ai ń wɛ̃̀ndi lɛ́n bùsu kɛ̀ ń kpà ń dezinↄa kɛ̀ guu.
41-42 Zaakɛ weé n tↄ́ bíta kↄ̃n n gã̀sã gbãaao kↄ̃n n ↄↄ kɛ̀ poronao baaru ma, tó gbɛ̃ zĩ̀tↄ kɛ̀ dɛ n gbɛ̃ Isaraili borii ũroo bↄ̀ bùsu zã̀azãn à mↄ̀ n tↄ́ yãnzi, tó à aɛ dↄ̀ kpɛ́ kɛ̀a à wɛ́ɛ kɛ̀mma,
43 zaa n kúkiia musu ǹgae zɛo ǹ yã kɛ̀ à wɛ́ɛ kɛ̀mmaa kɛnɛ, lɛ anduna bori píngi e à n tↄ́ dↄ̃, wà vĩa kɛnnɛ lán n gbɛ̃ Isarailinↄ è kɛnnɛ nà, aↄ̃égↄ̃ dↄ̃ kɛ̀ n tↄ́ kú kpɛ́ kɛ̀ má bò kɛ̀a.
44 Tó n gbɛ̃nↄ bↄ̀ɛ wà gàa zĩ̀ ká kↄ̃n ń ibɛɛnↄ, baa guu kɛ̀ n ń zĩn píngi, tó aↄ̃ aɛ dↄ̀ wɛ́tɛ kɛ̀ ń sɛ̀ kɛ̀a kↄ̃n kpɛ́ kɛ̀ má bònnɛɛ kɛ̀o, tó aↄ̃ wɛ́ɛ kɛ̀mma,
45 zaa n kúkiia musu ǹgae zɛńyo agbaa kɛ̀ aↄ̃ↄ kpànnɛ yãnzi, ǹ yã nnaa kpáḿma.
46 Zaakɛ gbɛ̃ke è gí durun kɛziro, tó aↄ̃ durun kɛ̀nnɛ, tó n pↄ fɛ̃̀ńzi n ń ná ń ibɛɛnↄnɛ ń ↄzĩ, tó aↄ̃ tàńyo ń bùsun zĩ̀zↄnↄ ũ bùsu zã̀azã ke à kĩin yoo,
47 tó aↄ̃ nↄ̀sɛ lìɛ bùsu kɛ̀ aↄ̃ↄe zↄ̀ bleen pì guu, tó aↄ̃ ɛ̀ara wà agbaa kpànnɛ gwe wà bè: Wa durun kɛ̀, wa taari kɛ̀, wa yã zaaa kɛ̀,
48 tó aↄ̃ aɛ dↄ̀mma kↄ̃n nↄ̀sɛo do kↄ̃n pↄyezinao píngi zaa bùsu kɛ̀ aↄ̃ↄe zↄ̀ bleen ń ibɛɛnↄnɛ pì guu, tó aↄ̃ aɛ dↄ̀ bùsu kɛ̀ ń kpà ń dezinↄa kↄ̃n wɛ́tɛ kɛ̀ ń sɛ̀o kↄ̃n kpɛ́ kɛ̀ má bònnɛɛ kɛ̀oa, tó aↄ̃ wɛ́ɛ kɛ̀mma,
49 zaa n kúkiia musu ǹgae zɛńyo agbaa kɛ̀ aↄ̃ↄ kpànnɛ yãnzi, ǹ yã nnaa kpáḿma.
50 Ǹgae sùu kɛ kↄ̃n n gbɛ̃ kɛ̀ aↄ̃ durun kɛ̀nnɛɛnↄ kↄ̃n taari kɛ̀ aↄ̃ↄ kɛ̀o, ǹ tó gbɛ̃ kɛ̀ aↄ̃ↄe zↄ̀ bleeńnɛnↄ ń wɛ̃nda gwa,
51 zaakɛ n pↄ́vĩnanↄmɛ, n gbɛ̃ kɛ̀ n ń bↄ́ɛ Igipitinↄ wɛ́ɛtãmma pãsĩ guunↄmɛ.
52 Ǹ tó n wɛ́ɛ gↄ̃ kú mapi n zↄ̀bleria, ǹ swã kpá agbaa kɛ̀ má kpànnɛɛzi kↄ̃n agbaa kɛ̀ n gbɛ̃ Isarailinↄ kpànnɛɛo. Ǹ swã kpáńzi gurↄↄ kɛ̀ aↄ̃ wii pɛ̀nzi píngi.
53 Dii Luda, zaakɛ anduna bori píngi guu aↄ̃pinↄn n ń sɛ́ n gbɛ̃nↄ ũ, lán ń ò n zↄ̀bleri Musa gãzĩ nà gurↄↄ kɛ̀ n wa dezinↄ bↄ̀ɛ Igipiti.
54 Gurↄↄ kɛ̀ Sulemanu e wɛ́ɛ kɛɛ Diia, à kuɛna a kosooamɛ kↄ̃n à ↄↄnↄo porona musu. Kɛ̀ à adua kɛ̀ à yã̀a, ben à fɛ̀ɛ à zɛ̀ Dii gbãgbãkiia gwe,
55 ben à sa maaa ò Isaraili kɛ̀ aↄ̃ↄ kú gweenↄnɛ ń píngi, à ò gbãngbãn à bè:
56 Wà Dii sáabu kpá, zaakɛ à wamↄwa a gbɛ̃ Isarailinↄ gbà ĩampakii lán à ò nà. Yã maaa kɛ̀ à à lɛ́ gbɛ̃̀ a zↄ̀bleri Musa gãzĩnↄ pàpa píngi, à kee e lɛ́ɛ pãro.
57 Dii wa Luda gↄ̃ kúwao, lán à kú kↄ̃n wa dezinↄo nà. Àton wa tónlo, àton pã kpáwaziro.
58 À tó wà swɛ̃̀ gↄ̃ kúawa wàgↄ̃ tɛ́ à zɛ́n, wàgↄ̃ à yãdiɛnanↄ kũna kↄ̃n yã kɛ̀ à dà wa dezinↄnɛnↄ, wàgↄ̃ à ↄdↄkii gwaa.
59 Adua kɛ̀ má kɛ̀ Dii wa Ludaa gↄ̃ dↄn fãantɛ̃ kↄ̃n gwãavĩo. Àgↄ̃ yã nnaa kpá mamↄma a zↄ̀bleria kↄ̃n a gbɛ̃ Isarailinↄ lán guu e dↄↄ nà,
60 anduna bori píngi é à dↄ̃ kɛ̀ Dii nɛ́ Ludamɛ, à pãndee kuuro.
61 À kũ̀ à a swɛ̃̀ kpá Dii wa Ludaa mámmam, àgↄ̃ à ↄdↄkii gwaa, àgↄ̃ à yãdiɛnanↄ kũna lán á kũna gbã̀a nà.
Dii ua kyakɛna
62 Ben kína kↄ̃n Isarailinↄ ń píngi saa ò Diia.
63 Sulemanu kɛnnakↄ̃o saa ò Diia kↄ̃n zùnↄ bↄrↄ baro awɛɛplaa kↄ̃n sãanↄ bↄrↄ baswɛɛdo. Lɛn kína kↄ̃n Isarailinↄ ń píngi Dii ua kya kɛ̀ lɛ.
64 Zĩ pìa kína gbãsĩ gò ua kɛ̀ kú Dii kpɛ́ aɛa, ben à sa'opↄ kɛ̀ wè ká tɛ́n à tɛ́ kũ ò gwe kↄ̃n pↄ́wɛɛ gbaao kↄ̃n kɛnnakↄ̃o sa nↄ́sio, zaakɛ sa'okii kɛ̀ à kɛ̀ kↄ̃n mↄ̀gotɛ̃o kɛ̀ kú Dii kpɛ́ aɛ bítaro, èe fↄ̃ à sì píngiro.
65 Zĩ beeea Sulemanu kↄ̃n Isarailinↄ ń píngi zĩbaa kɛ̀ Dii ń Ludanɛ ai gurↄ swɛɛplaa, ben aↄ̃ Kutadↄna zĩbaa kɛ̀ gurↄ swɛɛplaa dↄ. À píngi kɛ̀ gurↄ gɛ̃ro dosai. Wà pari maamaa, wà bↄ̀ zaa Lebo Amata ai à gàa pɛ́ Igipiti gulɛzɛki swaaa.
66 À gurↄ sↄraagↄ̃dee zĩ à ń gbáɛ, ben aↄ̃ lɛ́ zàa aↄ̃ tà ń bɛ kↄ̃n pↄnnaao. Aↄ̃ pↄↄ kɛ̀ nna yã maaa kɛ̀ Dii kɛ̀ a zↄ̀bleri Dauda kↄ̃n a gbɛ̃ Isarailinↄnɛ píngi yãnzi.