Luda yã takada kↄ̃n Bokobaru yão MAAKU 10

Gina nↄↄzi yã

(Mat 19:1-12)

1 Ben Yesu bↄ̀ gwe à gàa Yudea bùsun ai Yoda baa kãa kpa. Parii ɛ̀ara wà kàkↄ̃azi gwe, ben à yã dàńnɛ lán è kɛ nà. 2 Farisi kenↄ mↄ̀ wà à yↄ̃ wà gwa, ben aↄ̃ à là wà bè: Gↄ̃gbɛ̃ zɛ́ vĩ à gí a naↄ̃ziↄ́? 3 À wèńla à bè: Musa dàare diaa? 4 Aↄ̃ bè: Musa gↄ̃gbɛ̃ gbà zɛ́ à yìgidɛtakada kɛ̃ à a naↄ̃ gbarɛo. 5 Ben Yesu bèńnɛ: A swãgbãa yãnzin Musa doka beee dàarezi. 6 Zaa káaku kɛ̀ Luda anduna kɛ̀, à gↄ̃gbɛ̃ kɛ̀ kↄ̃n nↄgbɛ̃omɛ. 7 Beee yãnzi gↄ̃gbɛ̃ é a de kↄ̃n a dao tó, aↄ̃é nakↄ̃a kↄ̃n a naↄ̃o, 8 aↄ̃ gↄ̃ↄn plaaa é gↄ̃ mɛ̀ doo ũ. Aↄ̃ↄ kuu plaa dↄro, sé do. 9 Beee yãnzi gbɛ̃ kɛ̀ Luda ń nakↄ̃anↄ, gbɛ̃tee tón ń kɛ̃kↄ̃aro. 10 Kɛ̀ Yesu tà bɛ, à ìbanↄ à là yã pì mìzi. 11 Ben à bèńnɛ: Gbɛ̃ kɛ̀ gì a naↄ̃zi à nↄ pãnde sɛ̀, adee zina kɛ̀ a nↄ káakunɛ. 12 Nↄgbɛ̃ kɛ̀ gì a zãzi à gↄ̃ pãnde sɛ̀ sↄ̃, à zina kɛ̀n gwe.

Yesu aubarikadana nɛ́nↄn

(Mat 19:13-15, Luk 18:15-17)

13 Wèe mↄↄ Yesunɛ kↄ̃n nɛ́nↄ lɛ à ↄ kɛḿma, ben à ìbanↄ gìńnɛ. 14 Kɛ̀ Yesu è lɛ, à pↄ fɛ̃̀ à bèńnɛ: À tó nɛ́nↄ mↄ́ ma kiia, àton gíńnɛro, zaakɛ aↄ̃ takanↄ pↄ́n kpata kɛ̀ bↄ̀ Luda kiia ũ. 15 Yãpuraan mɛ́ɛ ooare, gbɛ̃ kɛ̀ èe kpata kɛ̀ bↄ̀ Luda kiia sí lán nɛ́ féte bàroo é gɛ̃nlo. 16 Ben à nɛ́nↄ sɛ̀ à ń kpákpa a kùla, à ↄ kɛ̀kɛḿma à aubarika dàńgu.

Auzikidee

(Mat 19:16-30, Luk 18:18-30)

17 Kɛ̀ Yesu dà zɛ́n èe gaa, ben gↄ̃gbɛ̃ ke bàa lɛ̀ à mↄ̀ à kùɛ à aɛ à à là à bè: Dannɛri maa, dian mɛ́ kɛ nà mà wɛ̃̀ndi kɛ̀ è yãaroo ee? 18 Ben Yesu bènɛ: À kɛ̀ dia n bè má maaa? Gbɛ̃kee maaro, sé Luda ado. 19 Ń dokanↄ dↄ̃: Ǹton gbɛ̃ dɛro, ǹton zina kɛro, ǹton kpãi oro, ǹton yã di n gbɛ̃daaaaro, ǹton gbɛ̃ blero, ǹgae bɛ̀ɛ lí n de kↄ̃n n daonɛ. 20 Ben à bè: Dannɛri, zaa ma nɛ́ngo zĩ má yã beeenↄ kũna píngi. 21 Ben Yesu à gwà yenzi wɛ́ɛo à bènɛ: Yã mɛ̀n doo bé à gↄ̃̀nnɛ. Ǹ gá ǹ pↄ́ kɛ̀ ń vĩinↄ yá píngi ǹ à ↄↄ kpá takaasideenↄa, ǹ mↄ́ ǹ tɛ́mazi, nɛ́gↄ̃ auziki vĩ ludambɛ. 22 Ben gↄ̃gbɛ̃ pì uu sìsi yã pì yãnzi, à tà pↄsiaao kɛ̀ à auzikinↄ vĩ bíta yãnzi. 23 Ben Yesu a ìbanↄ gwàgwa à bèńnɛ: À zĩ'ũ maamaa auzikideenɛ à gɛ̃ kpata kɛ̀ bↄ̀ Luda kiia guu. 24 À yã pì bↄ̀ à ìbanↄ saɛ, ben Yesu ɛ̀ara à bèńnɛ: Gbɛ̃nↄ, à zĩ'ũ gbɛ̃nɛ maamaa à gɛ̃ kpata kɛ̀ bↄ̀ Luda kiia guu! 25 Lakumi gɛ̃na pↄrↄyĩn aaga dɛ auzikide gɛ̃na kpata kɛ̀ bↄ̀ Luda kiia guula. 26 Ben yã pì bↄ̀ à ìbanↄ saɛ maamaa, aↄ̃ bèkↄ̃nɛ: Tó lɛmɛ, dé bé eé fↄ̃ à mìsina ee? 27 Yesu ń gwá à bè: Gbɛ̃ntee é fↄ̃ro, sé Luda. Luda kiia baabↄ píngi è sí kɛ.

28 Ben Pita bènɛ: Wa baabↄ píngi tò wa tɛnzi. 29 Yesu bè: Yãpuraan mɛ́ɛ ooare, gbɛ̃ kɛ̀ à a bɛɛ tò ke a vĩ̀inↄ ke a dãaronↄ ke a da ke a de ke a nɛ́nↄ ke a buraa ma yãnzi kↄ̃n ma baarukpannɛna yão, 30 adee é ɛara à bɛɛnↄ kↄ̃n vĩ̀inↄ kↄ̃n dãaronↄ kↄ̃n danↄ kↄ̃n nɛ́nↄ kↄ̃n buraanↄ e lɛo basↄↄro anduna kɛ̀ guu, mↄde kↄ̃n wɛ́ɛtãmmaomɛ, eé wɛ̃̀ndi kɛ̀ è yãaroo e anduna kɛ̀ èe mↄↄ guu. 31 Gbɛ̃ káakunↄ égↄ̃ kpɛɛdeenↄ ũ pari, kpɛɛdeenↄ égↄ̃ gbɛ̃ káakunↄ ũ.

Yesu ɛara à a ga kↄ̃n a fɛɛnao yã'ona

(Mat 20:17-19, Luk 18:31-34)

32 Aↄ̃ ɛ̀ara wà dà zɛ́n aↄ̃ↄe gaa Yerusalɛmu. Yesu dↄ a ìbanↄnɛ aɛ, ben yã pì bↄ̀ ń saɛ, vĩa gbɛ̃ kɛ̀ aↄ̃ↄ tɛ́ à kpɛɛnↄ kũ̀. Ben Yesu a gↄ̃ↄn kuri awɛɛplaaanↄ sɛ̀ɛ ńdona, à ɛ̀ara à yã kɛ̀ weé kɛaree òńnɛ dↄ 33 à bè: À ma! Wée gaa Yerusalɛmumɛ. Weé Gbɛ̃ntee Nɛ́ kpá sa'orikinↄ kↄ̃n ludayãdannɛrinↄa, aↄ̃é yã daàla à ga, aↄ̃é à kpá bori pãndenↄa. 34 Aↄ̃é à fabo aↄ̃é lóu sua aↄ̃é à gbɛ̃ flã̀o aↄ̃é à dɛ, à gurↄ aagↄ̃dee zĩ eé fɛɛ.

Yemisi kↄ̃n Yohanao wɛ́ɛkɛna

(Mat 20:20-28)

35 Ben Zebedi nɛ́nↄ Yemisi kↄ̃n Yohanao sↄ̃̀ Yesuzi aↄ̃ bènɛ: Dannɛri, wá yezi ǹ yã kɛ̀ wée wɛ́ɛ kɛɛmmaa kɛwe. 36 Ben à ń lá à bè: Bↄ́n á yezi mà kɛaree? 37 Aↄ̃ wèàla wà bè: Ǹ tó wà vɛ̃ɛnyo n kpata guu, gbɛ̃ doo n ↄplaazi gbɛ̃ doo ↄzɛɛzi. 38 Yesu bèńnɛ: Á yã kɛ̀ ée à wɛ́ɛ kɛɛmaa dↄ̃ro. Togo'i kɛ̀ mɛ́ mi, é fↄ̃ à miↄ́? Wɛ́ɛtãmma kɛ̀ mɛ́ gɛ̃n é fↄ̃ à gɛ̃ à guuↄ́? 39 Aↄ̃ wèàla wà bè: Wé fↄ̃. Ben Yesu bèńnɛ: Togo'i kɛ̀ mɛ́ mii é mi, wɛ́ɛtãmma kɛ̀ mɛ́ gɛ̃n é gɛ̃n, 40 mↄde vɛ̃ɛna ma ↄplaazi ke ma ↄzɛɛzi nɛ́ ma yãnlo. Gbɛ̃ kɛ̀ Ludaa kɛ̀kɛńnɛnↄ pↄ́mɛ.

41 Kɛ̀ à ìba gↄ̃ↄn kuri kpaaanↄ yã pì mà, aↄ̃ pↄ fɛ̃̀ Yemisi kↄ̃n Yohanaozi. 42 Ben Yesu ń kákↄ̃a à bèńnɛ: Á dↄ̃ kɛ̀ gbɛ̃ kɛ̀ wèe ń gwaa bori pãnde kínanↄ ũunↄ è gbãaa ble ń gbɛ̃nↄa, gbãadeenↄ sↄ̃ è iko mↄ́ńnɛ, 43 mↄde à dɛ lɛ a kiiaro. A tɛ́ gbɛ̃ kɛ̀ yezi à gↄ̃ gbɛ̃nsi ũ, sé adee kɛ a zĩ̀ri ũ. 44 Lɛmɛ dↄ gbɛ̃ kɛ̀ yezi à gↄ̃ gbɛ̃ káaku ũ, sé adee kɛ a píngi zↄ̀ ũ. 45 Zaakɛ Gbɛ̃ntee Nɛ́ e mↄ́ lɛ wà zĩi kɛnɛro, à mↄ̀ lɛ à zĩi kɛńnɛmɛ, à a zĩnda wɛ̃̀ndi kpá lɛ à gbɛ̃nↄ bo pari yãnzi.

Batimɛu wɛ́ɛwɛ̃na

(Mat 20:29-34, Luk 18:35-43)

46 Aↄ̃ kà Yɛriko. Kɛ̀ Yesu e bↄↄ gwe kↄ̃n a ìbanↄ kↄ̃n pariio, vĩ̀a Timɛu nɛ́ Batimɛu vɛ̃ɛna zɛ́ lɛ́a, èe baa kɛɛ. 47 Kɛ̀ à mà wà bè Yesu Nazarɛti bé èe gɛ̃tɛɛ, ben à nà lɛ́ gbãa zunaa à bè: Yesu, Dauda Bori, ǹ ma wɛ̃nda gwa! 48 Ben parii e giinɛ wèe bee à yĩtɛ. Ben à lɛ́ gbãa zuna kàara èe bee: Dauda Bori, ǹ ma wɛ̃nda gwa. 49 Yesu zɛ̀ à bè: À à sísi. Ben wà vĩ̀a pì sìsi wà bènɛ: Ǹ n làakari kpáɛ ǹ fɛɛ. Èe n sísii. 50 Ben vĩ̀a pì a uta bↄ̀ à vĩ̀ à fɛ̀ɛ à mↄ̀ Yesu kiia. 51 Ben Yesu à là à bè: Bↄ́n ń yezi mà kɛnnɛɛ? Vĩ̀a pì wèàla à bè: Rabi, má yezi ma wɛ́ɛ guu emɛ. 52 Ben Yesu bènɛ: Ǹ gá, ma náanɛ kɛ̀ ń kɛ̀ bé à n kɛ̃kↄ̃a. Zaa gwe gↄ̃ↄ à wɛ́ɛ guu è, ben à dào zɛ́n.