16
1 Gbɛ̃ntee è yã diɛ a swɛ̃̀n,
mↄde à mìdɛna è bↄ Dii lɛ́mmɛ.
2 Baade è a yãkɛna e maamɛ,
mↄde Dii ń nↄ̀sɛguuyãnↄ yↄ̃ à gwa.
3 Ǹ yã kɛ̀ nɛ́ɛ kɛɛ na Dii ↄzĩ,
n pↄyeziyã é bↄ maa.
4 Dii pↄ́ píngi kɛ̀ a pↄyezi yãnzimɛ,
zaakɛrinↄ pↄ́n wɛ́ɛtãmmagurↄↄ ũ.
5 Dii tɛ̃̀n ĩadãrinↄ ũ,
yãpuramɛ aↄ̃é bↄ pãro.
6 Gbɛ̃kɛɛ kↄ̃n náanɛo è lá ká taarila,
vĩakɛna Diinɛ è tó wà pã à zaaanɛ.
7 Tó gbɛ̃ yãkɛnanↄ kɛ̀ Diinɛ nna,
è tó se à ibɛɛnↄ kɛo nna.
8 Pↄ́ féte ena maakɛna guu
maa dɛ àre zaa bíta enala.
9 Gbɛ̃ntee è zɛ́ kɛ̀ èe sɛɛ laasuu lɛ́,
mↄde Dii è a kɛ̀sɛ da zɛ́a.
10 Lán kína è yã diɛ Luda gɛ̃ɛ ũ nà,
à maa à yã bↄ yãzɛdee kpɛɛro.
11 Zaka maaa kↄ̃n kiloo súusuo nɛ́ Dii pↄ́mɛ,
pↄ́tiisigwabↄ píngi nɛ́ à pↄ́kɛnanↄmɛ.
12 Èe kↄ̃ sío kína à zaaa kɛro,
wè kpata kãsãa pɛ́ɛ yãzɛdee musumɛ.
13 Yãzɛde'ori è kɛ kínanɛ nna,
ègↄ̃ ye yãpura'orizi.
14 Kína pↄfɛ̃ dɛ lán ga zĩ̀ri bàmɛ,
mↄde ↄ̃ndↄ̃dee è à tɛ́ dɛ.
15 Kína uu werena ègↄ̃ aafia vĩ,
à maakɛnnɛna dɛ lán pↄ́tↄ̃gurↄ lou bàmɛ.
16 Ɔ̃ndↄ̃kũna maa dɛ vurala zã̀,
gↄ̃na làakaridee ũu bɛ̀ɛ vĩ dɛ kondogi maaala.
17 Gbɛ̃ maa zɛ́ kɛ̀ è sɛ́ pã̀ zɛ́ zaaanɛ,
gbɛ̃ kɛ̀ à a zĩndakũna dↄ̃ↄ è a wɛ̃̀ndi dãkpa.
18 Ĩadãna è mↄ́ lɛɛnao,
zĩndasɛna lezĩ è mↄ́ kaatɛnao.
19 Zĩndabusana talakanↄ tɛ́ maa
dɛ baka kuuna kↄ̃n ĩadãrinↄla.
20 Gbɛ̃ kɛ̀ è yã'onnɛ maa è à maaa e,
Dii náanɛkɛri ègↄ̃ pↄnnaa vĩ.
21 Gbɛ̃ kɛ̀ à nↄ̀sɛ papanan wè sísi làakaridee,
gbɛ̃ kɛ̀ à lɛ́ nnaan wè à yãdↄ̃na zɛ́ e.
22 Làakarin wɛ̃̀ndi mì ũ gbɛ̃ kɛ̀ aↄ̃ↄ vĩinↄnɛ,
faasaideenↄ yãfaasai è wɛ́ɛ tãḿma.
23 Ɔ̃ndↄ̃dee laasuu è à lɛ́ da zɛ́a,
à lɛ́ è tó wà à yãdↄ̃na zɛ́ e.
24 Yãnna'ona nɛ́ zↄ́mɛ,
à nna nↄ̀sɛn bensↄ̃ è mɛ̀ gba aafia.
25 Zɛ́ kee kuu è kɛ gbɛ̃nↄnɛ maa,
mↄde à mìdɛkii nɛ́ gaamɛ.
26 Búbari nↄ̀sɛ è à da zĩin,
zaakɛ nↄaa è tɛ́ kámmɛ.
27 Gbɛ̃ pãa è à zaaa gↄ̃gↄ̃,
à lɛ́gbɛ dɛ lán tɛ́ kɛ èe kũu bàmɛ.
28 Gbɛ̃ dↄ̀rↄsaidee è swèe da,
kↄmↄtↄdee è gbɛ̃nnanↄ kɛ̃kↄ̃a.
29 Gbɛ̃ pãsĩ è mↄnafiki kɛ a gbɛ̃daaanɛ,
gbasa à à da zɛ́ zaaan.
30 Gbɛ̃ kɛ̀ èe wɛ́ɛ'igↄ̃ kɛɛ laasuu ègↄ̃ kpɛɛgãndamɛ,
gbɛ̃ kɛ̀ èe lɛ́zuki kɛɛ zɛ̀ kↄ̃n à zaaaomɛ.
31 Mìkã puraa nɛ́ fùra gakuideemɛ,
maakɛna è ń káa.
32 Nↄ̀sɛyĩidee maa dɛ zĩ̀karila,
gbɛ̃ kɛ̀ à a zĩndakũna dↄ̃ↄ maa dɛ wɛ́tɛsirila.
33 Wè yã gbeka kↄ̃n ↄↄ puraao,
mↄde à bↄkↄ̃tɛna è bↄ Dii kiiamɛ.