23
Tó n mↄ pↄ́ ble kↄ̃n gbãadeeo,
ǹgↄ̃ dↄ̃ gbɛ̃ kɛ̀ kú n aɛ.
Tó sãnkaradeemɛ n ũ,
ǹ fɛ̃ɛ da n kòtoa.
Ǹton wãkũ kɛ à pↄ́ble nↄ́sideeziro,
zaakɛ pↄ́blee pì dɛ lán dabuuzunnɛna bàmɛ.
 
Ǹton ĩa da n zĩndaa ↄↄbitawɛtɛna yãnziro,
ǹ ↄ̃ndↄ̃ kũ ǹgↄ̃ n zĩndakũna dↄ̃.
Wè wɛ́ɛ lɛ́ ↄↄa, ben è gɛ̃ zɛ́la,
è dɛ̀bɛ bↄbↄ à vĩa lán kúu bà.
 
Ǹton aĩapãsĩde pↄ́ blero,
ǹton wãkũ kɛ à pↄ́ble nↄ́sideeziro,
zaakɛ ègↄ̃ a ↄↄ naroo a nↄ̀sɛmmɛ.
Eé bennɛ ǹ pↄ́ ble ǹ í mi,
mↄde èe kɛnɛ a nↄ̀sɛnlo.
Nɛ́ à féte kɛ̀ ń blè pisimɛ,
sáabu kɛ̀ ń kɛ̀ é kɛ pã.
 
Ǹton yã o yↄ̃nkↄↄ swãnlo,
zaakɛ eé kyaka n ↄ̃ndↄ̃yãmmɛ.
 
10 Ǹton tↄↄtɛ lɛ́ sèeda zii wurɛro,
ǹton tonɛnↄ bú lɛ́ ǹ ká n pↄ́laro,
11 zaakɛ aↄ̃ Dãkpari gbãa,
eé bↄ n kpɛɛ à yã síńyo.
 
12 Ǹ lɛ́damma yã da n swɛ̃̀n,
ǹ làakari dↄ dↄ̃nayãa.
 
13 Ǹton gí n nɛ́ totoziro.
Tó n à gbɛ̃̀ flã̀o, eé garo.
14 Ǹ à gbɛ̃ flã̀o,
lɛ ǹ à bↄ gaa ↄzĩ.
 
15 Ma nɛ́, tó n ↄ̃ndↄ̃ↄ vĩ n swɛ̃̀n,
ma pↄↄ é kɛ nna.
16 Tó yãzɛdee e bↄↄ n lɛ́n,
ma pↄↄ é kɛ nna.
 
17 Ǹton durunkɛrinↄ gwena ni dɛro,
ǹgↄ̃ Dii vĩa vĩ gurↄ sãnda píngi,
18 zaakɛ nɛ́gↄ̃ ziaa vĩmɛ,
tãmaa é n nɛro.
 
19 Ma nɛ́, ǹ ma yã ma lɛ ǹ ↄ̃ndↄ̃ kũ,
ǹ tó n swɛ̃̀ gↄ̃ tɛ́ zɛ́ maaazi.
20 Ǹton kakↄ̃a kↄ̃n wɛ̃mirinↄro,
ǹtongↄ̃ kú lóudeenↄ tɛ́ro,
21 zaakɛ wɛ̃dɛri kↄ̃n lóudeeo è gↄ̃ takaasideenↄ ũ,
aↄ̃ mɛ̀kpɛtɛ è ń da utakãsãdanammɛ.
 
22 Ǹ n de'ina yã ma,
tó n da zi kũ̀, ǹton kyakanlo.
23 Ǹgↄ̃ yãpuraa wɛtɛɛ, ǹton ↄ kpáziro,
ǹ ↄ̃ndↄ̃ kũ kↄ̃n yãdadanao kↄ̃n wɛ́ɛzɛ̃ɛo.
24 Gbɛ̃ maaa de pↄↄ ègↄ̃ nna maamaa,
gbɛ̃ kɛ̀ nɛ́ ↄ̃ndↄ̃dee ì pↄↄ ègↄ̃ nnaaamɛ.
25 Ǹ tó n de kↄ̃n n dao pↄↄ kɛmma nna,
ǹ tó n da'ina guda dↄmma.
 
26 Ma nɛ́, ǹ n nↄ̀sɛ wɛ̃mɛ,
n wɛ́ɛ gↄ̃ tɛ́ ma yãkɛnazi,
27 zaakɛ kaarua nɛ́ wɛ̀ɛ zòotomɛ,
nↄ pãpãkɛri nɛ́ lↄ̀gↄ zã̀mɛ.
28 È gbɛ̃ kpákpa lán kpãi wɛ́ɛdewɛ bà,
è tó gↄ̃gbɛ̃ paridee gↄ̃ náanɛ sai.
 
29 Dén wè wãiyoo kɛnɛ?
Dén wè o'oo kɛnɛ?
Dé bé à lɛokpakↄ̃a vĩi?
Dé bé à zↄka vĩi?
Dé bé è kɛ̃nna pãa?
Dé wɛ́ɛ bé à tɛ̃aa?
30 Gbɛ̃ kɛ̀ aↄ̃è gì kɛ wɛ̃mikiianↄ,
kɛ̀ aↄ̃è gá kpáɛ kɛ geepiwɛ̃ yãkↄ̃tɛnanↄzimɛ.
31 Ǹton wɛ́ɛ bii geepiwɛ̃ɛa
lɛ à tɛ̃akɛ wãkũ n kũro,
zaakɛ ègↄ̃ pipii togoo guumɛ
à gɛ̃na lɛ́n ègↄ̃ nna.
32 Eé yãa swaa tɛ̃mma lán mlɛ̃̀ bà,
eé n gbã à n kũ lán pitigoo bà.
33 Nɛ́ wɛ́ɛ si pↄ́ kɛ̀ nɛ́ɛ e yãroolɛ,
nɛ́ laasuu kpɛɛgãnda lɛ́ n swɛ̃̀n.
34 Nɛ́gↄ̃ dɛ lán gbɛ̃ kɛ̀ daɛna góron ísiaalaa bà,
lán gbɛ̃ kɛ̀ kú góro'itɛ bisa mìsↄ̃ntɛ̃a bà.
35 Nɛ́ be: Wà ma gbɛ̃, èe ↄ̃maro,
wà ma kɛ búgubugu, mɛ́ɛ à wãwãa maro.
Bↄrɛn ma wɛ́ɛ é were lɛ mà í wɛtɛ mà mi dↄↄ?