7
Làakarikɛna kaaruazi
1 Ma nɛ́, ǹgↄ̃ ma yãnↄ kũna,
ǹ ma yãdiɛnanↄ da n nↄ̀sɛn.
2 Ǹgↄ̃ ma yãdiɛnanↄ kũna nɛ́gↄ̃ kú wɛ̃̀ndio,
ǹ làakari dↄ ma yãdannɛnaa lán n wɛ́ɛnɛ bà.
3 Ǹ da n ↄnɛa tãnga ũ,
ǹ kɛ̃ n swɛ̃̀a lán wè kɛ̃ walaaa nà.
4 Ǹ o ↄ̃ndↄ̃ↄnɛ n dãren à ũ,
ǹ asãnsi sísi n gbɛ̃ ũ.
5 Eé n dãkpa bↄna kaarua ↄzĩ,
eé n bↄ gbɛ̃ pãnde nↄ yãnnanna'onan.
6 Má zɛna ma kpɛ́ windo guu,
mɛ́ɛ bàazi gwaa.
7 Ben ma ↄ̀wazi kenↄ è, ↄ̃ndↄ̃ↄ kɛ̃̀sãḿma,
gↄ̃kparɛ kee kú ń tɛ́, à laasuu vĩro.
8 Èe likↄ̃aa zↄ̃ↄ gãalɛ,
èe waalogũ kɛkɛɛ nↄgbɛ̃ kezi,
èe gɛ̃tɛɛ à bɛ kpa gɛ̃̀n baaagↄ̃
9 zaa ↄfãntɛ̃ lɛɛnao ai gwãavĩ,
ai guu gàa à sì kũ̀o maamaa.
10 Ben nↄgbɛ̃ pì bↄ̀ à mↄ̀ daàlɛ ↄ̃ndↄ̃'ↄ̃ndↄ̃,
èe ↄ maa a zĩndaa lán kaarua bà.
11 Kùgbãadeemɛ, à wísai vĩ,
à pↄ̀rↄ è pɛ́ɛ bɛro.
12 Zĩkenↄa ègↄ̃ kú zɛ́daan, zĩkenↄa gãalɛ,
ègↄ̃ kpáɛ kɛɛ zɛ́ↄ̃nkpakↄ̃a.
13 Ben à ↄ̀wazi pì kũ̀ à lɛ́ pɛ̀a,
à wɛ́ɛkpãntɛ̃ dàɛzi à bè:
14 Sáabukpa sa'ona kúma yã,
ben ma lù kɛ̀ má sɛ̀ pì fĩa bò gbã̀a.
15 Wa kↄ̃'ena yãnzin ma bↄzi,
mɛ́ɛ n wɛtɛɛ ma n e kɛ̀ sↄ̃.
16 Ma kuntu kpàɛ ma gádoa
kↄ̃n Igipiti bùsu bisa wɛ́ɛ maaao.
17 Ma tuaetiti fã̀ ma daɛkiia
kɛ̀ wà kɛ̀ kↄ̃n lí'ↄ gũ nnannaao kↄ̃n lítɛɛo.
18 Ǹ mↄ́ wà yenzi kɛ ai guu gá dↄo,
wà wa pↄyezi kɛ ai à mↄ́wa.
19 Zaakɛ ma zã kú bɛro,
wɛ́tɛ kɛ̀ à gàan zã̀.
20 À ↄↄsↄ yì à gàao,
ai àgↄ̃ gá su mↄↄ é ↄsi kɛ.
21 À à swɛ̃̀ blè kↄ̃n yã pari bↄɛnao,
à gã nàa kↄ̃n yãnnanna'onao.
22 Ben ↄ̀wazi pì bↄ̀ à tɛ̀zi gↄ̃ↄ,
lán zù kɛ̀ wèe gaa kòto kpá bà,
lán gãa kɛ̀ èe gbá pɛɛɛ bàn dↄ̃,
23 lán bãa kɛ̀ èe wãa à sì taan bà.
Èe dↄ̃ kɛ̀ a a zĩnda kpà gaazinlo,
ai kà gàa à à swɛ̃̀ kũ̀.
24 Tia sa, ma nɛ́nↄ, à ma yã ma,
à làakari dↄ yã kɛ̀ èe bↄↄ ma lɛ́n-a.
25 Àton tó a laasuu tá à kiiaro,
àton sãsã à gɛ̃ à zɛ́nlo.
26 Gbɛ̃ kɛ̀ à ń nɛ́ à ń kaatɛnↄↄ pari,
gbɛ̃ kɛ̀ à ń dɛdɛ pìnↄ lɛ́ vĩro.
27 À bɛɛ nɛ́ mira zɛ́daamɛ,
è gɛ̃ńyo gɛ̀wãa kpɛ́nɛn.