109
Sa zaaa ona ibɛɛnɛ
Dauda lɛ̀.
Luda, ḿbe mɛɛ̀ n táaki lɛ́,
ǹtongↄ̃ yĩtɛnaro.
Zaakɛ gbɛ̃ zaa bↄnkpɛɛdeenↄ è ma yaka,
aↄ̃è lɛ́ bↄ wà ɛgɛyã dima.
Aↄ̃è ligamazi kↄ̃n zangu yão,
aↄ̃è swèe kɛmao pↄ́ke wíwinnɛna sai.
Aↄ̃è yenzi sↄkpamɛ kↄ̃n yãdimmanao,
baa kɛ̀ mɛɛ̀ adua kɛńnɛ.
Aↄ̃è à maaa fĩa bomɛ kↄ̃n à zaaao,
yenzi sↄ̃, kↄ̃n zanguo.
 
Ǹ Setãn swi kɛa,
ǹ à kpakↄ̃zi kↄ̃n Ibilisio.
Ǹ tó yãkpaɛ à ble,
ǹ tó à aduakɛna kɛnɛ taari ũ.
À wɛ̃̀ndi gↄ̃ kusu,
gbɛ̃ pãnde gↄ̃ à gɛ̃ɛ ũ.
À nɛ́nↄ gↄ̃ de sai,
à naↄ̃ gↄ̃ gyaanↄↄ ũ.
10 À nɛ́nↄ gↄ̃ likↄ̃azↄ̃rinↄ ũ wàgↄ̃ baa kɛɛ,
wàgↄ̃ ń kpakɛɛ ń bɛ zĩnↄ guu.
11 À fĩadee à pↄ́nↄ nakↄ̃a píngi,
gbɛ̃ zĩ̀tↄnↄ à zĩ àre ble.
12 Gbɛ̃ke tón gbɛ̃kɛɛ kɛnɛro,
wàton à nɛ́ kɛ̀ à tònↄ wɛ̃nda boro.
13 À boriinↄ kaatɛ,
aↄ̃ tↄ́ tóngↄ̃ kú borii kɛ̀ aↄ̃é fɛɛnↄ tɛ́ro.
14 À dezinↄ zaakɛna yã gↄ̃ dↄ Diin,
ǹton tó à da durun kɛ̃a zikiro.
15 Aↄ̃ durun gↄ̃ dↄn Diin,
aↄ̃ yã sã gbɛ̃nↄn anduna guu.
16 Zaakɛ èe dↄn à gbɛ̃kɛɛ kɛ gbɛ̃kenɛro,
è wɛ́ɛ tã takaasideenↄa kↄ̃n wɛ̃ndadeenↄ
kↄ̃n pↄsiadeenↄo ai gɛ̀wãan.
17 À ye sa zaa onnɛnazi,
ǹ tó à wí à musu.
Sa maa onnɛna è kánɛro,
ǹ tó aubarika kɛo zã̀.
18 À lɛ́kɛnnɛna dà lán uta bà,
à à mɛ̀ yàku lán í bà,
à gɛ̃̀ à wánↄn lán nↄ́si bà.
19 Kana pì gↄ̃ daàla lán uta bà,
àgↄ̃ dↄ à pii lán asaa bà.
20 Dii fĩa bo ma yãdimmarinↄnɛ lɛ
kↄ̃n gbɛ̃ kɛ̀ aↄ̃è yã zaaa o ma musunↄo.
 
21 Dii Gbãapingide,
ǹ ma wɛ̃nda gwa n tↄ́ yãnzi,
ǹ ma bↄ n maakɛ kↄ̃n n gbɛ̃kɛɛo yãnzi.
22 Zaakɛ takaaside wɛ̃ndadeen ma ũ,
ma pↄↄ yàka búgubugu.
23 Mɛ́ɛ gɛ̃tɛɛ lán uusiɛ ↄra bà,
má dɛ lán kwaa kɛ̀ ĩa e sɛɛ bà.
24 Lɛ́yina tò ma gbá è sí sɛ́ dↄro,
ma yãyã ma gↄ̃ wↄ̀ↄzↄgↄ.
25 Ma gↄ̃ yáadↄzipↄ ũ ma yãdimmarinↄnɛ,
aↄ̃è ma gwa wà mì gbãkɛ.
 
26 Ǹ dↄmalɛ, Dii ma Luda,
ǹ ma mì sí n gbɛ̃kɛ yãnzi,
27 lɛ aↄ̃ dↄ̃ kɛ̀ n ↄↄ bé à kɛ̀,
ḿbe Dii, n kɛnamɛ.
28 Baa tó aↄ̃ ma ka, nɛ́ aubarika damagu,
tó aↄ̃ fɛ̀ɛmazi, wí é ń kũ,
mapi n zↄ̀bleri mɛ́ pↄnnaa kɛ.
29 Tↄ́ zaaa gↄ̃ ma yãdimmarinↄnɛ uta ũ,
aↄ̃ wí da ń zĩndaa lán gumusu bà.
 
30 Mɛ́ Dii sáabu kpá kↄ̃n kòto gbãaao,
mɛ́ à táaki lɛ́ pari kakↄ̃ana guu.
31 Zaakɛ è zɛ kↄ̃n wɛ̃ndadeenↄ,
è ń sí gbɛ̃ kɛ̀ aↄ̃è yã vɛ̃ɛḿmanↄa.