138
Dii sáabukpana à gbɛ̃kɛ yãnzi
Dauda lɛ̀.
Mɛ́ n sáabu kpá kↄ̃n nↄ̀sɛo do,
mɛ́ n táaki lɛ́ gbãadeenↄ aɛ.
Mɛ́ kúɛ mà aɛ dↄ
n kpɛ́ kɛ̀ kú adona kpa,
mɛ́ n tↄ́ bↄ n gbɛ̃kɛ kↄ̃n n náanɛo yãnzi,
zaakɛ n n tↄ́ kↄ̃n n yão sɛ̀ lei dɛ pↄ́ píngila.
Kɛ̀ ma n sisi, n wemala,
ǹ ma kù kɛ gbãaa, ǹ ma swɛ̃̀ kpáɛ.
 
Tó anduna kínanↄ yã kɛ̀ ń ò mà,
aↄ̃ n sáabu kpá ń píngi, Dii.
Aↄ̃ lɛ̀ sí Dii yãkɛnanↄ musu,
zaakɛ Dii gakui bíta.
 
Baa kↄ̃n Dii kuunamusukɛɛo,
è gbɛ̃ kɛ̃sãnanↄ wɛ̃nda gwa,
è wɛ́ɛ pã gbɛ̃ kɛ̀ aↄ̃ↄe daa wà kànↄla.
Baa tó wɛ́ɛtãmma lìgamazi,
nɛɛ̀ ma wɛ̃̀ndi dãkpa,
nɛɛ̀ ma ibɛɛnↄ pↄfɛ̃ kpáɛ,
nɛɛ̀ ma mì sí kↄ̃n n gã̀sã gbãaao.
Dii é yã kɛ̀ à ò papamɛ.
Dii, n gbɛ̃kɛɛ yãana vĩro,
ǹton mamↄma kɛ̀ n ma kɛɛ tóro.