16
Nana Ludazi adua
Dauda lɛ̀.
1 Ǹ ma dãkpa Luda,
ḿbe ma nanzi.
2 Ma bè Diinɛ: Ḿbe ma Dii ũ,
n baasiro má pↄ́ maa ke vĩro.
3 N gbɛ̃ kɛ̀ aↄ̃ↄ kú bùsu kɛ̀ guunↄ,
aↄ̃mbe gakuidee kɛ̀ wà kɛ̀mɛɛnↄ ũ.
4 Gbɛ̃ kɛ̀ aↄ̃è wã wà gá tãa kiianↄ
è yã'ↄ̃amma kpá ń zĩndazimɛ.
Mɛ́ sa'o'aru kwɛ́ɛńyoro,
weé ń tãanↄ tↄ́ ma ma lɛ́zĩro.
5 Dii, ḿbe má n vĩ ndo,
n ma ka ma bakaa,
ma wɛ̃̀ndi kú n ↄzĩmɛ.
6 N tↄↄtɛ lɛ́zɛkiinↄ kɛ̀mɛ gu maaa guu,
gbaa kɛ̀ ń dàmɛɛ kɛ̀mɛ.
7 Mɛ́ Dii sáabu kpá kɛ̀ è lɛ́ dama yãnzi,
baa gwãavĩ è tó ma swɛ̃̀ ma gba làakari.
8 Mɛɛ̀gↄ̃ Dii ee ma wɛ́ɛn,
lán à kú ma ↄplaazi nà, pↄ́ke é ma degero.
9 Beee yãnzi ma pↄↄ ègↄ̃ nnazi,
ma nↄ̀sɛguu pù.
Má tãmaa vĩ kɛ̀ ma mɛ̀ égↄ̃ kuu,
10 zaakɛ nɛ́ ma tó mira guuro,
nɛ́ we n gbɛ̃ kɛ̀ kú adona yai kũro.
11 N ma da wɛ̃̀ndi zɛ́a,
ma pↄnnaa égↄ̃ pana n kiia,
pↄ́ maaanↄ égↄ̃ kú n ↄzĩ gurↄ píngi.