34
Dii maakɛna
Lɛ̀ kɛ̀ Dauda dà gurↄↄ kɛ̀ à a zĩnda dìɛ ĩadee ũ Abimɛlɛki aɛ, ai Abimɛlɛki pɛ̀a à tà.
1 Mɛ́gↄ̃ Dii tↄ́ sɛ́ɛ lezĩ gurↄ yãana sai,
mɛ́gↄ̃ à tↄ́ kpaa lán guu e dↄↄ nà.
2 Mɛ́gↄ̃ ĩa dãa Dii yã musu,
takaasideenↄ é ma aↄ̃ pↄnnaa kɛ.
3 À bítakɛɛ dↄ̃ Diinɛmao,
à tó wà à tↄ́ bↄ lɛdo.
4 Ma Dii kii wɛ̀tɛ, ben à wèmala,
à ma bↄ ma vĩanↄ guu.
5 Gbɛ̃ kɛ̀ aↄ̃ wɛ́ɛ dↄzinↄ uu égↄ̃ werena,
wí é gɛ̃ ń wɛ́ɛn zikiro.
6 Takaasidee kɛ̀ Dii sìsi, ben à wèàla,
à à bↄ̀ à nawɛ̃anↄ guu píngi.
7 Dii Malaika ègↄ̃ kú à vĩakɛrinↄ saɛ,
è ń mì sí.
8 À dã à gwa, é e kɛ̀ Dii nna,
aubarikadeen gbɛ̃ kɛ̀ nàzi ũ.
9 Dii gbɛ̃nↄ, à vĩa kɛnɛ,
pↄ́ke è kɛ̃sã à vĩakɛrinↄaro.
10 Nↄaa è músunↄ dɛ, pↄ́blee è kɛ̃sãḿma,
mↄde pↄ́ maa ke è kɛ̃sã Dii kii wɛ̀tɛrinↄaro.
11 Gbɛ̃nↄ, à mↄ́ à ma yã ma,
mà vĩakɛna Diinɛ dadaare.
12 Amↄa kɛ̀ á yezi a wɛ̃̀ndi gↄ̃ maa
bensↄ̃ á yezi a kuuna gↄ̃ nna,
13 à a lɛ́ kũ kↄ̃n yãzaa'onao,
àton tó ɛgɛɛ bↄ a lɛ́nlo.
14 À kpɛɛ li à zaaanɛ à à maaa kɛ,
à aafia zɛ́ wɛtɛ àgↄ̃ tɛ́zi.
15 Dii ègↄ̃ gbɛ̃ maaanↄ tàasi kɛɛ,
è swã kpá ń wiipɛnazi.
16 Dii è mìkpɛɛ zu zaakɛrinↄnɛ,
lɛ aↄ̃ yã tón dↄ gbɛ̃kenlo yãnzi.
17 Tó gbɛ̃ maaanↄ lɛ́ zù Diizi, è ma,
è ń bↄ ń nawɛ̃anↄ guu píngi.
18 Dii kĩi kↄ̃n gbɛ̃ kɛ̀ aↄ̃ pↄↄ yàkanↄ,
è dↄ gbɛ̃ kɛ̀ aↄ̃ uu sisinanↄlɛ.
19 Wahaa ègↄ̃ gbɛ̃ maaa lee gɛ̃̀n baaagↄ̃,
mↄde Dii è à bↄ à guu píngi.
20 È à wánↄ dãkpa píngi,
à ke è ɛ́ro, baa mɛ̀n do.
21 Kisia é gbɛ̃ zaaanↄ dɛdɛ,
yã é vɛ̃ɛ gbɛ̃ maaa ibɛɛnↄa.
22 Dii è a zↄ̀blerinↄ mì sí,
yã é vɛ̃ɛ gbɛ̃ kɛ̀ naziaro.