49
Auziki náanɛkɛna nɛ́ mìsaiyãmɛ
Kora boriinↄ lɛ̀.
Bori píngi, à yã kɛ̀kii ma,
anduna píngi, à swã kpá,
kínanↄ kↄ̃n talakanↄ,
auzikideenↄ kↄ̃n takaasideenↄ a píngi.
Ɔ̃ndↄ̃yã kú ma lɛ́n,
dↄ̃na kú ma swɛ̃̀n.
Mɛ́ swã dↄ yáasi yãzi
mà à bↄkↄ̃tɛ kɛ kↄ̃n mↄrↄlɛnao.
 
Mɛ́ vĩa kɛ yã pãsĩ gurↄↄnɛro,
baa tó ma zangurinↄ ligamazi.
Aↄ̃ ń auziki náanɛ vĩ,
aↄ̃è ń ↄↄdaa ĩa dã.
Gbɛ̃ke é fↄ̃ à gí a gbɛ̃daaanɛ gaa kɛ̀ eé à sɛ́ziro,
eé e à pↄ́ke kpá Ludaa à à wɛ̃̀ndi booro.
Zaakɛ gbɛ̃ wɛ̃̀ndi bona zĩ'ũ,
auziki é fↄ̃ à bo zikiro.
Eé fↄ̃ à tó àgↄ̃ kuu gurↄ píngiro,
eé fↄ̃ à gínɛ àton wɛ́ɛ si gɛ̀wãalɛro.
10 Zaakɛ wà dↄ̃ kɛ̀ baa ↄ̃ndↄ̃rinↄ è ga,
mìsaideenↄ kↄ̃n yↄ̃nkↄↄnↄ è kaatɛ lɛ se,
aↄ̃è ń auziki tó gbɛ̃ pãndenↄnɛ.
11 Baa kɛ̀ wà ń tↄ́nↄ kpà bùsunↄnɛ yã,
aↄ̃ mira égↄ̃ dɛ ń bɛɛ ũmɛ gurↄ píngi,
eégↄ̃ ń kúkii ũ ai ń boriia.
 
12 Gbɛ̃ntee kↄ̃n a bɛ̀ɛkɛɛo
ègↄ̃ kuu gurↄ píngiro,
eé kaatɛ lán nↄ̀bↄnↄ bàmɛ.
13 Mìsaideenↄ yãanan gwe,
lɛn à dɛ lɛ dↄ kↄ̃n gbɛ̃ kɛ̀ aↄ̃ↄ tɛ́ ń tuubazinↄ.
14 Aↄ̃é si gɛ̀wãan lán sãanↄ bà,
gaa bé eégↄ̃ dɛ ń dã̀ri ũ,
gbɛ̃ maaanↄ é kí bleḿma ziaa zĩ.
Aↄ̃ mɛ̀nↄ é yai kũ miran,
gɛ̀wãa bé eégↄ̃ dɛ ń bɛɛ ũ.
15 Mↄde Luda é ma wɛ̃̀ndi sí gɛ̀wãaa
à gbãakɛ kpámazi.
 
16 Tó gbɛ̃ e kɛɛ auzikidee ũ
bensↄ̃ à bɛ tↄ́ nnaa e kaara,
ǹton tó à kɛnnɛ yãke ũro,
17 zaakɛ eé e à pↄ́ke sɛ́ à táo a gagurↄro,
à auzikinↄ é pɛ́ɛziro.
18 Baa tó à a zĩnda dↄ̃̀ aubarikadee ũ a wɛ̃̀ndi gurↄ
bensↄ̃ wà à sáabu kpà à nnamana yãnzi,
19 eé ká a dezinↄlamɛ,
eé wɛ́ɛ si gupuraalɛ ziki dↄro.
20 Gbɛ̃ntee kↄ̃n a bɛ̀ɛkɛɛo,
tó à wɛ́ɛ e kɛ̃ro,
eé gɛ̃tɛ lán nↄ̀bↄnↄ bàmɛ.