58
Gbɛ̃ zaaanↄ tona kↄ̃n Ludao
Dauda lɛ̀.
1 Gbãadeenↄ, eè yã o a zɛ́a sↄ̃ↄ́?
Eè yãkpaɛ kɛ kↄ̃n gbɛ̃nↄo súusuↄ́?
2 Eè yã zaa wàari pá a swɛ̃̀ guu,
eè gbãaa mↄ gbɛ̃nↄnɛ a bùsun.
3 Gbɛ̃ zaaanↄ sã̀sã zaa ń igurↄmɛ,
ɛgɛdeenↄ yàka zaa ń da gbɛɛɛmmɛ.
4 Aↄ̃ lɛ́gbɛ dɛ lán mlɛ̃̀ sɛwɛɛ bà,
aↄ̃ↄ dɛ lán kárɛ kɛ̀ à a swã tàta bà,
5 lɛ àton a kↄ̃kↄ̃'ori gaasia ↄ́ maro,
lɛ mlɛ̃̀ pì tón a dabokɛri gonikɛɛ ero.
6 Luda, ǹ ń swaa ɛ́'ɛńnɛ ń lɛ́n,
Dii, ǹ músu pìnↄ swaa sↄ̃ntɛnↄ ɛ́'ɛńnɛ.
7 Ǹ tó aↄ̃ gɛ̃ zɛ́la lán í bàalɛna bà.
Tó aↄ̃ sá gà, ǹ ń kànↄ ɛ́'ɛńnɛ.
8 Ǹ tó aↄ̃ kori kũ zɛ́n lán kↄntↄ lóu bà,
aↄ̃gↄ̃ dɛ lán nↄ̀bↄɛnɛ kɛ̀ èe ↄfãntɛ̃ eroo bà.
9 Ai yàka tɛ́ gↄ̃ oroo wã,
gbɛ̃ zaaanↄ é gɛ̃ ĩa.
10 Gbɛ̃ maaanↄ é pↄnnaa kɛ,
zĩ kɛ̀ Luda gɛ̃ɛ bòńnɛ gbɛ̃ zaaanↄa,
kɛ̀ aↄ̃ ń gbá pìpi ń aru guu.
11 Gbɛ̃nↄ é be: Gbɛ̃ maaanↄ láada vĩ fá!
Ludaa kuu, è yãkpaɛ kɛ anduna guu.