62
Ludan utɛkii ũ
Dauda lɛ̀.
1 Luda ado bé à tò ma làakari kpáɛna,
àmbe è ma mì sí.
2 Àmbe ma gbɛ̀si ũ kↄ̃n ma mìsirio,
mɛɛ̀ gbãa ea, mɛ́ nigã zikiro.
3 Gɛ̃̀n ũgban égↄ̃ fɛɛɛ gbɛ̃zi?
É à nɛ lán gũ̀ kɛ̀ ɛ̀ à kpán
ke kara zi wↄ̀kↄwↄkↄ bàn yↄ́?
4 À guna a tíla lɛ́n ée kpaakↄ̃sↄ̃,
ɛgɛtona bé è kɛare nna.
Eè sa maaa o gbɛ̃nɛ kↄ̃n lɛ́omɛ,
ben eè ń ká a swɛ̃̀ guu.
5 Luda ado bé à tò ma làakari kpáɛna,
zaakɛ àpin ma wɛ́ɛ dↄzi.
6 Àmbe ma gbɛ̀si ũ ma mìsiri ũ,
mɛɛ̀ gbãa ea, mɛ́ nigã zikiro,
7 Ma aafia kↄ̃n ma bɛ̀ɛo è bↄ à kiiamɛ,
àmbe ma gbɛ̀si gbãaa ũ, ma utɛkii ũ.
8 Gbɛ̃nↄ, àgↄ̃ à náanɛ kɛɛ gurↄ píngi,
à a swɛ̃̀ wɛ̃nɛ, àmbe wa utɛkii ũ.
9 Talakanↄↄ dɛ lán lɛ́'ĩa bàmɛ,
gbãadeenↄ e ká pↄ́ke lɛ́zĩro.
Tó wà ń yↄ̃ kilooa,
aↄ̃ píngi égↄ̃ dɛ fákuumɛ.
10 Àton gbɛ̃ble'ↄↄ náanɛ kɛro,
àton ĩa dã kↄ̃n kpãi pↄ́oro.
Tó a auziki e kↄ̃ↄ,
àton tó a swɛ̃̀ gↄ̃ kúaro.
11 Yã mɛ̀n doon Ludaa ò,
yã mɛ̀n plaaa kɛ̀nↄn má mà:
Luda, ḿbe ń gbãaa vĩ,
12 Dii, ḿbe ń gbɛ̃kɛɛ vĩ,
ben nɛɛ̀ fĩa bo baadenɛ a yãkɛnaa.