68
Luda bítakɛɛ
Dauda lɛ̀.
Luda é fɛɛ, à ibɛɛnↄ é fãakↄ̃a,
à zangurinↄ é bàa lɛ́nɛ.
Lán tɛ́sukpɛ è gɛ̃ kↄ̃n ĩao nà,
ǹ tó aↄ̃ gɛ̃tɛ lɛ.
Lán zↄ́sa è yↄ́ nà tɛ́ saɛ,
zaakɛrinↄ é kaatɛ Luda aɛ lɛ.
Gbɛ̃ maaanↄ sↄ̃ pↄnnaa kɛ,
aↄ̃ yáa dↄ Luda aɛ,
aↄ̃ vĩvĩ kↄ̃n pↄnna bítao.
 
À lɛ̀ sí Ludanɛ à lɛ́ maa,
à di ludambɛ luguua, à à tↄ́ bↄ,
à tↄ́n Dii, à pↄnna wii pɛ́ à aɛ.
Kuuna a kpɛ́ kɛ̀ kú adona guu,
Luda nɛ́ tonɛnↄ demɛ,
gyaanↄnↄ zɛnyodeemɛ.
Luda è bɛɛ kɛ gbɛ̃ kɛ̀ gbɛ̃ vĩroonɛ,
è pisinanↄ bↄɛ à ń da nnamanan,
swãgbãadeenↄ sↄ̃ égↄ̃ kú gukori guumɛ.
 
Luda, kɛ̀ n dↄ n gbɛ̃nↄnɛ aɛ,
gurↄↄ kɛ̀ n táa òńyo gbáan,
tↄↄtɛ nìgãnigã, ludambɛɛ lou gbàrɛ n aɛ,
mmↄn kɛ̀ n yã ò Sinai kpiii musu aɛ,
Luda, Isarailinↄ Luda.
 
Luda, ń tò mↄdↄ kpà ń bùsua kↄ̃sↄ̃kↄ̃sↄ̃,
n n gbɛ̃ kpasananↄ gbà gbãaa.
10 N gbɛ̃nↄ vɛ̃̀ɛ à guu, Luda,
ben n wɛ̃ndadeenↄ gbà pↄ́ n maakɛɛ yãnzi.
 
11 Dii yã ò,
ben nↄgbɛ̃nↄ gↄ̃̀ à baarukparinↄ ũ pari.
12 Kínanↄ kↄ̃n ń zĩ̀kpɛɛnↄↄ e bàa lɛɛ kpakpaa,
nↄgbɛ̃ kɛ̀ aↄ̃ gↄ̃̀ bɛɛnↄↄ e ń pↄ́nↄ kpaatɛtɛ.
13 Baa kɛ̀ a daɛ kpàsa gura,
kondogi í kú ma pↄ̃tɛ̃ɛ dɛ̀bɛnↄa,
à kãnↄↄ e tɛ́ kɛɛ lán vura bà.
14 Kɛ̀ Gbãapingide kínanↄ fã̀akↄ̃a,
aↄ̃ kwɛ̀ Zalamↄ kpiiia lán lougbɛ bà.
 
15 Basã kpiii gakui vĩ,
Basã kpii mìsↄ̃ntɛ̃nↄↄ pari.
16 Amↄa kpii mìsↄ̃ntɛ̃nↄ,
bↄ́yãnzin ée kpiii kɛ̀ Ludaa sɛ̀
a kíblekii ũu gwaa nↄ̀sɛgↄ̃aanↄozi?
Gwen Dii égↄ̃ kún gurↄ píngi.
17 Luda sↄ̃goronↄↄ lɛ́ vĩro,
à kà bↄrↄ lɛo ũgbangba.
Dii bↄ̀o zaa Sinai,
à mↄ̀ à pìta a guu kɛ̀ kú adonan.
18 N fɛɛ n ta musu dↄna zĩ̀zↄnↄnɛ aɛ,
n gbaa sì gbɛ̃nↄa ai kↄ̃n swãgbãadeenↄ,
ben n vɛ̃ɛ gwe, Dii Luda.
 
19 Aubarikadeen Dii Luda wa mìsiri ũ,
àmbe ègↄ̃ wa asoonↄ sɛna lán guu e dↄↄ nà.
20 Wa Luda nɛ́ Luda kɛ̀ è ń mì símɛ,
Dii Luda bé è wa bↄ gaa lɛ́zĩ.
 
21 Luda é a ibɛɛnↄ mì wíwińnɛ,
gbɛ̃ntee mìkpɛ̃ɛ kãdee kɛ̀ aↄ̃ↄ tɛ́ ń durun-onↄ.
22 Dii bè: Mɛ́ ń bↄɛ Basã bùsun,
mɛ́ ń bↄɛ ísia lↄ̀n,
23 lɛ à a gbá ya a ibɛɛnↄ arun,
a gbɛ̃ɛnↄ é nɛ́nɛ máɛn wà ń baka ble.
 
24 Luda, wa n gbɛ̃nↄ è aↄ̃ↄ tɛ́tɛkↄ̃zi,
ma Luda ma Kína, aↄ̃ↄe mↄↄ n kúkiia.
25 Lɛ̀sirinↄↄ tɛ́ aɛ, batanↄↄ tɛ́ ń kpɛɛ,
nↄkparɛ sɛ̃gɛ̃sɛ̃gɛ̃parinↄↄ tɛ́ ń gura.
26 À Luda tↄ́ bↄ pari kakↄ̃ana guu,
à Dii sáabu kpá amↄa Isaraili boriinↄ.
27 Nɛ́ zãade Bɛyãmi boriinↄ bé aↄ̃ↄ tɛna aɛ gwe,
beee gbɛra Yuda kínɛnↄ kↄ̃n ń gbɛ̃nↄ
kↄ̃n Zɛbuluni bori kínɛnↄ
kↄ̃n Nafatali bori kínɛnↄo.
 
28 Luda, ǹ n gbãaa ↄdↄawe,
Luda, ǹ bↄ kↄ̃n n gbãaa kɛ̀ ń ↄ̀dↄawe yãao.
29 Kínanↄ é mↄ́nnɛ kↄ̃n ń gbaanↄ
n kpɛ́ kɛ̀ kú Yerusalɛmu yãnzi.
30 Ǹ kpãkɛ̃ Igipiti ítɛnↄbↄzi,
ǹ pata boriinↄ zùswareenↄa kↄ̃n ń gbɛ̃nↄo.
Ǹ kondogi gò tↄ̃ḿma,
ǹ gbɛ̃ kɛ̀ zĩ̀kana è kɛńnɛ nnaanↄ fãakↄ̃a.
31 Igipitinↄ é zĩ̀rinↄ gbarɛmma,
Etiopianↄ é ↄ dↄnzi, Luda.
 
32 Anduna kpatablerinↄ, à lɛ̀ sí Ludanɛ,
à Dii táaki lɛ́,
33 àmↄ kɛ̀ à di ludambɛɛ kɛ̀ kuu zaa ziziia.
À ma, èe pũtãa gbãngbãn.
34 À Luda gbãaa kpàakpa kɛ,
wà à bítakɛɛ dↄ̃ Isarailinↄa,
à gbãaa kú ludambɛ puraan.
35 Luda, ń naasi vĩ n kúkiia,
Isarailinↄ Luda è gbãaa kↄ̃n ikoo kpá a gbɛ̃nↄa.
 
Aubarikadeen Luda ũ!