71
Mare ìsi aduakɛna
Dii, ḿbe ma nanzi,
ǹton tó wí ma kũ zikiro.
Ǹ ma bↄ ǹ ma mì sí n maakɛna yãnzi,
ǹ swã kpámazi ǹ ma faaba kɛ.
Ǹgↄ̃ dɛ ma utɛki gbɛ̀ kɛ̀ mɛ́gae gá utɛn ũ.
Ń dìɛ ǹ ma mì sí,
zaakɛ ma gbɛ̀si kↄ̃n ma zɛki gbãaaon n ũ.
Ma Luda, ǹ ma bↄ zaakɛrinↄ ↄzĩ,
ǹ ma si gbɛ̃ zaa pãsĩnↄa.
 
Ḿbe ma wɛ́ɛ dↄnzi, Dii Luda,
ḿbe má n náanɛkɛna zaa ma gↄ̃kparɛkɛgurↄ.
Ma gbãa èmma zaa ma igurↄ,
ḿbe n ma bↄ ma da gbɛɛɛn.
N táakin mɛɛ̀gↄ̃ lɛɛ.
Ma kuuna dɛ yãbↄnsaɛ ũ gbɛ̃nↄnɛ pari,
zaakɛ ḿbe ma utɛki gbãaa ũ.
N táakilɛna ègↄ̃ da ma lɛ́n,
mɛɛ̀gↄ̃ n maakɛɛ boo kↄngↄ kↄ̃n uusiɛo.
 
Ǹton ma tón ma zikũkɛɛ yãnziro,
ǹton ma zĩnna ma gbãa yãana yãnziro.
10 Zaakɛ ma ibɛɛnↄↄ e ma pee,
ma wɛdɛrinↄↄ e lɛ́ kpaakↄ̃sↄ̃mazi ma wɛ̃̀ndi bↄna yãnzi.
11 Aↄ̃ bè: Luda gìzimɛ nɛ́, wà pɛ́a wà kũ,
gbɛ̃ke kuu kɛ̀ à à mì síro.
12 Luda, ǹton kɛmao zã̀ro,
ma Luda, ǹ kɛ kpaa ǹ mↄ́ ǹ dↄmalɛ.
 
13 Ǹ tó wí gbɛ̃ kɛ̀ aↄ̃ↄe yã diimaanↄ kũ
lɛ aↄ̃ kaatɛ,
ǹ tó sↄ̃sↄ̃ da gbɛ̃ kɛ̀ aↄ̃ↄe wɛ́ɛ tãmaanↄla
lɛ aↄ̃ tↄ́ yaka.
 
14 Mapi sↄ̃, ma wɛ́ɛ égↄ̃ dↄnzi,
mɛ́gↄ̃ n táaki lɛɛ màgↄ̃ gaa.
15 N maakɛna égↄ̃ da ma lɛ́n gurↄ píngi
kↄ̃n n mìsina kɛ̀ má à lɛ́ dↄ̃rooo.
16 Mɛ́ mↄ́ mà n gbãabitakɛyãnↄ o, Dii Luda,
n mɛ̀n do maakɛɛn mɛ́ à kpàakpa kɛ gbɛ̃nↄnɛ.
17 N yã dàmɛ zaa ma gↄ̃kparɛkɛgurↄ,
Luda, ai tia mɛ́ɛ n yãbↄnsaɛnↄ oo.
18 Baa kɛ̀ ma zi kũ̀, ma mìkã pura,
ǹton ma tónlo, Luda,
lɛ mà e mà n gbãaa tↄ̃kɛ̃ tiadeenↄnɛ,
mà n gbãakɛyã da gbɛ̃ kɛ̀ aↄ̃ↄe fɛɛnↄnɛ ń píngi.
 
19 Luda, n maakɛna zↄ̃̀ sↄsↄnɛnↄa,
n yã bíta kɛ̀, dén weé lɛ́kↄ̃zinyo?
20 Ń tò nawɛ̃a pãsĩ ma le paripari,
mↄde nɛ́ ɛara ǹ ma gba wɛ̃̀ndi dↄ,
nɛ́ ɛara ǹ ma bↄ tↄↄtɛ guu.
21 Nɛ́ ma bɛ̀ɛ kaaramɛ,
nɛ́ ɛara ǹ ma làakari kpáɛmɛ dↄ.
22 Ma Luda, mɛ́ n sáabu kpá
kↄ̃n mↄrↄo n náanɛkɛɛ yãnzi.
Isarailinↄ Luda kɛ̀ ń kú adona,
mɛ́ n táaki lɛ́ kↄ̃n kungidio.
23 Guda égↄ̃ dↄ ma lɛ́n,
mamↄma kɛ̀ n ma mì sì mɛ́ n táaki lɛ́.
24 Mɛ́gↄ̃ n yãmaakɛna oo gurↄ píngi,
zaakɛ wí gbɛ̃ kɛ̀ aↄ̃ ma wɛtɛ zaaaonↄ kũ̀,
aↄ̃ gↄ̃̀ kↄ̃n bídio.