79
Wɛ̃nda ↄ́ↄdↄna Yerusalɛmu wina yã musu
Asafa lɛ̀.
1 Luda, bori pãndenↄ sì n bùsun,
aↄ̃ n kpɛ́ kɛ̀ à kú adona yàka,
aↄ̃ Yerusalɛmu wìwi wà dàɛ.
2 Aↄ̃ n zↄ̀blerinↄ gɛ̀ kpà bãanↄa,
aↄ̃ n yãmarinↄ mɛ̀ tò nↄ̀bↄ pãsĩnↄnɛ pↄ́blee ũ.
3 Wà ń aru kwɛ̀ɛ lán í bà Yerusalɛmu bĩikpɛɛ,
gbɛ̃ke kuu à ń vĩiro.
4 Wa gↄ̃ sↄ̃sↄ̃na pↄ́ ũ wa saɛdeenↄnɛ,
fabona pↄ́ ũ gbɛ̃ kɛ̀ aↄ̃ↄ ligawazinↄnɛ.
5 Dii, nɛ́gↄ̃ pↄ fɛ̃ɛwazi ai bↄrɛmɛ?
N pɛ̃tɛ̃ tɛ́ égↄ̃ kũu gurↄ píngin yↄ́?
6 Ǹ pↄfɛ̃ pita borii kɛ̀ aↄ̃ↄ n dↄ̃roonↄa,
gbɛ̃ kɛ̀ aↄ̃è n sísiroonↄ bùsunↄa.
7 Zaakɛ aↄ̃ Yakubu boriinↄ blè,
aↄ̃ ń bùsu dɛ̀.
8 Ǹton wa denↄ durunnↄ wí wa musuro.
Ǹ wɛ̃nda dↄ̃we kpakpaa,
zaakɛ wa busa wa gↄ̃ búgubugu.
9 Ǹ dↄwalɛ, Luda wa mìsiri.
Ǹ wa mì sí lɛ n tↄ́ bↄ,
ǹ wa durunnↄ kɛ̃we n tↄ́ yãnzi.
10 Bↄ́yãnzin nɛ́ tó bori pãndenↄ wa la wà be:
Wa Ludaa kú mámɛee?
Ǹ tó bori pãndenↄ gↄ̃ dↄ̃ wa wáa
kɛ̀ nɛɛ̀ n zↄ̀blerinↄ dɛdɛna gɛ̃ɛ boḿma.
11 Ǹ tó zĩ̀zↄnↄ ↄ́ↄdↄna gɛ̃ n swãn,
ǹ gbɛ̃ kɛ̀ aↄ̃ↄ kú ga lɛ́zĩ pìnↄ bↄ
kↄ̃n n gã̀sã gbãaao.
12 Ǹ lalandi kɛ̀ bori pãnde kɛ̀ ligawazinↄↄ kɛ̀nnɛɛ
fĩa boḿma gɛ̃̀n swɛɛplaa, Dii.
13 Wamↄwa n gbɛ̃nↄ, n kpàsa sãanↄ,
wé gbasa wàgↄ̃ n sáabu kpaa gurↄ píngi,
wégↄ̃ n tↄ́ tↄ̃kɛ̃ɛńnɛ ai wa boriia.