90
Luda kↄ̃n gbɛ̃nteeo
Luda gbɛ̃ Musa aduakɛna.
Dii, wa utɛkiin n ũ wɛ̃̀ kↄ̃n wɛ̃̀o.
Lɛ ń kpɛ́ ǹ kpiiinↄ kɛ,
lɛ ń kpɛ́ ǹ tↄↄtɛ kↄ̃n andunao káɛ,
Ludan n ũ zaa káaku ai gurↄ píngi.
 
Ń dìɛ kɛ̀ gbɛ̃ntee é sↄkpa tↄↄtɛ,
nɛɛ̀ beńnɛ aↄ̃ ɛara bùsutin.
Wɛ̃̀ wàa sↄↄroo dɛnnɛ lán gurↄ doo bà,
à dɛnnɛ lán gĩa ke gwãavĩ zaka bà.
Nɛɛ̀ gbɛ̃ntee sɛ́ kↄ̃n ga'iio,
aↄ̃ↄ dɛ lán sɛ̃̀ yĩi bà kↄngↄ.
È bↄɛ kↄngↄ à gbã,
è yitoo kũ à gaga uusiɛ.
 
N pↄfɛ̃ è wa kaatɛ,
n patammana è swɛ̃̀ kɛ̃wagu.
Wa yã zaaanↄ kaɛna n aɛ,
wa asiiyãnↄ bↄ̀ gupuraaa n kuu.
Wa gurↄↄ è gɛ̃tɛ n pɛ̃tɛ̃ yãnzi,
wa wɛ̃̀ndi è yãa kↄ̃n m̀bnao.
10 Wa wɛ̃̀ è ká baaagↄ̃ akuri,
tó wá gbãa sↄ̃, basiigↄ̃.
Nawɛ̃a kↄ̃n pↄsiaaon wɛ̃̀ pìnↄ è mↄ́owe,
aↄ̃è gɛ̃tɛ gↄ̃ↄgↄ̃ↄ, ben weè kpá guuzi.
 
11 Dé bé à n pↄfɛ̃ gbãa lɛ́ dↄ̃ↄ?
N pɛ̃tɛ̃ bíta kà vĩa kɛ̀ à dɛ wà kɛnnɛɛ ũ.
12 Ǹ dawe wàgↄ̃ wa wɛ̃̀ndi kusukɛ lɛ́ dↄ̃,
lɛ wà ↄ̃ndↄ̃ↄ e wa swɛ̃̀ guu.
 
13 Dii, bↄrɛn nɛ́ n pↄfɛ̃ kpáɛɛ?
Ǹ n zↄ̀blerinↄ wɛ̃nda gwa.
14 Ǹ tó n gbɛ̃kɛɛ mↄ́wa lán guu e dↄↄ nà,
lɛ wàgↄ̃ pↄnnaa kɛɛ kↄ̃n gudakɛnao ai wa gurↄ lɛ́n.
15 Ǹ wa pↄↄ kɛ nna ↄↄ kɛ̀ ń tↄ̃̀wa gurↄ lɛ́n,
nawɛ̃a kɛ̀ wá kɛ̀ wɛ̃̀ lɛ́n.
16 Ǹ n yãkɛnanↄ ↄdↄa wamↄwa n zↄ̀blerinↄnɛ,
ǹ tó wa nɛ́nↄ n gbãaa gakui dↄ̃.
 
17 Dii wa Luda, ǹ tó wà n pↄnnaa e,
ǹ tó wa zĩi kaarana e,
ee, ǹ tó wa zĩi kaarana e.