96
Diin Kí bíta ũ
1 À lɛ̀ dufu sí Diinɛ,
anduna gbɛ̃ píngi, à lɛ̀ sí Diinɛ.
2 À lɛ̀ sí Diinɛ à à tↄ́ bↄ,
àgↄ̃ à mìsina baaru kpaa lán guu e dↄↄ nà.
3 À à gakuikɛyã o boriinↄnɛ,
à à yãbↄnsaɛnↄ tↄ̃kɛ̃ baade pínginɛ.
4 Dii bíta, à kà wà à táaki lɛ́,
à kↄ̃ sìo wà vĩa kɛnɛ dɛ tãanↄla ń píngi.
5 Boriinↄ tãanↄ nɛ́ pↄ́ ginanↄmɛ,
mↄde Dii bé à musu kɛ̀.
6 Bítakɛ kↄ̃n bɛ̀ɛo kúa,
gbãa kↄ̃n gakuio kú à kúkiiamɛ.
7 À gakui kↄ̃n gbãaao dↄ̃ Diinɛ,
bùsu píngi gbɛ̃nↄ, à dↄ̃ Diinɛ.
8 À Dii tↄ́ gakui dↄ̃nɛ,
à mↄ́ kↄ̃n gbaao à gɛ̃o à ua.
9 À dↄnzi kɛ Diinɛ à kúadona maakɛɛn,
tↄↄtɛdeenↄ, àgↄ̃ lugaa à aɛ a píngi.
10 À o boriinↄnɛ, Dii e kí blee.
Anduna kaɛna gíngin, à nigãna vĩro,
eé yãkpaɛ kɛ kↄ̃n baade píngio a zɛ́a.
11 Musudeenↄ, à pↄnnaa kɛ,
tↄↄtɛdeenↄ, à vĩ kↄ̃n pↄnnaao,
ísia kↄ̃n pↄ́ kɛ̀ kúnnↄ, à kĩi dↄ.
12 Sɛ̃̀tɛ kↄ̃n pↄ́ kɛ̀ kúnnↄ, à pↄnna wii lɛ́,
lí kɛ̀ kú dàko guunↄ, à guda kɛ a píngi.
13 Aↄ̃é pↄnnaa kɛ Dii aɛ, zaakɛ èe mↄↄ,
èe mↄↄ yãkpaɛ kɛ kↄ̃n andunao.
Eé yãkpaɛ kɛ kↄ̃n andunao a zɛ́a,
à yã gↄ̃gↄ̃ gbɛ̃nↄnɛ kↄ̃n yãpuraao.