9
Samuɛli kↄ̃'ena kↄ̃n Soluo
1 Bɛyãmi bori kee kuu, à tↄ́n Kisi. Auzikideemɛ. Bɛyãmi borii bé à Afia ì, Afia Bekora ì, Bekora Zero ì, Zero Abiɛli ì, ben Abiɛli Kisi pì ì.
2 À nɛ́gↄ̃gbɛ̃ vĩ, à tↄ́n Solu. Gↄ̃kparɛ maaamɛ. À maa sáa kú Isarailinↄ tɛ́ro, aↄ̃ gbɛ̃ke gbã̀a e vĩ à gã̀nlaro.
3 Kɛ̀ Kisi pì zaakinↄ sã̀sã, ben à bè a nɛ́ pìnɛ: Ǹ fɛɛ ǹ zĩkɛrinↄ mɛ̀n doo sɛ́ à gá zaaki pìnↄ wɛtɛ.
4 Ben aↄ̃ Ɛflaimu bùsu gusĩsĩdee pàra kↄ̃n Salisa bùsuo, aↄ̃ↄe ń ero. Ben aↄ̃ Salimu bùsu pàra, mↄde aↄ̃ↄ kú gwero. Ben aↄ̃ Bɛyãmi bùsu pàra, aↄ̃ↄe zaaki pìnↄ ero.
5 Kɛ̀ aↄ̃ kà Zufu bùsun, Solu bè zĩkɛri kɛ̀ aↄ̃ↄ tɛ́ lɛdoo pìnɛ: Ǹ mↄ́ wà ɛara. Tó wée táro, ma maree é bídi kɛ wa yãzi, eé zaakinↄ yã da dↄro.
6 Ben à wèàla: Ǹ ma! Luda gbɛ̃kee kú wɛ́tɛ kɛ̀ guu. À bɛ̀ɛ vĩ, yã kɛ̀ à ò bé è kɛ. Wà gá gwe. Ke eé zɛ́ kɛ̀ wé sɛ́ wà wa zaaki pìnↄ eo owe gwɛɛ.
7 Ben Solu wèàla à bè: Tó wée gaa, bↄ́n wé gáonɛ? Pↄ́ble kee e gↄ̃ wa bↄ̀kↄn dↄro. Wá pↄ́ke vĩ wà Luda gbɛ̃ pì gbaro. Ke bↄ́n wá vĩi?
8 Ben zĩkɛri pì ɛ̀ara à bè Solunɛ: Ǹ gwa! Má ↄↄ vĩ féte kɛ̀. Mɛ́ à gba, eé wa da zɛ́ kɛ̀ dɛ wà sɛ́a.
9 Isarailinↄ bùsun yã, tó gbɛ̃ e gaa yã gbeka Ludaa è be: Ǹ mↄ́ wà gá wɛ́ɛgupu'eri kiia. Zaakɛ gbɛ̃ kɛ̀ wè sísi gbã̀a annabi ũ, àmbe wè sísi yã wɛ́ɛgupu'eri ũ.
10 Ben Solu bè a zĩkɛrinɛ: N yã maaa ò. Wà gá. Ben aↄ̃ↄe gaa wɛ́tɛ kɛ̀ Luda gbɛ̃ pì kún-a.
11 Kɛ̀ aↄ̃ↄe wɛ́tɛ pì sĩ̀sĩ kũu, aↄ̃ dàkↄ̃rɛ kↄ̃n nↄkparɛnↄ, aↄ̃ↄe gaa í tↄ́. Ben aↄ̃ ń lá wà bè: Wɛ́ɛgupu'eri kú bɛↄ́?
12 Aↄ̃ wèńla wà bè: Eè, à kú aɛ gwe. À kɛ kpakpaa. Gbã̀an à sù, zaakɛ wà yezi wà saa o gbãgbãkiiamɛ.
13 Tó a gɛ̃ wɛ́tɛn, é à e ai àgↄ̃ gá pↄ́ ble gbãgbãkii pìa. Zaakɛ weé pↄ́ ble gĩaro, à gↄ̃̀ ai à mↄ́, àpi bé eé aubarika da sa'opↄbleen gĩa, gbasa gbɛ̃ kɛ̀ wà ń sísinↄ pↄ́ ble. Àgↄ̃ wãa, zaakɛ à egurↄ zakan yɛ̀.
14 Kɛ̀ aↄ̃ gɛ̃̀ wɛ́tɛ pì guu, ben aↄ̃ dàkↄ̃rɛ kↄ̃n Samuɛlio gↄ̃ↄ, à bↄ̀ èe gaa gbãgbãkii pìa.
15 Ai Solu gↄ̃ gá mↄ́, Dii gĩakɛ à yã kɛ̀ dà Samuɛlinɛ a swãla à bè:
16 Zia mↄndaa'i mɛ́ Bɛyãmi bùsu gbɛ̃ zĩmma. Ǹ nↄ́si kúa ǹ à diɛ ma gbɛ̃ Isarailinↄ dↄn'aɛdee ũ. Eé ma gbɛ̃ pìnↄ bↄ Filisitininↄ ↄzĩ. Ma a gbɛ̃ pìnↄ wiii mà, ben ma ń wɛ̃nda gwà.
17 Kɛ̀ Samuɛli Solu è, Dii bènɛ: Gbɛ̃ kɛ̀ ma à yã ònnɛɛ pìn gwe. Àmbe eé kí ble ma gbɛ̃nↄnɛ.
18 Ben Solu sↄ̃̀ Samuɛlizi wɛ́tɛ bĩilɛa à à là à bè: Wɛ́ɛgupu'eri bɛɛ kú mámɛ? Ǹ ↄdↄamɛ.
19 Ben Samuɛli wèàla à bè: Mámbe adee pì ũ. Ǹ dↄmɛ aɛ wà gá gbãgbãkiia, nɛ́ pↄ́ blemao gbã̀a. Zia kↄngↄ mɛ́ n nↄ̀sɛguuyã onnɛ píngi, gbasa mà n gbarɛ.
20 Ǹton n zaaki kɛ̀ sã̀sã zaa gurↄ aagↄ̃ↄnↄ damu kɛro, zaakɛ wà ń é. Dén Isarailinↄↄ yezi ń píngii, tó èe kɛ mpi kↄ̃n n de bɛdeenↄ baasiro?
21 Ben Solu bè: Bɛyãmi boriin ma ũroo? Ma borii bé à nɛ́ngo dɛ Isaraili boriinↄla ń píngi, ben ma danɛnↄ bé wà kɛ̃sãnańzi Bɛyãmi boriinↄ tɛ́. Bↄ́yãnzi nɛ́ɛ yã beee taka oomɛzi?
22 Ben Samuɛli Solu kↄ̃n a zĩkɛrio sɛ̀ à gɛ̃̀ńyo pↄ́blekpɛn, à vɛ̃ɛki maaa kpàḿma gbɛ̃ kɛ̀ wà ń sísinↄ tɛ́. Gbɛ̃ pìnↄ kà gↄ̃ↄn baaakuri taka bà.
23 Ben Samuɛli bè pↄ́blekɛrinɛ: Ǹ nↄ̀bↄ kɛ̀ má kpàmma ma bè ǹ à diɛkii kɛɛ pì sɛ́ ǹ mↄ́o.
24 Ben pↄ́blekɛri pì mↄ̀ kↄ̃n nↄ̀bↄ gbá pìo à dìɛ Solu aɛ. Ben Samuɛli bè: Pↄ́ kɛ̀ wà dìɛnnɛɛn yɛ̀. Ǹ só, zaakɛ wà dìɛnnɛ ai mↄndaa'i kↄ̃n gbɛ̃ kɛ̀ ma ń sísinↄ. Ben Solu pↄ́ blè kↄ̃n Samuɛlio zĩ beeea.
25 Kɛ̀ aↄ̃ pìta gbãgbãkii pìa, aↄ̃ gɛ̃̀ wɛ́tɛ guu, ben Samuɛli gàa à yã ò kↄ̃n Soluo a kpɛ́ musu.
26 Ben aↄ̃ ì gwe. Kɛ̀ guu yezi à dↄ, ben Samuɛli lɛ́ zù Soluzi kpɛ́ musu gwe à bè: Ǹ fɛɛ, mà gá zɛnnɛ. Kɛ̀ Solu fɛ̀ɛ, àpi kↄ̃n Samuɛlio aↄ̃ bↄ̀ bàazi ń plaaa.
27 Kɛ̀ aↄ̃ kà wɛ́tɛ kpɛɛ, ben Samuɛli bè Solunɛ: Ǹ o n zĩkɛrinɛ àgↄ̃ gaa, mpi ǹ zɛ gĩa lɛ mà yã kɛ̀ Dii ò onnɛ.