1 Kɛ̀ í kɛ̃̀ tↄↄtɛa, gurↄↄ kɛ̀ kínanↄ è gá zĩ̀ ká, ben Dauda Yoabu zĩ̀ kↄ̃n a ìbanↄ kↄ̃n Isarailinↄ ń píngi. Aↄ̃ Amↄninↄ ásaru kɛ̀, ben aↄ̃ lìga Rabazi. Dauda sↄ̃ↄ kú Yerusalɛmu. 2 Kɛ̀ uusiɛ kɛ̀, ben Dauda fɛ̀ɛ a gádoa, èe ligaa a kpɛ́ musu. Zaa kpɛ́ musu gwe ben à nↄgbɛ̃ ke è, èe zú oo. Nↄgbɛ̃ pì nɛ́ nↄ maaamɛ maamaa, 3 ben à gbɛ̃ zĩ̀ wà nↄgbɛ̃ pì yã gbeka. Ben wà bènɛ: Ɛliamu nɛ́ Basɛban gwe, Iti bori Uria naↄ̃mɛ. 4 Ben Dauda gbɛ̃nↄ zĩ̀ wà à sísi. Kɛ̀ à mↄ̀, ben Dauda dàɛo, ben nↄgbɛ̃ pì tà bɛ. Àɛ sↄ̃ à zúbaɛ gbãsĩ bↄ̀ dufumɛ. 5 Kɛ̀ à nↄ̀ sì, ben à lɛ́kpãsã kɛ̀ Daudanɛ à bè a nↄ̀ sì.

6 Ben Dauda gbɛ̃ zĩ̀ Yoabua à bè: Ǹ Iti bori Uria gbarɛmɛ. Ben Yoabu à gbàrɛnɛ. 7 Kɛ̀ Uria pì mↄ̀, ben Dauda Yoabu aafia gbèka kↄ̃n zĩ̀kpɛɛnↄ kↄ̃n zĩ̀ kɛ̀ aↄ̃ↄe kaao. 8 Ben Dauda bènɛ: Ǹ tá bɛ ǹ zú o. Kɛ̀ Uria bↄ̀ kíbɛ, ben kína gbɛ̃ zĩ̀a kↄ̃n pↄ́bleeo. 9 Mↄde Uria e tá a bɛro, kíbɛ gãnu guun à ìn kↄ̃n kíbɛ zĩkɛrinↄ. 10 Kɛ̀ wà ò Daudanɛ wà bè, Uria e tá a bɛro, ben à Uria là à bè: À dɛ n bↄ tázi n sumɛ gwɛɛ? À kɛ̀ dia nɛ́ɛ tá bɛroo? 11 Uria wèàla à bè: Àkpati kↄ̃n Isarailinↄ kↄ̃n Yudanↄↄ kú bisakutaanↄ guu. Ma dii Yoabu kↄ̃n a gbɛ̃nↄↄ kú zĩ̀lan. Mɛ́ fↄ̃ mà tá bɛ mà pↄ́ ble mà í mi, mà daɛ kↄ̃n ma naↄ̃oro. Kↄ̃n n kuunao mɛ́ yã pì taka kɛro. 12 Ben Dauda bènɛ: Ǹ gↄ̃ kɛ̀ gbã̀a dↄ, zian mɛ́ n gbarɛ. Ben Uria gↄ̃̀ Yerusalɛmu zĩ beeea kↄ̃n a gudↄ làao dↄ. 13 Dauda à sìsi à pↄ́ blè à í mìo, ben Dauda í kàkanɛ. Mↄde kɛ̀ à bↄ̀ uusiɛ, à gàa à ì kↄ̃n a dii kína zĩkɛrinↄomɛ, èe tá a bɛro. 14 Kɛ̀ guu dↄ̀ Dauda takada kɛ̃̀ Yoabunɛ, ben à Uria gbàrɛo. 15 Takada pì guu à bè: À Uria dↄńnɛ aɛ guu kɛ̀ zĩ̀ pãsĩn, é bↄ à kpɛɛ lɛ wà e wà à dɛ.

16 Gurↄↄ kɛ̀ Yoabu e ligaa wɛ́tɛ pìzi, ben à Uria dà guu kɛ̀ à dↄ̃ gↄ̃sa gbãaanↄ kún. 17 Kɛ̀ wɛ́tɛdeenↄ bↄ̀ɛ wèe zĩ̀ kaa kↄ̃n Yoabuo, aↄ̃ Dauda zĩ̀kari kenↄ dɛ̀dɛ. Iti bori Uria kú ń tɛ́.

18 Ben Yoabu gbɛ̃ zĩ̀ Daudaa lɛ à zĩ̀ yã gbãnɛ píngi. 19 À bè zĩ̀ri pìnɛ: Tó n zĩ̀ yã gbã̀ kínɛ píngi n yãa, 20 tó à nↄ̀sɛ fɛ̀ɛ à n la à bè: Bↄ́ bé à tò a sↄ̃ wɛ́tɛzi kĩikĩi kↄ̃n zĩ̀o? Á dↄ̃ kɛ̀ bĩimusudeenↄ è kà gbarɛńzi tↄↄtɛroo? 21 Dé bé à Gidiↄn nɛ́ Abimɛlɛki dɛ̀? Nↄgbɛ̃ bé à ↄ sↄ̃̀ wísilↄgbɛzi zaa bĩi musu, ben à à dɛ̀ Tebeziroo? À kɛ̀ dia a sↄ̃ bĩizi kĩikĩi lɛɛ? Tó à ònnɛ lɛ, ǹ benɛ a zↄ̀bleri Uria, Iti borii gà dↄ. 22 Ben zĩ̀ri pì dà zɛ́n. Kɛ̀ à kà Dauda kiia, à yã kɛ̀ Yoabu dànɛ ònɛ píngi. 23 À bè: Gbɛ̃nↄ bↄ̀ɛ wɛ́tɛ guu wèe gbãa mↄↄwe bĩi kpɛɛmɛ, ben wa pɛḿma ai ń wɛ́tɛ bĩilɛa. 24 Aↄ̃ kàzurinↄↄ kú zaa bĩi musumɛ, ben aↄ̃ kà fã̀ n gbɛ̃nↄ tɛ́ tↄↄtɛ aↄ̃ n gbɛ̃kenↄ dɛ̀dɛ. N zↄ̀bleri Uria, Iti borii gà se. 25 Ben Dauda bè zĩ̀ri pìnɛ: Ǹ o Yoabunɛ àton tó yã pì à nↄ̀sɛ yakaro. Wègↄ̃ dↄ̃ gbɛ̃ kɛ̀ zĩ̀ é ń blero. À zĩ̀ ká wɛ́tɛ pìo kↄ̃n gbãaao à kaatɛ. Ǹ à gba swɛ̃̀ lɛ. 26 Kɛ̀ Uria naↄ̃ mà a zã gà, à ↄ́ↄ dↄ̀. 27 Kɛ̀ wà gɛ̀ kɛ̀ wà yã̀a, Dauda gbɛ̃nↄ zĩ̀ aↄ̃ sùo a bɛ, ben à gↄ̃̀ à nↄↄ ũ. À nɛ́ ìo gↄ̃gbɛ̃ ũ, ben yã kɛ̀ Dauda kɛ̀ pì kɛ̀ Diinɛ zaa.