5
Dauda kana Isarailinↄ kpatan
1 Isarailinↄ mↄ̀ ń boriia ń píngi Dauda kiia zaa Ɛblↄnu aↄ̃ bè: Wa aru dↄ̃nkↄ̃mɛ.
2 Zaa zi gurↄↄ kɛ̀ Solu dɛ wa kí ũ, ḿbe nɛɛ̀ dↄwe aɛ zĩ̀lan, gana kↄ̃n sunao. Ben Dii bènnɛ, ḿbe nɛ́gↄ̃ dɛ a gbɛ̃ Isarailinↄ dↄn'aɛdee ũ, aↄ̃ kína ũ.
3 Kɛ̀ Isaraili gbɛ̃nsinↄ mↄ̀ kí Dauda kiia zaa Ɛblↄnu ń píngi, gwen à lɛdolɛ kɛ̀nńyo Dii aɛ, ben aↄ̃ nↄ́si kù à mìa aↄ̃ à kà Isarailinↄ kpatan.
4 Dauda kɛ̀ wɛ̃̀ baaakuri gurↄↄ kɛ̀ à nà kíblenaa, à vɛ̃̀ɛ kpatan wɛ̃̀ baplaa.
5 À kí blè Yudanↄnɛ zaa Ɛblↄnu wɛ̃̀ swɛɛplaa kↄ̃n mↄ swɛɛdoo, ben à kí blè Yudanↄnɛ kↄ̃n Isarailinↄ píngi zaa Yerusalɛmu wɛ̃̀ baaakuri awɛɛ'aagↄ̃.
6 Kí kↄ̃n a gbɛ̃nↄ gàa Yerusalɛmu lɛ à zĩ̀ ká kↄ̃n Yebusi kɛ̀ aↄ̃ↄ kú gweenↄ. Ben aↄ̃ bè Daudanɛ: Nɛ́ gɛ̃ kɛ̀ro, baa vĩ̀anↄ kↄ̃n ɛrɛnↄ aↄ̃é pɛ́mma. Aↄ̃ↄe daa Dauda é e à gɛ̃ gwero.
7 Kↄ̃n beeeo Dauda wɛ́tɛ bĩidee kɛ̀ wè sísi dↄ Zayↄn pì sì, ben à gↄ̃̀ à wɛ́tɛdaa ũ.
8 Zĩ beeea Dauda bè: Tó gbɛ̃ yezi à Yebusinↄ dɛdɛ, séde à gɛ̃ ízɛ kɛ̀ wà yↄ̃̀ gbɛ̀n guu, eé ɛrɛnↄ kↄ̃n vĩ̀a pìnↄ le. Dauda ibɛɛnↄmɛ. Bee yãnzi wè be, vĩ̀anↄ kↄ̃n ɛrɛnↄ é gɛ̃ kíbɛro.
9 Ben Dauda bɛɛ kũ̀ wɛ́tɛ bĩidee pì guu, à a zĩnda tↄ́ kpànɛ, Dauda Wɛ́tɛ. À kpɛ́nↄ bòbo à lìgazi ai gura kɛ̀ wà wɛ̀ɛ tàtan, wè be Milo.
10 Dauda gbãaa e kaara, zaakɛ Dii Luda Zĩ̀kpɛdee kúo.
11 Taya kí Hiramu gbɛ̃nↄ zĩ̀ Daudaa kↄ̃n sida línↄ kↄ̃n lí'arinↄ kↄ̃n gbɛ̀'arinↄ, ben aↄ̃ bɛɛ bònɛ.
12 Ben Dauda dↄ̃̀ sa kɛ̀ Dii a ka Isarailinↄ kí ũmɛ, bensↄ̃ à a kpata kàaraare kɛ̀ Isarailinↄↄ dɛ Dii gbɛ̃nↄ ũ yãnzi.
13 Dauda bↄna Ɛblↄnu gbɛra à ɛ̀ara à nↄ pãndenↄ sɛ̀ à kàara Yerusalɛmu dↄ kↄ̃n nↄ yìgisainↄ, ben à nɛ́gↄ̃gbɛ̃nↄ kↄ̃n nɛ́nↄgbɛ̃nↄ ìńyo.
14 Nɛ́gↄ̃gbɛ̃ kɛ̀ à ń í Yerusalɛmu pìnↄ tↄ́n yɛ̀: Samua, Sobabu, Natã, Sulemanu,
15 Ibaa, Ɛlisua, Nɛfɛgi, Yafia,
16 Ɛlisama, Ɛliada kↄ̃n Ɛlifɛlɛtio.
17 Kɛ̀ Filisitininↄↄ mà wà Dauda kà Isarailinↄ kí ũ, ben aↄ̃ gàa wèe wɛtɛɛ wà à dɛ ń píngi. Kɛ̀ à ń baaru mà, ben à gàa sɛ̃̀tɛ pↄ̀rↄtu.
18 Filisitininↄ zĩ̀'ↄↄ pòro Rɛfaimu guzurɛn,
19 ben Dauda Dii là à bè: Mà gá mà lɛ́ɛ Filisitininↄa, nɛ́ ń namɛ ma ↄzĩↄ́? Ben Dii wèàla à bè: Ǹ gá, mɛ́ ń nannɛ n ↄzĩ.
20 Ben Dauda gàa Baali Pɛrazimu, à zĩ̀ blèḿma gwe. Ben à bè: Dii dↄ̀mɛ aɛ, à bↄ̀ à mↄ̀ ma ibɛɛnↄzi bùi lán í è guu fↄ̃ nà. Ben à tↄ́ kpà guu pìnɛ Baali Pɛrazimu.
21 Filisitininↄ ń tãanↄ tò gwe, ben Dauda kↄ̃n a gbɛ̃nↄↄ sɛ̀ɛ wà tào.
22 Filisitininↄ ɛ̀ara wà mↄ̀ dↄ, aↄ̃ zĩ̀'ↄↄ pòro Rɛfaimu guzurɛn.
23 Ben Dauda ɛ̀ara à Dii là dↄ. Ben Dii wèàla à bè: Ǹton gáńzi súusuro. Ǹ ligańzi kpɛɛ kpa ǹ lɛ́ɛḿma kpɛ̃̀ líkpɛ saɛ.
24 Tó a kɛ̀sɛ kĩi mà lí pìnↄ musu, à kɛ kpakpaa, zaakɛ mámbe ma bↄ ma dↄare aɛ gwe, lɛ mà zĩ̀ bleare Filisitini zĩ̀kpɛɛnↄa yãnzi.
25 Dauda kɛ̀ lán Dii ònɛ nà, ben à zĩ̀ blè Filisitininↄa sɛna zaa Gibiↄ̃ ai à gàa pɛ́ Gɛzaa.