7
Luda lɛ́gbɛ̃na Daudanɛ
1 Kɛ̀ kí vɛ̃̀ɛ a bɛ, Dii à bↄ̀ ibɛɛ kɛ̀ aↄ̃ↄ ligazinↄ ↄzĩ à à gbà ĩampakii,
2 ben kí bè annabi Natãnɛ: Á'a! Kpɛ́ kɛ̀ wà dↄ̀ kↄ̃n sida líon mɛ́gↄ̃ vɛ̃ɛɛn, Luda àkpati gↄ̃ diɛna bisakutaan-ↄ́?
3 Natã wèàla à bè: Lán à kɛ̀nnɛ nà ǹ kɛ, zaakɛ Dii kúnyo.
4 Gwãavĩ beeea Dii yã sù Natãa à bè:
5 Ǹ gá ǹ o ma zↄ̀bleri Daudanɛ kɛ̀ ma bè, àmbe eé kpɛ́ kɛ̀ mɛ́gↄ̃ kún dↄmɛro.
6 Zaa gurↄↄ kɛ̀ ma Isarailinↄ bↄ̀ɛ Igipiti ai gbã̀a mɛ́ɛ bɛɛ kũro. Mɛɛ̀gↄ̃ sↄ̃ki kpákpaamɛ, bisakuta bé ma kúkii ũ.
7 Guu kɛ̀ ma sↄ̃ki kpàkpan kↄ̃n ma gbɛ̃ Isarailinↄ ń píngi mɛɛ̀ dↄn'aɛdeenↄ diɛ aↄ̃ dↄńnɛ aɛ. Má ò ń gbɛ̃kenɛ, à kɛ̀ dia èe kpɛ́ dↄmɛ kↄ̃n sida líoro zikiↄ́?
8 Ǹ gá ǹ o ma zↄ̀bleri Daudanɛ, mamↄma Dii Zĩ̀kpɛde ma bè, ma à sɛ̀ sãdãkiia lɛ àgↄ̃ dɛ ma gbɛ̃ Isarailinↄ dↄn'aɛdee ũ.
9 Má kúo guu kɛ̀ à gàan píngi, ben ma à ibɛɛnↄ dɛ̀dɛnɛ. Mɛ́ à tↄ́ bↄ maamaa sa, eégↄ̃ kú anduna tↄ́deenↄ tɛ́.
10 Mɛ́ bùsu kpá ma gbɛ̃ Isarailinↄa, mɛ́ ń káɛn, aↄ̃é vɛ̃ɛn ń pↄ́ ũ. Aↄ̃ làakari gↄ̃ kpaɛna. Gbɛ̃ zaaanↄ é e wà wɛ́ɛ tãḿma lán aↄ̃ wɛ́ɛ tã̀ḿma káaku
11 gurↄↄ kɛ̀ ma dↄn'aɛdeenↄ dìɛńnɛ nà dↄro. Mɛ́ à bↄ a ibɛɛ pìnↄ ↄzĩ ń píngi.
Mamↄma Dii mɛ́ɛ oonɛ, mámbe mɛ́ ua pɛ́ɛnɛ à boriinↄ gbãa'ekii ũ.
12 Tó à gurↄↄ pàpa à gà, mɛ́ à borii kɛ̀ bↄ̀ à mɛ̀n ke sɛ́ lezĩ, mɛ́ à kpá kpatan.
13 Àpi bé eé kpɛ́ dↄ kɛ̀ ma tↄ́ égↄ̃ kúa, mɛ́ à kpatablena gbá pɛ́ɛ, eégↄ̃ kí blee ai gurↄ píngi.
14 Mɛ́gↄ̃ dɛnɛ De ũ, eégↄ̃ dɛ ma nɛ́ ũ. Tó à taari kɛ̀, mɛ́ wɛ́ɛ tãa kↄ̃n gòomɛ, lán gbɛ̃ntee è gbɛ̃ gbɛ̃ nà.
15 Mↄde ma gbɛ̃kɛ é kɛ̃kↄ̃ao lán má kɛ̃̀kↄ̃a kↄ̃n Solu kɛ̀ má à bↄ̀ Dauda aɛzĩ nàro.
16 À boriinↄ égↄ̃ kpata blee gurↄ píngi. À kpata pì égↄ̃ yãana vĩro.
17 Ben Natã yã pì gbã̀ Daudanɛ lán Dii ònɛ nà píngi.
Dauda wɛ́ɛkɛna Diia
18 Ben kí Dauda gɛ̃̀ à vɛ̃̀ɛ Dii aɛ à bè: Dii Luda, bↄ́n ma ũu? Dénↄn ma bɛdeenↄ ũ kɛ̀ n ma ka gwena kɛ̀ takaa?
19 Dii Luda, bee nɛ́ yã nɛ́ngomɛ n kiia, ben n mamↄma n zↄ̀bleri borii kɛ̀ aↄ̃égↄ̃ kú ziaanↄ yã ò dↄↄ́? Lɛn nɛɛ̀ kɛńnɛ lɛↄ́, Dii Luda?
20 Dii Luda, mɛ́ bennɛ diamɛ dↄↄ? Mamↄma n zↄ̀bleri ń ma dↄ̃.
21 N yã bíta pì kɛ̀ lán n pↄↄ yezi nà yã kɛ̀ ń ò yãnzi, ben ń tò mamↄma n zↄ̀bleri má dↄ̃̀.
22 Dii Luda, ń bíta fá! Weé gbɛ̃ke lɛ́kↄ̃zinyoro. N baasiro dii ke kuuro, lán wá mà kↄ̃n wa swão nà.
23 Dén weé lɛ́kↄ̃zi kↄ̃n n gbɛ̃ Isarailinↄↄ? Anduna boriinↄ tɛ́ bori mɛ̀n doo pìn n bↄ n gaa ń bò, lɛ aↄ̃gↄ̃ dɛ n gbɛ̃nↄ ũ. N n zĩnda tↄ́ bↄ̀, n yã bíta bↄnsaɛnↄ kɛ̀ n gbɛ̃ pìnↄnɛ, n pɛ bori kenↄa kↄ̃n ń tãanↄ n gbɛ̃ kɛ̀ n ń bó Igipitinↄ aɛzĩ.
24 N Isarailinↄ dìɛ aↄ̃gↄ̃ dɛ n gbɛ̃nↄ ũ ai gurↄ píngi. Dii, n gↄ̃ ń Luda ũ.
25 Dii Luda, lɛ́ kɛ̀ ń gbɛ̃̀ mamↄma n zↄ̀blerinɛ kↄ̃n ma boriinↄ yã musu, ǹgↄ̃ zĩi kɛɛa gurↄ píngi. Ǹ kɛ lán ń ò nà
26 lɛ ǹ tↄ́ bↄ maamaa ai gurↄ píngi. Gbɛ̃nↄ é be Dii Zĩ̀kpɛde bé Isarailinↄ Luda ũ. Mamↄma n zↄ̀bleri Dauda, nɛ́ ma boriinↄ kãsãa pɛ́ɛ,
27 zaakɛ Dii Zĩ̀kpɛde Isarailinↄ Luda, ń òmɛ n bè, nɛ́ ma ua pɛ́ɛmɛ ma boriinↄ gbãa'ekii ũ. Bee yãnzi mamↄma n zↄ̀bleri ma kùgbãaa kɛ̀ ma wɛ́ɛkɛɛ kɛ̀ kɛ̀mmazi.
28 Dii Luda, ḿbe Luda ũ, n yã náanɛ vĩ, ben n yã maaa kɛ̀nↄ lɛ́ gbɛ̃̀ mamↄma n zↄ̀blerinɛ.
29 Ǹ aubarika da mamↄma n zↄ̀bleri boriinↄn sa, n wɛ́ɛ égↄ̃ tɛ́ńzi gurↄ píngi. Dii Luda, n yã ò n aubarika dà mamↄma n zↄ̀bleri boriinↄn, aↄ̃égↄ̃ aubarika vĩ ai gurↄ píngi.