23
Sela yadi alika.
1 Sela imiya-deya adimalamala 127 inuwagana.
2 E ada muliya ialika Kiliati-Aba wagaine, tainei anayegana nagona Ebiloni, Kenani anafafaliya. Ada Ebelaamo nuwana givita lakaina ke gitagiya vavinena Sela faidiya.
3 Tagiya muline, Ebelaamo gimidimididi vavinena vovodi lilivane ada gimiyavilana ke Itaiti yana tubudelideliyavo wagaidiya givona,
4 “Iya kwanaawaawala aku idedeku yami fafaliya gamiyamiya. Gaveoveolemi nuwanuwaku babi maita wada awaege gada kimonena wagaimiya ke wadedeku yaku toalika gadasedi.”
5 Ada Itaiti yana tubudelideliyavo ilufata Ebelaamo wagaine, ivona,
6 “Kauveya, una nogalina. O kaliva lakai-moe umiyamiya amamwatuguya. Yama didikula matatabuna imiyamiya aku una itadadana, gadedeku nuwa gina abina aga wadedeku ya toalika unasedi. Uitama matatabu-moema aawaegau, keke seyana gaito nuwana gidalolo wagainiya.”
7 Ada Ebelaamo gitowamididi ke Itaiti yana tubudelideliyavo badi tonibabi matadiya gioduvemoimoinedi.
8 Ada givonedi, “Kai waawaegau velemoena wagaikuya yaku toalika ganasedi, aga Soali natuna Efiloni wagaine wanaveola faikuya,
9 e ada Makepila wagaine kabala luwa gina vekimoneyena wagaikuya. Banae toniluwa, kabala luwa-nai gimiyamiya yana babi anaebalauyabu wagaine. Wanaveolena faikuya ke gina vekimoneyena, gavaiyei fatana mamauwe gana lufata tunutunugina matamiya babi-nai faine ke gina vedidikula amimwatuguya.”
10 Taidei tova-nai wagaine Efiloni givetovetogana tufona Itaiti yana tubudelideliyavo nodi, e ada gimididi giifufu anagabuyavo matadiya ivagauta melala anaedawaneya ebavagauta wagaine, ani inogala aku bana gilufata Ebelaamo wagaine,
11 givona, “Keke, yaku kauveya. Una nogalina. Gana veleni babi, ada kaduwe gana veleni luwa tainei babi-nai wagaine gimiyamiya. Gaveleni Itaiti yana tubudelideliyavo matadiya. E ada ya toalika una nauwedi unasedi.”
12 Ada Ebelaamo kaduwe giodu vemoimoina Itaiti yana tubudelideliyavo matatabuna matadiya,
13 e ada givonena Efiloni aku badi ivanenegena, givonaga, “Ina iwakana, aku una nogalina. Kai anafaiweya, aga gana lufata babi fatana anafaiweya. Wana awaveiwakane wanavaina, e aku yaku toalika wadedeku ganasedi.”
14 Ada Efiloni gilufata Ebelaamo wagaine, givona,
15 “Yaku kauveya, una nogalina. Babi fatana matatabuna ani 400 siliva, aku fatana-nai keke tamo gavana wagaideya. Auwe babi unavai ya toalika unasedi.”
16 Ada Efiloni yana nuwanuwa Ebelaamo giawaveiwakanena ada gietowavana fata-nai giinana mamauwe ebaetowava wagaine, anafaiweya tolukimokimone ivevegugaiyena, ada Itaiti yana tubudelideliyavo matadiya aku givelena Efiloni.
17 E ada Efiloni yana babi Makepila wagaine, tainei Mamele lilivane, matatabuna babi ke luwa gimiyamiya wagaine ada ai imidimididi nodi analaba ginau babi anaetonaba wagaine, ani matatabu-moena bademowa Ebelaamo givetoinavuvunena.
18 E ada Itaiti yana tubudelideliyavo badi gavega ivagauta ebavagauta-nai wagaine, ani ialamanena vaita bademowa babi-nai Efiloni giatuegena Ebelaamo wagaine.
19 E ada muliya au Ebelaamo vavinena Sela vovodi gisena didikula-luwa wagaine. Tainei Makepila babina wagaine, Mameli lilivane, ani Kenani anafafali wagaine.
20 Ada badi Itaiti yana tubudelideliyavo ani babi ke luwa iatuegena Ebelaamo wagaine ke givetoinavuvunedi ada givedidikulayena.