34
Daina ada meSekemu kaliva.
1 Ada imiyamiya aku seyana tova wagaine Daina, banae Iyakobo natuna vavine Leya ivenatunena, ani gina Sekemu melala anaakeakeduyavo gina madubodadi.
2 E ada Emoli, banae Ivaiti unuma wagaine ada kaduwe banae fafali-nai anatoveimeya ani natuna kaliva seyana anayegana Sekemu. Ani Sekemu giitana Daina ada ginuwenuwena ada au gina gikiveyabi vovona gikiluvaluvana.
3 Ada Sekemu ginuwakabubuyena Daina Iyakobo natuna, au nuwanuwana lakaina vavine-nai, e ada givonabikebikena.
4 Ada Sekemu tamana Emoli givonena, “Kamaku, nuwanuwaku vavine taidei unavaina vavineku.”
5 Ada Iyakobo gikaiyanogala vaita natuna Daina bademowa Sekemu gikivebwanenena, aku natunavo aimo fafali kavovona wagaine kevakeva nodi. E ada keke tamo gavana gidavone aku giboda tova-nai natunavo iyewadi manuweya.
6 Aku Emoli natuna Sekemu givagaule nodi inau Iyakobo wagaine ke adiselu iifuifufu.
7 Ada Iyakobo natunavo ikaiyanogala gavana giyegemona, au iyewadi fafali kavovona wagaine-deya. Ada nuwadi givita ke inuwakoyo lakaina, faina Sekemu gaitoma koyo-moena gigana Isileli yana gabu wagaine. Gisidamanena faina Iyakobo natuna vavine vovona gikiluvaluvana, taidei gaitoma-nai keke analauboda ginagai.
8 Aku Emoli Daina novunavo givonediga, “Natuku Sekemu nuwanuwana lakaina novumi, e ada gaveola wagaimiya wada awaege gida nagina vavinena.”
9 Ada kaduwe givona, “Kana venaginagi nodi, imi natumiyavo vevine wana velema ana nagidi ke ime natumeyavo vevine wanavaidi vavinemiyavo.
10 Ada meyameyaganina nodi idedeku kanamiya, babi aawawaegena wagaimiya. Wanamiya gadedeku yami nuwanuwa anafaiweya, wana vekivekimone wagaine, ada giba wana nuwagadi wagaine.”
11 Ada Sekemu givona Daina tamana Iyakobo ke novunavo nodi wagaidiya, givonaga, “Kai wana nuwaawaegau yaku veola taidei faine aga gavana yami veola, akufaiweya gana velemi.
12 Imi wana venuwadadana Daina fatana faine ada wana mataweku ke gana velemi. Kai fatana lakaina aga wada iwakana wagaikuya, aimo gana velemi. Aku tainei-mowa vavine gagana wana veleku gana nagina vavineku.”
13 Aku Iyakobo natunavo kaliva ani inagedi gikoyo-mowa, e ada ilufata fwayafwaya Sekemu ada tamana Emoli nodi wagaidiya. Faina novudi Daina gikivebwanenena velemoena.
14 Ada wagaidiya ivona, “Ime keke amafaiweya tayuwe anafaiweya anadewa. Keke meyameyaganina novuma ana awaege kaliva seyana wagaine banae keke vovona bubuna bwatana tomotomogoloina. Kai ana gugaiyena, wada ime amavovomumu.
15 Aku ana awaegeni una nagina kai gaitoma seya-moena taidei unagana mamauwe. Tainei kaliva seyana seyana yami melala wagaine ani vovodi bubuna bwatana ina lugoloidi anafaiweya imeyavo.
16 Kai taidei gaitoma-nai wana gugaiyena aga ya kalivayavo meyameyaganina yama vevineyavo ina nagidi, ada anafaiweya ime kaduwe yami vevinemomo ana nagidi. Ada au anamiya yami fafaliya ke kanaveyoo seyana.
17 Aku kai vovo bubuna bwatana anatomogolota wana dibusoyogena, aga novuma anavaina ada ananau.”
18 Ada Emoli natuna Sekemu nodi yadi nuwanuwa-nai iawaveiwakanena ivona, “Ina kadu iwakana.”
19 Ada Sekemu, banae tubulakata-nai tamana yana kalivayavo matatabudi ivemoimoinena, ani maduga-mowa gina gaitoma-nai gigana ivona mamauwe, faina nuwanuwana lakaina Iyakobo natuna vavine.
20 E ada banae tamana nodi inau ebavagauta lakaina wagaine yadi melala anaebaluku lilivane, ke yadi melala anakalivamomo matatabuna iifufuyedi,
21 ivona, “Taidei kaliva-dina badi kaliva iwakadiyavo, e ada kana awaegedi ina miya yada fafaliya ide nodi ke ina lukimokimone wagaine. Babi lakai-vagaina faidiya. Ada natudiyavo vevine ide kana nagidi, badi ide natudeyavo vevine ina nagidi.
22 Aku kaliva-dina iawaegau ada ide nodi kanamiya ke kanaveyoo seyana, kai gaitoma seya-moena kanagana, ani vaita kaliva matatabu-moeda vovoda bubuna bwatadi kana tomogoloidi badi anafaiweya.
23 Aku wanaitana, kai taidei gaitoma-nai kanagana mamauwe aga yadi kevakevayavo ke yadi giba matatabuna ide faideya. Taidei faine kana awaegedi ke badi adamwatuguya inamiya.”
24 Ada kaliva matatabuna badi gavega ivagauta melala anaebaluku wagaine ani inogalina ada iawaveiwakana Emoli ke natuna Sekemu nodi wagaidiya. Ada kaliva seyana seyana melala-nai wagaine vovona bubuna bwatana itomogoloina.
25 E ada yadayada toiye giavaidi muline kokoyodiyavo aimo iuloulolo, aku Iyakobo natunavo kaliva adiselu Simiyoni ke Livai, badi Daina novunavo, ani yadi benisi ivaidi ada inukulu iluku melala-nai wagaine ke kaliva matatabu-moedi iluvealikadi.
26 Ada kaduwe Emoli natuna Sekemu nodi iluvealikadi aku novudi Daina Sekemu yana manuweya-deya iabi inauwena yadi ebageya.
27 Luvealika muline au Iyakobo natunavo inau toalika wagaidiya ada melala-nai anagiba ivaidi inauwedi novudi anamiwa, faina wadedeku novudi ikivebwanenena.
28 E ada yadi sifiyavo, gotiyavo, bulumakauyavo ke donikiyavo ke gava giba melala-nai wagaine ke kaduwe yadi fafali wagaidiya ivaidi.
29 Ada kaduwe yadi vevineyavo ke biyabiyama matatabu-moedi ivaidi inauwedi.
30 Ada Iyakobo giitana Simiyoni ke Livai yadi gugai, au gidouwedi iela givonedi, “Imi amiselu akuyegana waivekoyona kaliva-dina idedeku wagaidiya, meKenani ke mePelisai. Koyona lakaina wakiveyegemonina iya wagaikuya, e ada ina agouga wagaideya. Ada kai ina vagauta seyana ke inaela ina lugaviya wagaideya aga aimo ina tafida ada matatabu-moeda kanakwa, faina ide adayoo keke anafaiweya badi adiyoo.”
31 Ani ilufata, ivona, “Keke meyameyaganina novuma anaita-moe aku Sekemu ginadewa wagaine anafaiweya banae seyana tosedada.”