46
Iyakobo ginau Itipita.
1 E ada Isileli ani yana giba matatabuna givaidi ke gitauya ginanau Itipita. Ada tova-nai gielai Biyasiba, wadedeku givebolavoi tamana Aisake yana Yaubada wagaine.
2 Ada bogi-nai wagaine enoiseya Yaubada Isileli givonena, “Iyakobo, Iyakobo.”
Ada gilufata, givona, “Iya idauwe.”
3 Ada Yaubada givona, “Iya Yaubada, tama yana Yaubada. Keke una matauta ya obu Itipita, faina aimo wadedeku-deya ayoo gana kiveinalina lakaina.
4 Ada iya gana kwayabuni nodi kanaobu Itipita, ada velemoena aimo ya tubudelideliyavo ganayewe-vagiledi taidei fafali-nai wagaine. Ada ya tova alika wagaine Yosefa tauna mata gina kibodana.”
5 Ada Iyakobo gitauya-vagila Biyasiba-deya, e ada kaduwe natunavo kaliva ani tamadi ke natudiyavo biyabiyama ada vavinediyavo idododi saliyoti lakaidi Felo giimilidi wagaidiya.
6 Ada kaduwe yadi giba ke yadi kevakevayavo inuwagadi Kenani wagaine ani ivai inauwedi, ada Iyakobo ke yana tubudelideli matatabudi nodi inau Itipita.
7 E ada taidei anafaiweya Iyakobo natunavo ke tubunavo, yana tubudelideli matatabu-moedi nodi ginauwedi Itipita.
8 Taidei Isileli natunavo kaliva adiyegana badiyavo inau Itipita wagaine:
Lubeni banae Iyakobo yana tomoinagona.
9 Ada Lubeni natunavo kaliva tainei:
Enoki, Palu, Esiloni ke Kami.
10 Simiyoni natunavo kaliva:
Yemuela, Yemini, Oadi, Yakini, Soali,
ada Saulo. Saulo ani banae vineKenani natudi.
11 Livai natunavo kaliva: Gelisoni, Koadi ke Milali.
12 Yuda natunavo kaliva:
Ele, Onani, Sila, Pelesi ke Sela,
aku Eli ke Sila ani ialika fafali Kenani wagaine.
Ada Pelesi natunavo kaliva adiselu:
Esiloni ke Amula.
13 Isaka natunavo kaliva:
Tola, Pua, Yesubi ke Similoni.
14 Sebuloni natunavo kaliva:
Siledi, Eloni ke Yelela.
15 Taidei badiyavo ani Leya natudiyavo kaliva Iyakobo wagaine, kaduwe vavine seyana ivetubuna anayegana Daina. Biyavo-dina itubuga Padan Alama wagaine. Natudiyavo kaliva ke vevine adiyoo matatabuna 33.
16 Gada natunavo kaliva:
Sefoni, Agai, Suni, Esiboni, Eli, Alodi ke Aleli.
17 Aseli natunavo kaliva:
Imina, Isiva, Isivi ke Belaiya.
Ada novudi Sela.
Belaiya natunavo kaliva:
Iba ke Malikiyeli.
18 Taidei biyabiyama-dina Iyakobo givetubudi Silifa wagaidiya, badi Lebani natuna Leya giveledi yadi togugai vavine, ani natudiyavo adiyoo matatabuna 16.
19 Iyakobo vavinena Litiyeli natudiyavo kaliva:
Yosefa ke Beniyamina.
20 Ada Yosefa natunavo kaliva
adiselu givetubudi Itipita wagaine: Manasa ke Ifeleimu,
bana Poti-Fela Oni anatovebolavoi natuna vavine
Asinate wagaidiya.
21 Beniyamina natunavo kaliva:
Bela, Bekeli, Asabeli, Gela, Nemani, Ei, Losi,
Mupimi, Upimi ke Adi.
22 Taidei Litiyeli natudiyavo kaliva itubuga Iyakobo wagaine, adiyoo matatabuna 14.
23 Dani natuna kaliva:
Usaimi.
24 Nefitalai natunavo kaliva:
Yasiyela, Guni, Yesa ke Silemi.
25 Taidei Iyakobo natunavo kaliva givetubudi Bila wagaidiya, badi Lebani giveledi natuna Litiyeli yadi togugai vavine, ani natudiyavo adiyoo matatabuna seveni.
26 Ada biyavo-dina matatabudi Iyakobo nodi inau Itipita, badiyavo au velemoena yana tubudelideli, keke natunavo kaliva vavinediyavo nodi ida veyawa-tamwaidi, adiyoo 66.
27 Ada Yosefa natunavo kaliva adiselu, badi bademowa itubuga Itipita wagaine, ani badi nodi iveyawatamwaidi, ada Iyakobo yana gabu matatabuna inau Itipita ani adiyoo 70.
28 E ada Iyakobo natuna Yuda giimili wai ginagona Yosefa wagaine ke wai gina vewalena ginau Goseni wagaine. Ada Iyakobo yana yoo nodi iyegemo Goseni yana ebaveimeya wagaine.
29 Ada Yosefa yana saliyoti gikidewedewena ada ginau tamana Isileli nodi ina venuwaga Goseni wagaine. Ada Yosefa giyegemo tamana giitana, au nimana gina odone gilauta aku gitagiya tova manamanawena.
30 Ada Isileli givona wagaine, “O natuku, bademowa tauku matakuya gaitani taumada wayawai umiyamiya, ada gavemwamwala lakaina. Ada aimo kukuyeya ganaalika.”
31 Ada Yosefa tubuiyanavo ke tamana yana yoo nodi givonediga, “Ganalaka ke Felo gana ifufuyena gana vonaga, ‘Tubuiyakuweyavo ada kamaku yana yooyavo nagona nodi imiyamiya Kenani, bademowa ielai wagaikuya.
32 Kaliva-dina badi toitaveyabina sifi ke kevakeva aditoitaveyabina, ada taidei faina yadi sifi, yadi goti ke yadi bulumakau ada yadi giba matatabuna ialiyedi.’
33 Tova-nai Felo gina douwemi ada gina tolidadanemi, ginavona, ‘Gavana yami gugai?’
34 aga wana vonenaga, ‘Ime ya togugaiyavo kevakeva aditoitaveyabina yama tova biyabiyama wagaine ada gielai tova taidei, anafaiweya tamameyavo nagona igugai.’ E ada gina awaegemi wanamiya Goseni yana ebaveimeya wagaine, faina meItipita idibusoyoga velemoena toitaveyabina sifi.”