6
Kaliva ikoyona ifuifufudi.
E ada kaliva ivebutu itubulalaga ke adiyoo giveinala-mowa babi wagaine, ada taidei kaliva-dina natudiyavo vevine ivetubudi iveakeakedu. Ani Yaubada natunavo kaliva iitadi ani kaliva natudiyavo vevine aiwaka ada ivenuwadadanedi ke inagidi. Ada Yaubada givona, “Aluwaluwaku keke kaliva wagaidiya gina miya-vagata faina badi kaliva-mowa. Malinai yadi tova anaetowava gasena malamala 120 gagana.”
Tova tayuwe wagaine ada kaduwe muliya kaliva iyalagana-mowa ke totoyogidi imiyamiya babi wagaine. Tayuwe tova-dina wagaidiya Yaubada natunavo kaliva ani kaliva natudiyavo vevine vovodi ikiluvaluvadi. Taidei vevine-dina badi natudiyavo ivenatunedi, ani badi kaliva toyogidi ada kadu adiyegana lakaina.**
E, ada Yaubada giitaobu kaliva babiya giitadi yadi gugai koyona, ada kaduwe nuwainagediya koyona matatabuna nuwadi givai-vagaina tova matatabuna. Ada Yaubada nuwana giveuvanena faina kaliva gibubuna ke babi wagaine gisena. Tayuwe faine aseasena giulolo. E ada Yaubada givona, “Kaliva matatabuna babi wagaine badi iya gabubudi ani gana luveyawaliyedi. Ada kevakeva matatabu-moedi ke gaitoma seyana seyana yagayaganidiyavo babi wagaine gana luveyawaliyedi. Kaduwe manuga mwatuguya gana luveyawaliyedi. Faina nuwaku gaveuveuvanena badi gabubudi wagaine.” Aku Nowa yana dewa ani iwakana Yaubada matane ke Yaubada givemwamwala faine.
Nowa ifuifufuna.
Taidei Nowa ifuifufuna. Ada ifufu-moena ani taidei anafaiweya. Nowa banae kaliva toyegayegana, keke maita anaawavekoyo kaliva adimwatuguya tova tayuwe wagaine. Ada tova moyaina Yaubada nodi ivetubuiyana. 10 Ada Nowa natunavo aditoto Semi, Ami ke Iyafeta.
11 E aku kaliva moyaidi babi wagaine ikoyona Yaubada matane, ada veimunumunuga gitubuga-mowa babi matatabuna wagaine. 12 Yaubada giitana kaliva matatabudi babi wagaine yadi dewa matatabuna koyonaga. 13 E ada Nowa wagaine givona, “Kaliva matatabuna gana luveyawaliyedi, faina veimunumunuga gitubuga-mowa babi wagaine. 14 Aku oye ani aki una bubuna tauni fainiya ai iwakadi wagaidiya. Muliya negenina una tutugologoloina ada una omana koluta wagaine wanegenine ke wamelaleya. 15 Taidei anafaiweya anatubuga nuwanuwaku aki-nai una bubuna: anamanawe 140 mita ke anavelalafa 25 mita ada anatulatula ani 14 mita. 16 Ada talafolega unabubu balawalilivugina, awadi adivelalafa afu mita kwalala wagaine-deya ada giobu waka-moena wagaine. Anawana unasena aki dobone ke waka negenine anatalaliya toiye una bubudi, seyana getane, seyana nefanine, ada seyana dibune. 17 Unaitana, Iya tuwa gana imilina ke babi matatabuna gina leledamana, ada gaitoma seyana seyana wayawaidi imiyamiya gabama dibune ani gana luveyawaliyedi. Tainei gaitoma seyana seyana matatabuna iveyawaitunatunau ani inaalika. 18 Aku veyavo anavonadabadaba gana bubuna wagainiya, ada oyeni, natumomo ke vavine ada natumiyavo vavinediyavo ke oye nodi wanayage aki wagaine. 19 Kaduwe kevakeva seyana seyana wayawaidi iluwei iluwei, kaliva ke vavine una aliyedi una dododi aki wagaine wayawaimi wana miyamiya tuwa anatoveya. 20 Ada taidei anafaiweya unagugai. Manuga seyana seyana wagaidiya iluwei iluwei, ada kevakeva seyana seyana iluwei iluwei, kaduwe anafaiweya gaitoma seyana seyana yagayaganidiyavo wayawaidi babi wagaine ani inaelai wagainiya ke una dododi aki wagaine ada yawaidi una yavana. 21 Kaduwe aa tulina tulina matatabuna una dododi aki wagaine, imi amiga ada kaduwe kevakeva ke manuga nodi faimiya.”
22 Ada Nowa gaitoma matatabuna gigugaiyedi Yaubada giveimeya anafaiweya.
** 6:4 Yoo-dina adiyegana 'Nefilimi', anakivila anafaiweya 'tobeu'. Kaliva matane wagaine Nefilimi kaliva toyogidi, aku Yaubada matane yadi dewa koyona.