Wosheetso P'awlos Wosho
Tito Maants
Kindo
Tito Krstiyani imnetiyo maants b́ waa Ik' ash woterawwotsoke b́ wotor P'awlosi doo shishi keewon karndek't tep'oke b́ fini toohoni b́ teshi, P'awlos wosh han b́ guut' shweyon bíyere na'a wottso b́ fini tooho Titossh b́ wotor Tito manoor Ik' maa fino s'iilosh K'ert'esitsna b́ fa'o b́ teshi. B́ woshonwere bogon b́ s'iilir keez een een keewwotsatse.
Iklo, Ik' maa jishirwotssh bítsnor K'ert'es ashuwots gond niwok'on bodetstsotse awuk'o niwon bonton beyo boon b́ geyitwok'o Titossh b́ gawiyiri, Gitlo, Ik' mootse fa'a k'osh k'osh jirwots man etonwere boshúweyi dúron een wotts nungushwotsnat maatswotsn, mank'o jawets núngushwotsnat guutswotsn awúk'o daniyo boosh b́ geyituwok'o Titosh b́ iziri, s'uwaatsnowere Krstiyani sheeng niwo bítsnor jenonat shunewon beyo, mank'o Ik' mootse shit'o, mooshonat k'alerawok'o wosho, Titosh izonat bín jisho b́ imiri.
Jamon mas'aafan b́detstso
Kindo 1:1-4
Ik' maa jishirwots 1:5-16
Ik' mootse k'osh k'osh jirwots fini bano 2:1-15
Izonat ats kordek'on 3:1-11
Gúúpo 3:12-15
1
1 Ik'i guutsonat Iyesus Krstos wosheets wottso P'awulosoke, Ik'o galbdek'ts ashuwotsi bo imnetiyon kup'shr, Ik'i ash beyo maants jishit aro bodanetwok'o wosheetso,
2 Imnetiyanúwere Ik'o dúre dúri beyo imosh noosh b́jangitsatse need'ke, koorawo Izar Izewer kashan noosh imosh jam dúroniyere shin noosh taarre.
3 Ari b́ gizewo b́ bodtsok'on noon worits Ik'o azaztsok'on taa t shishiyitwok'o taash imets adarok'on Ik'o bí aap'tso b́ jangi.
4 Noshir wotts imnetiyon arikon t naayi wottsosh neesh Titosh, Ik'o nihoknat noon kashitso Krstos Iyesusokere s'aatonat jeenon neesh wotowe.
Titos fino K'ert'esitse
5 Neen K'ert'esitse k'aztk'rtso eegoshe manutseraawo manutsir, neen tiazaztsok'on Ik'i máá eenashwotsi kit kitotse nnaashitwok'owe.
6 Ik'i máá eenasho eeg eeg bíatse deshawonat mááts iku kenihi wottsoni, shiraats jintsi wotonat bo alek'azeyatse tuutson k'ooreraw amants nana'úwotsi detsts asho woto bín geyife.
7 Ik'i maa jishirwo Ik'i fino adaron b́ dek'tsotse bíyatse eeg eeg deshaw s'ayino woto bín geyife, mank'owore bika bako shiyawo, káári fayerawo, masherawo, fayetsi woterawo, gizosh k'awntrawo woto bín geyife.
8 Maniyere ib dek'fo, sheeng keewo shuntso, káts wottso, kááwo, Ik'i finosh gaaletso, bítook kewdek'faltso wotowe.
9 Arik wotts dano daniwon izosh k'efirwotsshowere aani dek'o b́falitwok'o danb́dek'ts amanets aap'ats kup'de'e.
10 Ay ashuwots, bítsnor Ayhudi jirwotsi wottswots gofami niwo shoyirwots, alerawwots, datsmec'ron ooshirwotsnat dashirwots fa'ane.
11 Ashaanotsi s'k boetetuwok'o wosho geyife, bo jitsit oot'o daatsosh woteraw keewo danifetst maa ash asho boshek'iri.
12 Boyitse iko, botook nebiyiwo «K'ert'es ashuwots jam aawo kootetswotsi, gond s'ootswotsi, fin biitsts maac' geenzwotsiye» etre.
13 Gawets gawanúwere arikee, mansh eshe shod deshaw imnetiyo bodetsetwok'o ashaanotsi ayide hadowe.
14 Ayhudi tururi shuutso bo sha'irwok'o, ariko k'efiru ashuwots tzaziwotsno bok'ewawok'o kup'shde'e hadowe.
15 S'ayn nib detstswotssh, jam keewo s'ayine, kiimwotsnat amaneraw ashuwotsshmó s'ayin wottso eegonwor aaliye, dabnwor bonibo wotowa bomaac'o kiimwtske.
16 «Ik'o danfone» etirune, bofiinonmó jamere etetune bísha, bo wic'iknee, alerawwotsna sheeng keewo iko k'alo falawwotsiye.