Yëkkuö kitule hebreowak a̱
Hebreos
Yëkkuö i' kite̱ Israel aleripa e̱rblé Jesús mik e'pa a̱. Ñies ie'pa kiè hebreowak ena judiowak. Kë̀ yi wa̱ ijche̱r yi tö yëkkuö i' kit. Pë' we̱le tö ibikeitsè tö Pablo tö ikit. We̱le skà tö ichè tö Bernabé tö ikit. We̱le tö ichè tö Apolo tö ikit erë kë̀ s'wa̱ ijche̱r yi tö ikit. We̱le tö ibikeitsè tö ikite̱ Roma wakpa tö Jerusalén suluo̱'wa̱ e' yöki̱ duas dabom kuryök Jesús kune'bak e' ukuöki̱ (70 D.C.).
Israel aleripa e̱rblë' Jesús mik e' kue̱ki̱ e'pa bak weinuk. Ie'pa we̱lepa é̱na ie̱rblö̀ Jesús mik e' olo'yak ta̱ ishkakne Moisés ttè diki̱a̱. E' kue̱ki̱ yëkkuö i' kite̱ ie'pa a̱ iki̱morak e̱' tkökwa̱ darërëë Jesús mik. S'ki̱töu̱kwakpa tö ie'pa wöbla'we̱ke tö Jesús kë̀ diché ta̱' ie'pa ki̱moie, e' kue̱ki̱ ie'pa ka̱wöta̱ ie'pa e̱rblö̀ imik e' olo'yök. E' kue̱ki̱ yëkkuö i' kite̱ Jesús mik e̱rblökwakpa a̱ Jesús kkachoie ie'pa a̱ i' es: Skëköl e̱' kkaché se' a̱ Jesús wa a̱s se' é̱na ia̱r buaë. Ká̱ ia̱ia̱ë ta̱ ie' utbitu̱ se' ta̱ ittekölpa wa ena ibiyöchökwakpa wa ena Moisés wa, erë bataie ta̱ iut se' ta̱ ilà eköl ë̀ Jesucristo e' wa.
E' kí̱ie ta̱ ká̱ ia̱ia̱ë Skëköl tö iyë'bak tö ie' kablörane Israel aleripa a̱. E' wà tka Jesucristo wa e' chè yëkkuö i' tö. Ñies sacerdotepa tö iyiwak jcheke Jerusalén ká̱ bit ekkë judiowak nuì̱ olo'yoie. Iyiwak jchërke e' kë̀ diché ta̱' se' nuì̱ paiklottsa̱ da'a̱ie. E' kue̱ki̱ ie'pa tö ijcheke ke̱kraë erë e' kë̀ dör buaë shu̱te̱ Skëköl wöa̱. E' kue̱ki̱ Jesucristo köte̱wa̱ etökicha ë̀ se' nuì̱ paiklottsa̱, e' je' dör buaë shu̱te̱ Skëköl wöa̱. E' kue̱ki̱ Jesús dör ibua'ie. E' kue̱ki̱ se' ka̱wöta̱ e̱rblök ie' mik ena ie' ë̀ ka̱wöta̱ ttö̀ iu̱tè. I̱'ñeta̱ ie' tkër Skëköl wörki̱ se' tté chök Skëköl a̱. Ie' dör ibua'ie e' kue̱ki̱ Israel aleripa e̱rblé ie' mik e'pa kë̀ ka̱wöta̱ ie' olo'yök. Ie' wa iyë́ tö ñala̱ yö' se' a̱ döka̱ ika̱ska'. E' kue̱ki̱ se' ka̱wöta̱ se̱nuk e̱' meulettsa̱ weinuk e̱rblè Jesús mik e' kue̱ki̱. Se' tö ie' watéttsa̱ e' ta̱ Skëköl tö se' shu̱leraë we̱s ie' tö Israel aleripa shu̱li' es.
1
Skëköl ut se' ta̱ ilà wa
1 Skëköl utbitu̱ tai̱ë se' yë́pa bak ká̱ ia̱ia̱ë e'pa ta̱ ittekölpa wa. Ie' utbitu̱ ie'pa ta̱ tai̱ë kua̱'ki̱ kua̱'ki̱.
2 Erë i̱'ñe ta̱, mik ká̱ i' e̱rkewatke e' ké̱wö ska' ta̱, ie' tté se' ta̱ iwák alà patkë'itö ká̱ i' ki̱ e' wa. Tsa̱we ta̱ ie' tö íyi ulitane yö' ilà ta̱ ñita̱. Ñies ie' tö ilà tkë'ka̱bak a̱s íyi ulitane dö̀ ie' ulà a̱ aishkuö ta̱.
3 Skëköl Alà dör iyë́ olo tai̱ë e'. We̱s Skëköl dör e' su̱ë ie' dör. Íyi ulitane kicha a'tse̱r ie' wa̱ ittè diché tai̱ë e' wa. Se' nuì̱ paikléttsa̱itö e' ukuöki̱ ta̱ ie' tkéka̱ ká̱ jaì a̱ dalöiërta̱' tai̱ë Skëköl ulà bua'kka.
Skëköl Alà olo ta̱' tai̱ë shu̱te̱ Skëköl biyöchökwakpa tsa̱ta̱
4 E' wa iwënewa̱ tö Skëköl Alà dör Skëköl biyöchökwakpa tso' ká̱ jaì a̱, e'pa ko̱s tsa̱ta̱. Es ñies we̱s Skëköl tö ie' kiè iwák alà, e' dör bua'iewa̱ we̱s ie' tö ibiyöchökwakpa kiè e' tsa̱ta̱.
5 Skëköl yëkkuö ki̱ itso' kitule tö Skëköl tö iché ilà a̱:
“Be' dör ye' alà;
i̱'ñe yö ikkachétke tö ye' dör be' yë́.”
Erë ttè e' kë̀ yëule ie' wa̱ ibiyöchökwakpa isie a̱. Ñies Skëköl yëkkuö ki̱ Skëköl tö ilà tté chè i' es:
“Ye' tö icheraë tö ye' dör ie' yë́,
eta̱ ie' dör ye' alà.”
Erë Skëköl kë̀ wa̱ ibiyöchökwakpa isie tté yëule es.
6 Ñies mik ie' tö ilà eköl ë̀me, e' patkeketke ká̱ i' a̱, eta̱ ie' tö itté yë' i' es:
“Ye' biyöchökwakpa ulitane ka̱wöta̱ ie' dalöiök tai̱ë.”
Ttè ekkë ko̱s kue̱ki̱ se' wa̱ ijche̱r tö Skëköl Alà dör Skëköl biyöchökwakpa ulitane tsa̱ta̱.
7 Mik Skëköl tö ibiyöchökwakpa tté cheke, eta̱ ie' tö ichè i' es:
“Ye' tö ye' biyöchökwakpa patkeke we̱s siwa̱' batsi̱r es,
e'pa dör ye' kanè mésopa patkekeyö we̱s bö' wörkua wöñar es.”
8 Erë ie' tö ilà tté cheke i' es:
“¡A Skëköl, be' tö s'wëttse̱ke s'blúie e' dör yöbië!
Be' tö s'wëttse̱ke yësyësë.
9 Se̱ne yësyësë dalër be' é̱na, erë se̱ne sulu a̱r suluë be' é̱na;
e' kue̱ki̱, ye' dör be' Këköl, e' tö be' klö'wé̱ ta̱ ttsë'ne buaë méyö be' a̱ tai̱ë be' male̱pa ulitane tsa̱ta̱.”
10 Ñies Skëköl tö ilà tté cheke i' es:
“A Këköl, tsa̱we ta̱ be' tö ká̱ i' yö',
ñies ká̱ jaì ena ì ko̱s tso' iki̱ e' yö' be' wák tö.
11-12 E' ko̱s chörawa e̱rdawa we̱s datsi' nurwa̱ ta̱ ie̱rwa es,
e' ko̱s manerdattsa̱ we̱s s'datsi' mane'wè̱ ta̱ iwötrèwa̱ es.
Erë be' tso'tke ke̱net. Be' kë̀ manerpattsa̱, be' se̱r michoë.”
13 Skëköl tö iché ilà a̱ i' es:
“Be' e̱' tkö́se̱r ye' ulà bua'kka
dö̀ mik ye' tö be' bolökpa mérö be' klö̀ diki̱a̱ eta̱.”
Erë Skëköl kë̀ wa̱ ttè e' yëule ibiyöchökwakpa isie a̱.
14 Skëköl biyöchökwakpa dör we̱s siwa̱' es kë̀ wërta̱'. E'pa ko̱s kaneblöke Skëköl a̱. Ie' tö ie'pa patkeke wé̱pa tsa̱tkërdaë, esepa ki̱muk. E' kue̱ki̱ ie' kë̀ wa̱ ttè ese yëule ie'pa isie a̱.