Di Leta tu di
HEEBROOZ
Weh dis leta di taak bowt
Dis leta mi rait tu wahn groop a bileevaz weh mi-di luk fi giv op pahn dehn fayt kaa dehn mi-di goh chroo lata ting sayka weh dehn mi bileev eena Jeezas. Di persn weh mi rait dis leta mi-di inkorij dehn noh fi giv op kaa Jeezas da-mi di laas persn weh Gaad mi wahn shoa ihself chroo. Ih mi shoa dehn chree mayn ting: (1) Jeezas da di Son a Gaad weh wahn liv fareva. Hihn mi laan fi obay fi hihn Faada chroo di ting dehn weh ih mi sofa. Az Gaad Son, Jeezas mi grayta dan di prafit dehn fahn di Oal Testiment, di aynjel dehn, ahn Moaziz ihself. (2) Gaad mi seh dat Jeezas da-mi wahn prees weh wahn liv fareva, ahn hihn grayta dahn aal di prees dehn a di Oal Testiment. (3) Chroo Jeezas, di bileeva dehn geh sayv fahn dehn sin, fahn fyaa, ahn fahn det; ahn sayka weh Jeezas da hai prees, hihn gi chroo chroo salvayshan. Aala dehn animal sakrifais weh dehn doz du eena di Heebroo rilijan da-mi oanli wahn picha a di sakrifais weh Jeezas mi wahn mek.
Di persn weh rait dis leta tu di Heebrooz mi-di inkorij dehn fi bee faytful jos laik som a di faymos peepl dehn eena Jooish hischri weh evribadi mi noa fi dehn fayt. Yu ku reed bowt dis eena chapta 11. Eena chapta 12 ih inkorij dehn fi stay faytful tu di en, wid dehn aiy faasn pahn Jeezas, ahn fi bayr eni sofarin ahn persikyooshan weh mait kohn tu dehn. Dis leta en wid werdz a advais ahn waanin.
How dis leta set op
Inchrodokshan: Krais shoa hoo egzakli da Gaad 1:1-3
Krais grayta dan di aynjel dehn 1:4–2:18
Krais grayta dahn Moaziz ahn Jashwa 3:1–4:13
Krais az di graytis hai prees 4:14–7:28
Krais agreement beta dan di fos agreement 8:1–9:22
Krais sakrifais beta dahn aal di res 9:23–10:39
Fayt da di bes ting 11:1–12:29
How fi pleez Gaad 13:1-19
Wahn pryaa weh di leta en wid 13:20-21
Paal laas werd dehn eena dis leta 13:22-25
1
Now Gaad taak tu
wi chroo ih Son
1 Way way bak, Gaad mi taak lata taim ahn eena lata difrent way tu wi ansesta dehn, chroo di prafit dehn.
2 Bot now eena dehnya laas dayz, ih taak tu wi chroo ih Son. Gaad mi mek di yoonivers chroo hihn, ahn wan day evriting wahn bilangz tu hihn.
3 Gaad Son da di lait weh di shoa wi di brait gloari a Gaad. Wen unu si di Son, unu di si Gaad, kaa di Son da jos di saym az Gaad. Chroo fi hihn oan maiti Werd dehn hihn hoal di hoal yoonivers tugeda. Ahn afta di Son don wash weh wi sin dehn, ih gaahn da hevn gaahn sidong pahn di rait han said a Gaad, weh ga moa powa dahn aal.
Gaad Son way haiya
dan di aynjel dehn
4 Gaad mek ih Son way haiya dan di aynjel dehn, jos laik how di naym weh ih gi ahn faar faar grayta dahn eni ada naym.
5 Ahn Gaad neva tel non a di aynjel dehn seh,
“Yoo da mi Son;
tudeh Ai kohn fi bee yu Faada.”
Ahn agen, Gaad neva tel non a dehn seh,
“Ai wahn bee dehn Faada,
ahn dehn wahn bee mi Son.”
6 Gaad Son mi deh eevn bifoa eniting mi mek, ahn wen ih mi-di sen ahn eena di werl, Gaad tel aala ih aynjel dehn seh,
“Aala unu mos wership mi Son.”
7 Wen Gaad taak bowt di aynjel dehn, ih seh,
“Ai mek mai aynjel dehn bee laik breez weh di bloa,
ahn mi servant dehn laik faiya weh di blayz op.”
8 Bot wen Gaad taak tu ih Son, ih seh,
“Yoo da Gaad, ahn yu kingdom wahn laas fareva ahn eva!
Yu rool yu peepl dehn fyaa-wan.
9 Yoo lov weh rait ahn yu hayt weh eevl.
Dat da wai mee, weh da yu Gaad, pik yoo
ahn aana yu moa dahn aala yu fren dehn,
ahn weh Ah pik yoo,
dat gi yu lata jai.”
10 Dis da weh Gaad seh tu:
“Laad, wen notn neva deh,
da yoo mek di ert ahn di hevn dehn
wid yu oan han dehn.
11 Aala dehn wahn kohn tu wahn en,
bot yoo wahn aalwayz deh;
dehn wahn wayr owt
sayhn laik oal kloaz.
12 Yu wahn foal dehn op laik wahn koat.
Yu wahn chaynj dehn
sayhn laik how yu chaynj kloaz.
Bot yoo wahn neva chaynj;
yoo wahn neva geh oal ahn ded.”
13 Gaad neva tel non a di aynjel dehn seh,
“Sidong ya da mi rait han said
til Ah put yu enimi dehn anda yu fut laik wahn futstool.”
14 Yu si, di aynjel dehn da spirit ahn dehn dehdeh fi serv Gaad. Gaad di sen dehn fi help dehn wan weh hihn wahn sayv.